إدّمانْ مِنْ نَوعْ آخرْ

الجزء السادس

الجزء السادس

ملاك
طلعت من الغرفة متجهة للمطبخ ومريت من الصالة بس ما رفعت راسي ولا باوعت للي موجودين هناك.... دخلت المطبخ ولكيت ماما تطبخ وكفت يمهة وكلت

ملاك: ها ماما صحتيني؟

تمارة: اي تعاي اريد احجي وياج

اتقربت يمهة... باوعتلي بنظرة ما عرفت افسرهة ابد... حزن...ضوجة... قهر... بس المهم جانت نظرة سلبية حضنتهة واني اكول

ملاك: لتخافين ماما اني احبكم واريد ابقى يمكم مستحيل اروح وي رجال غريب يسموه ابوية

حضنتني الهة وكأنو راح اطير من ايدهة وباست راسي وهي تكول

تمارة: الله يحفظج الي حبيبتي

ابتسمت وكلت بفرح

ملاك: اساعدج

هزت راسهة وكملت طبخ ساعدتهة شوية وصبينة الغدة وضليت ادز ندى تودي للسفرة وي حسن ومهند لاني ما اريد اشوفة..... كلهم راحوا ياكلون وماما صاحتني بس ما قبلت اروح

رجعت للغرفة مددت ولزمت التلفون لكيت كومة مكالمات من حسين احس رجفة سرت بكل جسمي من شفت شي يخصة.... قويت نفسي ورجعت اتصلت ثانية ما طول و رد علية صاح

الو كيكتي شلونج

غمضت عيني واني اسمع صوتة اتذكرت كلشي بلحضة وحدة غلقت الخط بوجهة خليت ايدي على راسي ومددت رجع اتصل مرة وثنين بالثالثة رديت اريد اشوفة وين يوصل.....

الو شتريد؟

اريدج

اتنفست بقوة اقوي نفسي ورجعت كلت

شتريد مني بعد كل الي سويتة؟

والله مجنت واعي وما بيدي شي كيكة وانتِ تعرفين شكد اعزج ومستحيل أذيج

بس انت اذيتني ما بي فايدة هالحجي

بكلشي عاقبيني كيكة بس لا تبتعدين عني لا تروحين وي ابوج

صفنت على كلامة شبي هذا منو كالة راح اروح وي ابوية بس احسة استفزني لمن ديحاول يأمرني كلت خلي اضوجة اكثر

اروح وغصب عنك همينة مو بكيفك امشي اني فهمت...... ابتعد عني رجائاً

تعصب وشتمني فشر علية.... لسانة كلش صاير ميستحي.......... غلقت الخط بوجهة وطفيت التلفون حتى ميتصل.... وحطيت راسي ونمت

مادري شگد مر وقت وكعدت ع الصياح برى طفرت اركض طلعت من الغرفة ولكيت حسين واكف يصيح بنصهم وبابا لازم الي يسموه ابوية لان يريد يهد على حسين يضربة.....

خفت بالبداية لان احس الموقف مرعب بس لمن تذكرت اذيتة الي مشيت للصالة وكفت كدامة وكلت بصوت عالي

ملاك: شعندك اجيت؟

حسين بعصبية: شوفي لج اذا تطلعين من هالبيت رجلج اكسرهة وابو الحسنين