اقرب من القريب

بارت 2

مسائكم عافية وفرح سعادة

هل كانت كل الطرق تؤدي إليك، أم أنني كنت أجعلها كذلك؟
ـــــــــــــــــــــــــــــــــــــــــــــــــــــــــــــــ
حوراء: ـ مثل كل يوم كعدت الصبح صليت ونزلت اجهز الاكل حتى ابوية واخواني ياكلون ويطلعون للدوام جان يوم بارد كلش و احس نفسي تعبانه بداية افلاونزا عندي
جهزت كلشي واني سارحة بغير عالم كل شوية يجي الولد الي شفته البارحة ببالي
جان كلش ضعيف ملابسه بسيطة طوله متوسط ملامحه هادئة اسمر عيونه سود واللي مزود جاذبيته لحيته الي محددة وجهة
فزيت ع صوت ابوي
ـ شني اليوم ما ناكل صار ساعة اصيح عليج
ـ لا لا بابا هسة جهزت كلشي بس اصبلك جاي
(كلت بيني وبين نفسي شنو هاي شكد صارلي افكر بالولد شعلية بيه اني يربي)
صبيت جاي لابوية و رحت كعدت اخواني وصبيتلهم جاي كعدنا نتريك اكتفيت بس بالجاي لان بلاعيمي كلش مأذيتني

كملنا اكل كل واحد راح لدوامه امي نايمة عزلت المطبخ البيت نظيف مابيه شي البارحة منظفته شغلت الغسالة غسلت كل الملابس اللي بالسلة رتبت غرف اخواني
طبعا بيتنا جبير امي خلت لكل واحد غرفة اختي جانت تنام بغرفتي بس من صارت بثالث متوسط اخذت غرفة وحدها وبقت بيها
خبز عدنا بالمجمدة مال البارحة واني مريضة ماعجنت اخذت علاج و رحت نمت

عباس :-
صار الظهر واني ع نفس الحالة اشتغل وبالي مو يم شغلي ولا اعرف اركز بشي
طبعا احنا عدنا محل زغير نشتغل بالادوات المنزلية وغراض المطبخ واغلب الغراض كزاز واني ممركز يمكن كسرت اربع او خمس قطع اليوم

ابو عباس :- شبيك ابني شجاك اليوم كسرتلي نص الغراض
اذا تحس نفسك تعبان ارجع للبيت يابوية

عباس:- كلش انحرجت اول مرة يصير بية هيج بحياتي ما كاسر حاجة ودائماً مركز بشغلي . بس اااخ من گلبي انسحل من اول نظرة

صحيت من صفنتي ع صوت ابوية
ابو عباس:- ابني شبيك صار ساعة احجي وياك شبيك ماتكلي وين بالك

عباس:- اعذرني حجي والله مالي خلك اليوم احس نفسي تعبان
ابو عباس:- جا بوية روح للبيت تغدة وارتاح ناملك شوية اهم شي صحتك ابني يروحنلك فدوة الغراض

عباس :- يابه شلون اروح وانت تبقى وحدك هنا بدون غدة وانت هم تعبان

ابو عباس :- لا بوية اني مابية شي انت ارتاح ولا تخلي بالك

عباس :- ماشي يابه جا راح ادزلك غدة بيد علاوي وخليه يمك بينما ارتاحلي فد ساعتين اجيكم

ابو عباس :- ماشي بوية بالك ع نفسك واذا شفت نفسك ما تكدر تجي خليك بالبيت

عباس :- ماشي يابه . يلا في امان الله
ابو عباس :-  الله وياك ابني

عباس :- طلعت من المحل طاير مثل السجين اللي فرجوا عنه. اريد اسأل امي ع البنية لازم اعرف عنها شي . ع الاقل اسمها عمرها
امشي وافكر بيها اني واكف ع الشارع وكفتلي تكسي صعدت وياه حتى ما سألته ع الكروة بس كتله العنوان ورجعت لصفتني طول الطريق افكر بأي طريقة اسأل امي عنها وكلش جنت متوتر
السايق كام يسولف وشافني بالي مو يمه وسكت وصلت للبيت نزلت نسيت موبايلي ع الكشن صاح علية الولد انطاني الموبايل تذكرت اني ما انطيته كروة. ولا اصلا سألته شكد تطلب كروة
سألته وانطيته الكروة واعتذرت منه هو تقبل الاعتذار وگلي عسى اللي ماخذ فكرك خير
ابتسمتله وصفنت بوجهه شوية وكتله
عباس:- كله خير عمي كله خير ورحت دخلت للبيت
يمة حجية وينج يمة
ام عباس :- ها وليدي هنا بغرفتكم اني تعال
عباس :- الله يساعدج يمة
ام عباس :- هلا بيك يانور عيني
عباس :- جنت متوتر ما اعرف شحجي
اكلج يمة .
استغفرالله يربي شون اسألها خاف تفهمني غلط
ام عباس :- كول يمة ليش هيج وجهك تعبان شبيك وليدي
عباس :- يمة عمي ابو حوراء عنده بنات
ام عباس :- اي يمة عنده 2 بس ليش
عباس :- ها لا هيج بس اسأل
ام عباس :- كول يمة شنو ببالك مو عوايدك تسأل ع بنات الناس . سامع شي
عباس :- لا يمة ماكو شي بس سألت سؤال
ام عباس :- يلا لعد كوم بدل خل اصبلك غدة
عباس :- ماشي يمة ودزي غدة بيد علاوي لابوية لان ما اكدر ارجع للمحل اريد انام شوية والعصر عندي شغلة ضرورية