اقرب من القريب

بارت 10

‏"ربما أراد الله لك أن تمر بتلك الأزمات .. حتى تتذوق فرجه وجبره لك."

إن بعد العُسر يُسر.
ــــــــــــــــــــــــــــــــــــــــــــــــــــــ

حوراء: ـ
گعدت من الصبح كلهم نايمين نظفت غرفتي. نزلت سويت ريوك تريكت عجنت و رحت اجهز الغدة حتى من يكعدون اروح انظف.
كملت الغدة كعدوا سويتلهم ريوك رحت خبزت و كملت رحت غسلت الملابس. خليت بكل غرفة سلة ملابس جبيرة حتى يجمعون بيها الملابس الوصخة بلكت اخلص من الهوسة. صار الظهر صبيت غدة و غسلت الماعين خلصت كلشي بس متت تعب رحت لغرفتي اريد ارتاح دك تلفوني شفت خالتي تتصل حجيت وياها سولفتلها كلشي سديته منها رحت اجيب الملابس من السطح حتى ارتبهن سمعت صوت امي تحجي وية بيبي بالموبايل مدري عليمن جانن يحجن عفتها و رحت اكمل شغلي شوية و سمعتها تصيحني
حوراء: ـ ها ماما
الام: ـ بيبيتج عازمتنا باجر نروح الكاظم تجين لو لا؟
حوراء: ـ اي عادي
الام: ـ يلا ورة العشه نروح نبقى يمهم حتى نطلع مناك
حوراء: ـ ماشي.
الام: ـ روحي عجني بعد حتى تخبزين قبل لا نروح و ضميه بالمجمدة.
حوراء: ـ حاضر.

يعني اكو واحد يخبز مرتين باليوم تقريبا 100 كرصة يربي تعب تعب شوكت اخلص.
رحت عجنت و بديت اجهز العشه البيت صار يلمع من النظافة و ريحته تخبل. كون يبقى نظيف للاسبوع الجاي والله مابية اعيد كل هالتنظيف.
خلص العشه رحت خبزت و سبحت رحت حظرت غراضي ورة العشه غسلت الماعين و رحنا.
من التعب اول ما دخلت نمت كعدت على صوت تلفوني جاوبت طلع عباس كتله حباب ميتة تعب خليني نايمة وسديته بدون ما اسمع جوابه.
كعدتني خالتي قبل الاذان اكلت و بدلت ورحنا للكراج مناك صعدنا للكاظم حتى تلفوني عفته بالبيت لان جان مخلص شحن ومقفول صلينا الظهر ورجعنا بعد امي عافتني وراحت رحت شحنت تلفوني وطبيت سبحت عزلت ملابسي حجيتلهن شسويت هاليومين و اهلي شمسوين ما جان بيدهن شي غير بس يصبرني. ما يكدرن يحجن وية امي خاف تاخذني و ما ترجعني يمهم بعد سوينا عشه سوة صدك افتقدت هالشي ببيت اهلي.  تعشينا وكملنا غسلنا الماعين بلغت خالتي باجر ارجع ادرس حتى اقدم ع السنة الجاية كيفن خطية صارت بال10 بيبي كالت اني تعبت رايحة انام و خالتي كاعدة تتابع فلم رحت للغرفة حتى احظر كتبي وانام من وكت حتى اشبع نوم و اكعد ادرس باجر.

عباس: ـ حوراء صارت جزء مهم من يومي.  لازم اراسلها اطمئن عليها. احسها تخصني. اليوم مختفية راسلتها ماكو اتصلت عليها جاوبتني بصوت نعسان و تحجي بسرعة و عصبية سدته قبل لا احجي ضحكت و رحت نمت. ثاني يوم هم ماكو ابد ما راسلتني اراسلها ما فاتحة نت اتصلت عليها جهازها مغلق ضل بالي كلش
حتى ما تعشيت ولا الي نفس بشي. صافن و فزيت على صوت اشعار رسالة طلعلي رقمها صار متاح و اكدر اتصل عليها هسة.

حوراء: ـ
رحت احظر كتبي شفت تلفوني ع الشحن تذكرت عباس شلون التهيت اليوم و ابد ما راسلته اول ما فتحت اجت اشعارات الرسائل والمكالمات. دخلت على الواتساب بعدني ما كاتبة شي هو دزلي: ـ
وين جنتي هديتي حيلي.
حوراء: ـ هلو عباس.
عباس: ـ هلا بوية. شصاير وياج خليتي بالي.
حوراء: ـ ما صاير شي جنا بالزيارة و من رجعنا التهيت ما صارت فرصة اراسلك.
عباس: ـ زيارة مقبولة. ليش جهازج مغلق طول اليوم.
حوراء: ـ تقبل الله اعمالك. مخلص شحن و مقفول من رجعنا شحنته.
عباس: ـ اممم. شلونج.
حوراء: ـ الحمدلله تمام انت شلونك.
عباس: ـ الحمدلله. افتقدتج.
حوراء: ـ اني هم.
عباس: ـ انتِ وين
حوراء: ـ بالبيت.
عباس: ـ ادري يم اهلج لو يم خالتج.
حوراء: ـ يم خالتي.
عباس: ـ خوش لعد. يله نسوي جدول و باجر تبدين تدرسين تسخيت بعد ماكو اريد معدل عالي خوش.
حوراء: ـ حاضر استاذ.
سوينا جدول و سولفنا شوية و رحنا نمنا كعدت الصبح تريكت و بلشت بالدراسة رجعلي الواهس مثل قبل اقره بهمة و خالتي تشرحلي و بيبي كل شوية تجي يمنا تجيبلنا فاكهة لو حلويات لو اكله خفيفة استمرينا اسبوع على هالحال. عباس بالليل يحاجيني. الخميس رحت لاهلي و طبعا نفس شغل الخميس الفات اول ما دخلت للبيت خليت الملابس بالغسالة و غسلتهم رحت نظفت الهول و كملته رحت اسوي عشه ثاني يوم نظفت باقي البيت و بلشت اطبخ طبعا كل يوم اطبخ اكثر من نوع و كمية اكثر من الحاجة حتى يبقالهم الاسبوع كله. اذا ما كفه يخلصوها من المطعم لو طماطة و بيض. صار السبت باسم وصلني طلب يدخل وياي كال اريد احجي وياج دخلنا سلمنا على بيبي وخالة كللهن ممكن احجي ويه حورية على انفراد طلعن وبقينا وحدنا.
باسم: ـ شلونج خوية.
حوراء: ـ استغربت طريقة كلامه و اسلوبه جاوبته الحمدلله بخير
باسم: ـ بس اني ما جاي اشوف هالشي.
حوراء: ـ شلون يعني.
باسم: ـ جاي اشوف اختي تعبانة و القهر ماخذ حيلها. جاي اشوف اختي كبرت ضعفين عمرها من الضيم.
حوراء: ـ ما تحملت بسرعة نزلن دموعي اجه يمي حضني و مسح دموعي حجه بهدوء: ـ لا تبجين يروح اخوج. ادري بيج متأذية و ما راضي على هذا كله بس ببيتنا ما اكدر احجي وياج اي شي هنا احسن. ما اريد احد يعرف اني احجي وياج و اي شي راح اسويه ما اريد احد يعرف بيه لان راح يأذوج و يأذوني.
حوراء: ـ شعور غريب اول مرة احسه. مؤلم بس كلش حلو. اول مرة احس عندي اخ و سند بهالحياة. شخص من لحمي و دمي.
باسم: ـ كافي بجي بوية. يمة منجن يالبنات تفرحن تبجن، تزعلن تبجن، تنقهرن تبجن، تاكلن تبجن، يمكن حتى من تنامن تبجن.
حوراء: ـ ضحكت و احس روحي ردتلي.
باسم: ـ اي هيج من البداية اضحكي شبيج.
شوفي بنيتي من اليوم اني راح اساعدج بكلشي تحتاجيه. هاي فلوس بقيهن يمج مصرف و اذا ما تكفيج بس خابريني اني اجي اجيبلج اي شي تحتاجيه كولي و لا تستحين مني ابد. الله شاهد ما اتعاجز منج ابد لو اشتهيتي جكليته نص الليل بس خابريني تجيج لفراشج.
حوراء: ـ الله يخليك الي يارب.
باسم: ـ و يخليج الي حبيبتي.
حوراء: ـ مشاعر غريبة بداخلي اول مرة اجرب هالشعور عندي اخ يحبني و مهتم بية احس ضاع كل الكلام بقيت بحضنه صافنة و دموعي تنزل وحدها.
باسم: ـ اكول حورية.
حوراء: ـ ها عيون حورية.
باسم: ـ ههه الله شنو هالغزل و الرومانسيات.
حوراء: ـ هههه كول يروحي.
باسم: ـ اريد رقمج. يعني بربج اخوج و ماعندي رقمج وين صايرة هاي.
حوراء: ـ ههههه تدلل يابة سجل يله.
باسم: ـ سجلته.
حوراء: ـ بله اشوف شنو راح تكتب عليه.
باسم: ـ هههه اميرتي.
حوراء: ـ روح اميرتك انت.
باسم: ـ والله لو ادري هيج راح اشبع غزل و رومانسية جان حاجيتج من زمان و طز باليسمع
حوراء: ـ ههههه فدوة.
باسم: ـ يلا بنيتي اروح اني محتاجة شي.
حوراء: ـ اريد سلامتك يروحي. انتبه على نفسك.
باسم: ـ الله يسلمج عمري.
حوراء: ـ الله يخليك الي يارب.
طلع و اني صافنة حسيت الي صار كله حلم فزيت على صوت تلفوني بس رقم جاوبته اجاني صوت باسم گال افتحي الباب رحت فتحتها عبالي نسه شي جابلي علاكة حلويات.
باسم: ـ اخذي هذني اكليهن من نسهر نحجي سوة بالليل.
حوراء: ـ هههههه اي ماشي.
باسم: ـ اي والله لا تبقين تتمضحكين ما شبعت منج.
حوراء: ـ ولا اني والله.
باسم: ـ يلا بنيتي ادخلي جوة كل يوم راح اجيج لحدما تملين مني.
حوراء: ـ يروحي هلا بيك.
راح و دخلت جوة خلصتها صفنات كلش جنت مرتاحة حجيت لبيبي و خالة كلشي صار.
رحنا صلينا و سوينا عشه جنت كلش تعبانة اكلت شوية و گمت حتى انام شفت تلفوني يدك بس رقم جاوبته اجاني صوت بعمري ما توقعت راح اسمعه بعد...
ــــــــــــــــــــــــــــــــــــــــــ
مسائكم ورد وعافية
اعتذر عن التأخير بس مريضة كلش والله وگوة اكتب
متابعة ممتعة ولا تنسون تصوتون على البارتات اذا حبيتوا القصة