حوراء:ـ
كلش استمتعت اليوم اخيرا شفت بيبي و خالتي كلش مشتاقتلهن. همزين بيتهم قريب حتى اقنع عبوسي نروحلهم.
جنت صافنة عليهم يسولفون و يتشاقون بيبي كل شوية تشوفني اضحك تدعيلنا من شافتني مرتاحة وشافت اهل عباس شلون يتعاملون وياية بقت تدعيلهم هواي.
عباس واكف يتشاقة وية بيبي و خالة واني واكفة يم ام عباس ونتفرج عليهم فجأة احس ايد غمضت عيوني والثانية حضنتني. شوية شوية انداريت تفاجات من شفته.
باسم! هاي شوكت اجيتو؟ شجابك هنا؟ من شوكت انتو هنا؟ ليش ما انطيتني خبر؟
باسم: ـ ههههه ولج انطيني مجال خل اسلم خل اتنفس.
حوراء: ـ اوك اوك.
باسم: ـ السلام عليكم يابة. اعذرونا اجينا بدون موعد. بس بلغت عباس نريد نفاجئ هاي الاميرة.
بقو يتسالمون واني حاضنة باسم وواكفة عبالك راح يطير. كلش مشتاقتله.
اگلك بسوم يلا عوفهم كافي بعد مو سلمت هسة حاجيني.
ام عباس: ـ يمة على كيفج ويه الولد. خل نجيبله اكل يتعشى يرتاح ويسولف وياج. هديه خطية قابل راح يطير منج.
باسم: ـ اي والله خالة ميت جوع وكلت وين تروح يا باسم وين تروح. ماكو الا خالة ام عبوسي.
ام عباس: ـ يخسى الجوع ابني. هسة نجيبلك احسن عشه.
باسم: ـ الله يخليج خالة ما تقصرين.
دقايق واجه الاكل كعدت اكل صدك اكل طيب مدري لمتهم حلوة تفتح النفس.
عباس: ـ
من طلعت اتصل علية باسم اخو حوراء ردت ما اجاوبه خفت اكو شي لان اهلها كلهم سافرو و دائما من يتصلون لازم اكو شي صاير. استغفرت ربي وجاوبته.
باسم: ـ السلام عليكم. شلونك يابة
عباس: ـ عليكم السلام ورحمة الله. الحمدلله بخير انت شلونك. الاهل شلونهم.
باسم:ـ الحمدلله بخير كلنا. عباس نكدر نلتقي خارج بيتكم وبدون علم حورية رجاءً
عباس: ـ اي عادي بس ليش خير خماكو شي
باسم: ـ لا لا لتخاف ماكو شي والله بس محتاجك بشغلة.
عباس: ـ ماشي تعال للمكتبة.
باسم: ـ اوك دقايق واني يمك
عباس: ـ كلش خفت الصراحة. بقيت افكر شنو عنده و شصاير شوية و دخل للمكتبة.
باسم: ـ السلام عليكم.
عباس: ـ عليكم السلام هلا باسم. استريح. كولي شكو الله عليك ولك خوفتني كول شصاير.
باسم: ـ ههههههه. هاي حورية معلمتك هالاستعجال على كيفك يابة والله ما صاير شي بس اهدأ.
عباس: ـ اعذرني يابة بس هاي اول مرة تخابرني واني الاعرفه انتو مسافرين فـ تفاجأت.
باسم: ـ حقك حبيبي. والله بس الاهل سافرو اني مارحت وياهم جانت عندي شغلة ببغداد كملتها وهاي جيتي. وصلت شفت اهل امي ماكو كلت يجوز طالعات بواجب لو مسيرات كلت خل اسوي مفاجأة لحوري واحتاجيت مساعدتك.
عباس: ـ اهاا خير ان شاءلله. الاهل يمنا بالبيت اجن قبل شوية و بلغتهم يبقون ع العشه.
باسم: ـ حلو عاشت ايدك. اليوم عيدميلاد حورية. طبعا محد يتذكره لان ابد ممسويه. اريد نفاجئها شنو رأيك؟
عباس: ـ ياريت والله لان كلش محتاجة تغير شوية نفسيتها. صحتها هالايام مو تمام.
باسم: ـ شكو يا ستار شصاير؟
عباس: ـ نفس الحالة القديمة بس دتزيد الاعراض عدها رغم اني منظملها علاجها بالثواني وانطياها بيدي حتى شغل ما جاي تشتغل شغلات بسيطة ووياها زينب وامي يساعدوها بس ما اعرف شنو ديصير.
باسم: ـ دخيلك ربي هالبنية ما تهنت ولا يوم بحياتها. من عمرها 10 سنوات امي تكرب عليها ومحد بينا راحم بحالها. هسة تزوجت ما لحكت تفرح نوب تمرضت.
عباس: ـ الله كريم خوية الله كريم. خل اشوف دكتور زين حتلو اخذها للخارج اعالجها. لو لزم الامر انطيها گلبي واني الممنون.
باسم: ـ والله ياخوية كبرت بعيني ابن اصول والنعم منك. ان شاءلله تكون الحالة سهله مجرد حالة نفسية. فترة وتعدي ان شاءلله وتجيبولنا زعاطيط تملون علينا حياتنا.
عباس: ـ ان شاءلله بس اريد الله يحفظها الي قبل كلشي.
باسم: ـ الله يحفظكم و يسعدكم. هسة شگلت علمود المفاجأة.
عباس: ـ والله خوش فكره. يله امشي نجهز الغراض حتى نروح للبيت من وكت.
باسم: ـ يله امشينا.
رحنا حجزنا كيكة وسوالف الحفلة. كملنا باسم كال اسبقني اكمل شغلة واجي.
رحت اشتريتلها هدية و رحت للبيت شفتها كلش فرحانة وجهها مورد و تضحك. الحمدلله والشكر ياربي على هالنعمة الحلوة. اشوفها تضحك وية امي وتسولف سألت زينب عليها خاف تخربطت او اكلت شي ممنوع. كلش حريص على اكلها و علاجاتها بحيث مثبت منبهات بجهازي على موعد علاجها.
دخلت بلغت الكل بجية باسم بس بدون ما تنتبه حورية. خالاتي راحن لبيوتهن ورة العشه. واني واكف اتشاقة وية بيبية حورية كلش حبابة تنحط بالگلب. حجيها و دعواتها تخبل.
شوية ودخل باسم و اشوف فرحتها ما تنوصف كأنما اجاها سند. صح اني ممقصر وياها بس الاهل مكانهم يختلف. تحجي بلهفة كأنما دتگول للكل شوفو اني عندي اخ يحبني. اني مو وحيدة. اني عندي ظهر.
بينما هي ملتهية وية اخوها واهلي رحت جبت الغراض من سيارة باسم دخلتهن وكعدت اجهز اني و زينب سوة.
كملنا بس بقى شلون نصيحهم.
طلعت يمهم كعدت سويت نفسي جنت اخابر بحجة الشغل وهسة كملت كعدت اسولف وية ابوية ع الشغل شوية وسمعنا صوت شي طك جوة عرفت هاي زينب حتى تصيحنا وكلهم يدخلون فعلا كلنا ركضنا وصوت طكات خفيفة بالصالة دخلنا شغلنا الضوة.
زينب: ـ مفاااااااجأة.. كل عام وانتي بمليون خير يا احلى حورية بالدنيا.
حوراء: ـ بقيت صافنة هاي شنو شوكت سووها واصلا شمدريهم اليوم عيدميلادي؟
باسم: ـ كل عام وانتي احلى واحن اخت. يارب السنة الجاية نحتفل بيج و بطفلج.
عباس: ـ كل عام وانتي احلى اميرة بالكون. يارب كل سنة احنا سوة ونحتفل بهاليوم الحلو.
حوراء: ـ ما اعرف شحجي والله حرفيا تصككت بس دموعي تنزل.
اجو كلهم عايدوني يحضنوني ويبوسون بية واني ما اسوي اي شي بس دموعي تنزل.
عباس: ـ يا حلو سد دموعك شوية غرگنا.
حوراء: ـ
ضحكت كلهم ضحكو مسحت دموعي و احتفلنا سوة صدك هذا احلى يوم بحياتي كلها.
تونست كلش كلش هواي
خلصتها ضحك وشقة الحمدلله كلهم يحبوني واني احبهم طبعا عباس خطية حاير بمواعيد علاجي كلما يصير موعد واحد يجيبه الي ويخلي الحباية بحلگي يگلي جنج ما تدرين لا تفكرين هي علاج عود دتاكلين حلويات.
ضحكهم و فرحتهم ما تنوصف مخليني بنصهم صدك حسيت نفسي اميرة.
عباس: ـ احم احم. بهاي المناسبة السعيدة اريد اگللكم شي.
راح اقدم لحوري ع الجامعة اريدها تكمل دراستها لان حرامات هالمعدل الحلو يگعد بالكنتور.
ابو عباس:ـ تستاهل بنيتي حوري شوفها شنو عاجبها واني ادخلها ارقى جامعة ان شاءلله
ام عباس: ـ يا يمة عود اني منتظرة ينفتح التقديم واگلك تخليها تكمل.
باسم: ـ واني موجود اي شي تحتاجوه اني اساعدكم.
حوراء: ـ انتو احلى شي بحياتي كلها والله شما اسويلكم ما اكدر اجازيكم على هذا حجيكم الحلو و على كلشي دتقدموه الي. ما اعرف شلون اجازيكم حجيتها و بجيت
عباس: ـ كافي بجي يروحي اني حجيت هيج حتى تضحكين لو حتى تبجين.
ميصير حبيبي على كلشي نبجي. صحتج تتأذى يعمري وهم تدخلين مستشفى تقبلين اني اخاف واقلق عليج.
حوراء: ـ لا ماريد المستشفى حباب.
عباس: ـ لعد كافي بجي امورتي. يله ناكل شوفي راح ياكلون كلشي ويخلونا.
حوراء:ـ ههههه يلا تعال.
اكلنا وضحكنا و سولفنا لحدما صارت بالوحدة بالليل باسم اخذ بيبي وخالة واحنا نمنا.
قبل لا انام بقيت شكد افكر شنو اقدم و وين راح يطلع قبولي وشلون ادرس لحدما غفيت.
ــــــــــــــــــــــــــــــــــــــــ
صباحكم ورد و عافية.
أنت تقرأ
اقرب من القريب
Romance...🦋... " وإن ضاقت بك أرجاء الأرض ، فلا تنسى أن تدعو رب السماء لأن الله كفيل بمحي أحزانك وشفاء جراحك🌸
