اقرب من القريب

بارت 12

‏هناك فرح في نهاية كل طريق..
و هناك راحة بعد كل تعب..
وهناك نور بعد كل ظلام..
‏اللهم اجعل نهاية جهدنا فرحًا وسرورًا. 🌸

ــــــــــــــــــــــــــــــــــــــــــــــــــــــــــــــــ

عدما نزل عباس بقيت افكر بكلامه و حبه  لحدما غفيت كعدت وقت صلاة الصبح خالتي نايمة رحت للحمام توضيت و صليت كملت صلاتي رحت فتحت تلفوني اول ما فتحته وصلت رسالة من عباس
عباس: ـ شعندج كاعدة هالوكت بوية.
حوراء: ـ شبعت نوم صارلي مدري شكد نايمة.
عباس: ـ نوم العوافي يبعد العافية. شلونج بنيتي.
حوراء: ـ الله يعافيك. الحمدلله بخير انت شلونك شنو ما نايم.
عباس: ـ اذا انتي بخير يعني اني بخير. لا والله ما نمت.
حوراء: ـ مو تتعب هيج ليش ما رجعت للبيت.
عباس: ـ مادام يمج يعني مرتاح لا تهتمين.
حوراء: ـ فدوة.
عباس: ـ يفداج اعدائج. سولفيلي هسة شبيج و شنو صارلج بالضبط. ليش هيج متأذية يروحي.
حوراء: ـ عادي ما نحجي بهالموضوع.
عباس: ـ براحتج بوية بس بأي وقت تريدين اني مستعد اسمعج و اساعدج بأي شي تحتاجيه والله ما اذيج بحرف ولا اجرحج.
حوراء: ـ عباس.
عباس: ـ عيونه.
حوراء: ـ عساهن سالمات.
عباس: ـ يسلمج الله حبيبة. سولفي بنيتي شعندج.
حوراء: ـ ليش دتساعدني و تعاملني هيج.
عباس: ـ لان احبج و اخاف عليج من كلشي.
حوراء: ـ ليش تحبني؟
عباس: ـ لان انتي ماكو شي بيج ما ينحب.
حوراء: ـ من شوكت تحبني؟
عباس: ـ والله تريدين الصدك من اول مره شفتج بيها.
حوراء: ـ تتأذة
عباس: ـ عادي شحلاتها الاذية منج.
حوراء: ـ عباس لا تخاطر هيج اني گلبي مو الي.
عباس: ـ اششش راح اعوضج عن كلشي. كلشي تريدين اصيرلج. لا تتعبين نفسج. ما اجبرج على شي ما تريديه.
حوراء: ـ ما اعرف احس نفسي ضايعة.
عباس: ـ لا تتعبين نفسج بنيتي ولا تفكرين بشي هسة. اول صيري زينة و ارجعي لدراستج عوفي التسخيت وامتحني و انجحي وبعدين فكري اذا قبلتي اتقدم و اذا ما قبلتي هم ابقى وياج وما اتركج للموت.
حوراء: ـ تتحمل كلشي.
عباس:ـ مادام انتي وياي اتحمل كلشي وياج
حوراء: ـ شوكت نطلع للبيت.
عباس: ـ مليتي يحيلي؟
حوراء: ـ ما احب اجواء المستشفى.
عباس:ـ حقج بوية هسة تجي الدكتورة تفحصج حتى نطلع.
حوراء: ـ ماشي. خليك يمي.
عباس: ـ يمج والله. تريدين اصعدلج عادي.
حوراء: ـ ههههه لا خليك جوه بس نبقى نتراسل
عباس: ـ فدوة اروح لهالضحكة لترد عافيتي. باقي يمج يروحي انتي.

حوراء: ـ عندي ناس يحبوني و يهتمون لأدق تفاصيلي ليش معلقة گلبي وية شخص يتذكرني بمزاجه و ينساني بمزاجه خلص من اليوم راح ادفن هالحب واحب الي يحبوني بس واهتم بدراستي وبعد ما اهتم لأحد.

مشى الوقت بسرعة اجت الدكتورة فحصتني و كالت تكدرين تطلعين عباس جان ويانا هو طلعنا وصلنا للبيت وصى خالتي علية هواي عافنا وراح بس احس ترك گلبه يمي وراح.

طبعا الي عرفته بيبي متعاركة وية اهلي من اجوني للمستشفى وكايلتلهم كله بسببكم البنية تعبت هيج.
گايله لامي اذا تريدين تشوفين بنتج نجيج خطار تشوفيها ونرجع كالتلها لا اريدها ولا تجيني بعد. خلصنا من الشغل و الكراب الحمدلله.