اقرب من القريب

بارت 6

حوراء: ـ بعدما اختفى سجاد ضليت خايفة كلش عليه دراستي بدت تقل صرت ما اركز بشي ابد بعد اسبوع كامل على غيابه راسلني وكال جنت بالمستشفى مريض بقيت اعتب عليه لان ما انطاني خبر وبالي ضل يمه صدك خوفني عليه

سجاد: ـ هالكد تحبيني وهيج خايفة علية؟

حوراء: ـ شنو احبك شدتحجي؟! احنا مو اصدقاء طبيعي اخاف عليك وانت اختفيت بدون ما تكول

سجاد: ـ اششش اسكتي. لا تبررين ترة ادري انتي تحبيني مثلما اني احبج

حوراء: ـ شنو. شدتحجي انت؟ شنو احبك شنو تحبني؟ شكو شبيك؟

سجاد: ـ اي حورية اني احبج واموت عليج. من اول يوم حجينا سوة حبيتج كل يوم حبي الج يكبر. اني رايدج بالحلال كل مرة اريد اصارحج اتراجع خايف ترفضيني واخسر حتى صداقتج. بقيت اكتم واكتم حبي الج لحدما تمرضت و دخلت مستشفى. واذا خسرتج اموت.

حوراء: ـ اقره رسائله ومصدومة من كلامه بقيت صافنة اول مرة يصير وياية هيج بس بنفس الوقت حسيت شي حلو بداخلي
سجاد: ـ شبيج لا تصفنين احجي مو شلعتي گلبي.

حوراء: ـ ها شحجي ما اعرف.

سجاد: ـ گولي انتي هم تحبيني مثلما احبج.

حوراء: ـ بس انت صديقي شلون احبك.

سجاد: ـ اششش عوفي هاي الكلاوات ادري بيج تحبيني.
حوراء: ـ خلص اذا تدري احبك بعد شكو تلح تريدني احجي
سجاد: ـ اريد انتي تگوليها. منج احلى تطلع. لو اني ما استاهل تگليلي احبك
حوراء: ـ اوك احبك يلا ارتاحيت.
سجاد: ـ اموت عليج مريتي.

عباس
كملت معاملتي ورجعت اداوم بالجامعة قانون مرحلة ثالثة ما مصدك راح اتخرج واحصل شهادتي.
قسمت وقتي بين الشغل والدوام ادرس زين كل يوم حتى ماتصير عندي تراكمات. بالامتحانات ابوية ابد ما خلاني اتقرب من الشغل كله هو لازمه ومرات اخوية علاوي اذا ماعنده شي هو يساعده.
جنت منعزل كلش اجي على كد المحاظرات والامتحانات ماعندي لا أصدقاء ولا اختلط بأحد.
اول ما تخلص المحاظرة اذا عندي وقت هواي اروح للمكتبة لان قريبة اروحلها مشي مرات اذا الوقت قليل اكعد بالحديقة الخلفية ادرس وحدي. جنت اريد اطلع درجات عالية واتخرج حتى اكون نفسي واتقدم للساكنة عقلي وگلبي.
رغم الكلية بيها كلشي بس هي شاغلة بالي محد كدر ياخذ مكانها بگلبي.

حوراء: ـ مرت الايام واني بين دراستي وبين حبي لسجاد. صرت التهي هواي اكثر الوقت كاعدة احجي وياه مرات حتى من هو يگلي راح اروح ادرس اني ادرس شوية لو ما ادرس اصلا. عقلي وگلبي بس يمه ليل ونهار افكر بيه.
يمكن الي يسمعني يكول مبالغة وشدعوة
بالنسبة الي عشت حياتي محرومة من كلشي. حياة باردة لابيها حب ولا حنان ولا اهتمام. عائلة تدور مظاهر مشاعرهم ميتة. اول مرة شخص يهتم بأدق تفاصيل حياتي. يسمعني بكل وقت يشجعني ادرس يهون علية الحياة.
مجنت اعرف الصح شنو والغلط شنو. صدكت كلامه ووثقت بيه مثل ثقة اي بنت بأمها. لهالدرجة امنت بيه. جانت ايام كلش حلوة حسيت نفسي رجعت طفلة كدما جان مهتم بية.
اجت الامتحانات واني بعدني لا مكملة المواد ولا مراجعة دخلت تجربة جنت واثقة ما راح اكدر انجح وحتى ما اتأهل للوزاري.
دخلت الامتحانات طلعت بالفيزياء والكيمياء. تأهلت للوزاري بس درجاتي ستينات.
خالتي وبيبي جانو يشجعوني ميخالف ادرسي اكثر حتى تصعد درجاتج وعندج وقت بعد هواي للوزاري.
سجاد گلي اني اساعدج ندرس سوة بس نكعد نسوي جدول مراجعة سوة. هسة اقري وكملي ونراجع سوة.
رجعت ادرس نفس قبل الامتحانات سجاد صار يفتح نت قليل كلما اسأله ليش يگول ما الحك دراسة هواي لازم اشد حيلي حتى انجح.
يوم عن يوم قل تواصلنا الا ان صار يختفي هواي يعني كل اسبوع يفتح فد ساعة ويسده مرات حتى ما يگلي اني رايح. صار يتحجج اكو مشاكل بين اهله ما تدخلت ولا حجيت شي.
باقي شهر على الامتحانات هم بعدني ممكملة المواد ولا اكدر اراجع سجاد ماكو كلش اختفى اتصل عليه مغلق برامجه كلهن ما يفتحهن. تركت الدراسة تركت الاكل تمرضت ودخلت للمستشفى محد يعرف شبية والاطباء شخصوا حالتي كالو حالة نفسية لان كل الفحوصات زينة مابيج شي. للاسف اجه وقت الامتحانات اني ماكدرت امتحن خلصت الامتحانات رجعت لاهلي وسجاد ماكو يوم عن يوم صحتي تتراجع كمت اضعف اكثر