كل الأصوات في مسمعي إلا صوتك"بنص كلبي" ❤️
ـــــــــــــــــــــــــــــــــــــــــــــ
حوراء: ـ بعد كلامي وية خالتي منى البارحة حسيت ربي يجازيني على صبري رجعت احلم من جديد افكر شلون اقره وشلون ابلش وشكد اطلع معدل ووين انقبل ووووو هواي شغلات طول الوقت بقيت افكر بيهن اشتغل واني كلش فرحانه صرت احسب يوم يوم حتى ارجع ادرس
مرت الايام متشابهة مابيها شي جديد الى ان فديوم كاعدة بالمطبخ اغسل تمن للغدة امي صاحتني
ـ تعالي هاي زينب تتصل اكعدي احجي وياها شوية وسديه.
ـ تمام.
اخذته منها وحجيت وية زينب كلشي تسألني اجاوب بأختصار حسب توصيات امي شوية وترخصت كالت امي تصيحني سديته و ردت ارجع للمطبخ امي صاحتني
ـ تعالي حوراء
ـ ها ماما!
ـ راح اوصي ابوج يجيبلج تلفون وخط انزلج برامج تتواصلين وية زينب وهم تخلصين من الملل لان اغلب وقتج معندج شي تسويه
ـ ماشي براحتج ماما. اللي تشوفيه مناسب سويه
ـ ماشي اني اثق بيج. لاتحجين وية ناس ماتعرفيهم ابد. هسة راح اخابر ابوج واگله
ـ ماشي ماما
حوراء: ـ يلا همزين ع الاقل اتونس شوية العب لعبة لو اسوي شي بيه خير
للضهر ابوية جابلي جهاز تغدينا وكملنا طبعا اني كلشي ما اعرف بالاجهزة لان ممستخدمتهن قبل العصر من طلع ابوية امي علمتني عليه نصبتلي برنامج واتس اب وخلتلي ارقامهم كلهم ومن بين الارقام رقم خالتي منى كلش فرحت.
طلبت منها انزل لعبة عليه كالت بكيفج شنو تريدين تنزلين نزلي العاب بس لاتنزلين لعبة بيها محادثات واتصالات
كتلها لا لعبة عادية مو على النت. وافقت وخليت الجهاز على الشحن ونزلت اجهز العشه بكل حماس حتى اكمل كلشي واروح احجي ويه خالتي
كملت كلشي وكلت لامي اريد احجي ويه خالتي منى وافقت لان تعرفنا صديقات وتأمن بيها كلش
رحت اتصلت عليها ما ردت راسلتها على الواتس اب كتلها اني حوراء كيفت كتلها هذا جهازي ورقمي بقينا نحجي حجي عادي ورة شوية اتصلت علية مكالمة فديو سلمت على بيبي حجينا شوية ورحت نمت لان ما اريد تاخذني النومة لو اتكاسل عن شغلي وامي تاخذ الجهاز مني.
عباس: ـ بديت بالشغل الجديد والحمدلله نجحت المكتبة وكل مرة نروح نتسوك نجيب شغلات اكثر كدرت ارجع نص فلوسي الي جنت جامعهن والشغل كلش زين
فديوم بالليل كاعدين ورة العشه اتصل عليه سجاد بعد السلام گلي ليش ماترجع لدوامك بالكلية؟
عباس: ـ ضحكت وگتله منو يقبلني بعد هاي السنة راحت علية
سجاد: ـ عندي واسطة اني اخليك ترجع بس وافق شبيك
عباس: ـ والله ما ادري ممفكر بهالموضوع ابد
سجاد: ـ خاب شبيك انت مرحلة ثالثة اسويلك واسطة داوم السنة الجاية والوراها وتخلص بالكت تلكه شغل
عباس: ـ الله كريم خليني افكر وابلغ الاهل واردلك جواب.
سديته منه وحجيت لاهلي وافقوا وامي كلش فرحت كامت تهلهل
مرت الايام بين الشغل والتفكير شلون را ارجع لدوامي وشغلي؟ راح ادبرها؟ ياترى اكو تعيين؟ راح اشتغل بشهادتي لو بس تعب؟
شغلي الحمدالله ماشي ورة شهرين اخذت المحل الي بصفي وفتحته ع المكتبة صارن ٣ محلات كمت مرتين بالاسبوع اروح لبغداد اتسوك وكلشي ماشي
بس كل هاي الفترة الي مرت البنية الي شفتها ببيت ابو حوراء ما فاركت فكري ابد. كلما اريد انساها اتحلم بيها الا ان فديوم كاعد بالمكتبة واتصل علية ابو حوراء گلي اخذ مي بارد ووديه لهذا المكان وانطاني العنوان.
شفتها هناك وعقلي طار.
نفسها ونفس عيونها الحزينة الخايفة اجت تركض باتجاهي وتتعثر بثوبها الطويل وهي مستمرة بالركض الا ان انضربت بكتفي رادت توكع بس لزمتها صارت عيني بعينها بقيت صافن
أنت تقرأ
اقرب من القريب
Romance...🦋... " وإن ضاقت بك أرجاء الأرض ، فلا تنسى أن تدعو رب السماء لأن الله كفيل بمحي أحزانك وشفاء جراحك🌸
