قد تظن ان طريقك واضح و تعلم اين و كيف و متى تحقق هدفك،، لكنك نسيت ان هناك قدر قد يعيدك الى نقطة الصفر،، لتعلم انك لا بد ان تعاني لتحققه. 💜💜
دخلنا السوق و بقينا نلف و نفتش مشينا المحلات بتاعت الهدوم(الملابس) و اشتريت م كتير يعني بس يقعدوني لمدة اسبوع لحدي م امشي اشتري باقي مستلزماتي هناك،، اشتريت شنطتين وحده بتتشال ف اليد ووحده كبيره،، و عندي شنطة ظهر،، بعديها مشينا سوبر ماركت اشتريت snacks (اكل خفيف) بسكويت و كده لانه الرحله حتكون طويله،، و ركبنا ركشه و رجعنا البيت،، الساعه كانت 1 صلينا الظهر و قعدنا كده جات لارا داخله كانت عند الجيران ( عندنا جيران اتنين بس بنعرفهم 😂 وحده اسمها سعاد و د النوع بتاع القطيعه و الردحي و بت فلانه عرسوها و بت هنايه طلقوها و كده و بتكون حايمه الحله كلها عندها اربعه اولاد نسبة لاني انطوائيه م بعرفهم هم بعرفوني اسماََ بس و بقولوا اني مفتريه عشان م بتونس و كده [م شرط الزول اذا هادئ او انطوائي يكون مفتري او مترفع انه يتكلم مع الناس احتمال شايل ف قلبه لدرجة انه م قادر يستقبل زيادة كلام او ممكن يكون خجول م بعرف يفتح موضوع و ف احتمالات كتيره دايماََ احسنوا الظن] ... التانيه اسمها نعمات عندها بتين اسيل و فاطمه ظريفات بجونا و بنجيهم بس علاقتهم معاي م خالص مصاحبين لارا اكتر). سلمت علينا ووريتها حاجاتي و كده و قعدنا نتكلم عن الاسعار الخرافيه ف السوق 🚶♂️، قلت ليهم انا ماشه اشوف اذا رسلوا لي ناس الجامعه مفروض يحددوا لي موعد السفر متين و حنبدا دراسه متين، قالوا لي اي امشي ماما قالت انه هي زاتها تعبانه و داخله ترتاح و لارا ماشه تأكل ياسين،، دخلت و فتحت الابتوب لقيت ايميل منهم انه حاسافر يوم 17/8 و الليله كان 15/8 يعني بعد يومين لانه الدراسه بدت عندهم و انا حأنزل بعد اسبوع من بداية العام الدراسي،، شفت و فتحت الايميلات التانيه كان مفروض بكره يعملوا لي انترفيو فتحت قوقل قريت و عرفت حافَقول شنو و رتبت كلامي. ختيت تلفوني ف الشاحن اصلاََ م عندي فيه اي شي😂،، و رقدت نمت.......
الصباح صحيت و الانترفيو بدري مفروض تكون.. لبست لي لبسه زابطه و صلحت طرحتي و فتحت الابتوب و قفلت بابا الغرفه و بقوا يسالوا فيني و انا بجاوب عليهم و حاولت امرق كل الثقه الفيني،شكروني و اتمنوا انه اكون دايماََ كده و اكون عندي ثقه بنفسي و انه حكون عندي انترفيو تانيه لمن اجي.. و قفلنا ع كده.
ختيت الهدوم الشايلاها معاي برا و رتبت و مرقت حاجاتي و بابا جا و قعدوا يتونسوا معاي كتييير و نصائح اكترر ووو اليوم مشى....
مر اليومين مفروض امشي المطار الساعه ١٠،، صحيت و اتسوكت صليت دعيت قريت قران و مرقت شربنا الشاي و اتونسنا كتير بالجد حاشتاق ليهم💞،،و لعب مع ياسين و اتعاورت معه جنس عواره جونا جيرانا الاتنين قعدوا معاي عاوزين يودعوني و كده ،، قالوا لي هسه كان قعدتي ماله و قريتي هنا زيك زي الناس 😏 غايته عاد انت ي بت اميره بتحبي القصص، قلت ليهم ههههه ايي 🐸💔، و بقوا يتونسوا و م خلوا مرا ف الحله حايمه م قطعوا فيها،، جبت بنبري و قعدت عاد ف زول م بحب الشمارات؟، و عملت ليهم قهوه (د برضو بعملها مع الاندومي و كده ست بيت شاطره) جبتها ليهم ساده يعني القهوه و الصينية خالتو سعاد قالت لي لا لا نحن م بندورها كده ختي فحم و جيبي البخور جبت فحمايه وولعت فيها النار و ختينا البخور،، و هاك ي ونسه😂،، كان يوم حلوو شديد اول مره اقعد معاهم كده،، الساعه كانت ٣ دخلت الغرفه مفروض استف شنطي لميت كل الملابس الححتاجها و الاسبورتات و كده ف الشنطه الكبيره و الsnacks و الحاجات الصغيره و الميكب ف الشنطه الصغيره البشيلوها ف اليد،، و الشنطه بتاعتي حقة الظهر ختيت فيها الجواز و الاوراق و القروش ،،بابا جا و قعد معاي و بقى يوصيني و يقول لي اضربي لناس الداخليه يجيبوا ليك الدكتور لو حصل ليك اي شي و م تصاحبي ناس م كويسين و ارفعي راسنا انت بتنا و نحن بنثق بيك و اداني قروش قال لي عندي صحبي اول م تصلي المطار ححولها لبك بالدولار و كلام من هذا القبيل،، و الزمن ايضاََ مر لحدي م جات الساعه ١٠💃،، احييي كمية حماس فيني اكتر من اغاني طاسو،، لبست بنطلون اسود تونكه تحت الركبه رماديه فيها نقط صغيره بالزهري الفاتتتح (لبسي كله رمادي و اسود و ممكن اشكل معاهم الوان بس لازم يكون في ي رمادي ي اسود🕸️🍂) و لبست طرحه بلون النقط الفي البلوزه كويت شعري لانه ناشف م متذكره اخر مره كويته متين،، بقى شكله رااهههيببب🤩، لبست تحت الطرحه شارب رمادي(البتاع البلبسوا الناس المحجبين تحت الطرحه)،، و لارا عملت لي ميكب خفيف كده و لبست اسبورت رمادي فيه خطوط بالزهري بالجنبه،، و كده جهزت مشوا معاي ماما و بابا ودعت لارا و قعدت ابكييي لانه اول مره افارقهم و اكون مسؤوله من نففسي 😔، و مرقنا و ركبنا امجاد ووصلنا المطار، الطياره بتقوم الساعه ١٢ وصلوني المطار و بابا قال لي م تنسي تحولي القروش و ودعوني 😭😭يخخ ماف احن من الاهل على الزول حيفرقوا معاااي شددددديد😭😭 ،،و دخلت و عملت الاجراءات ووزنت الشنط بقيت شايله شنطة اليد و الضهر،، انتطرت ف صالة الانتظار،، حامشي دبي من دبي لي لندن مره واحده،، و سفره طويله طوول غايته بس استغفر الله.،، ركبنا الطياره و وصلنا لي دبي و من ثم اقلعنا الى لندن،، ووصلت اخيرا💃💃.......
بداية ام نهاية، حسُنه ام سيئه لا احد يدري م الذي يخبئه له القدر، توكل ع الله و اعلم ان بعد كل هذه العثرات ستصل الى م تريد. 💜💜💜🍂
(انا م عارفه هل الروايه كويسه او لا بس المهم تعجبكم و بلييز ادوني ارائكم عشان اتقدم).
