_ليان م داير كلام كتير انا بكره د تجي فاهمه و لا لا!!
=ي ابوي لكن انت افهمني.
_عايني نحن كلامنا كان واضح اضربوا لي مره واحده حترجعي السودان.
=طيب ي ابوي ع الاقل م بكره خليني امتحن امتحاني الواحد د،، عليك الله ي ابوي عليك الله يعني م ممكن الخمسه سنين تروح ساي😭.
_يومين بس عندك مسافة م امجد يخلص الاجراءات يومين بس ي ليان و الا اقسم بالله تاني انا لا ابوك لا بعرفك،، و برضو م سامحتك لمن ترجعي بوريك انا.
=طيب ي بابا انا بوعدك يومين و اجي 😭 الله يخليك لي.
قعدت ف اقرب بنش ف الشارع و بكيت بأقوى م عندي😭😭... المصائب كلها بتجيني ورا بعض طيب حلمي حلمي الضيعت فيه خمسه سنين من عمري يروح ساي😭... ي عسجد اعمل شنو و الله كرهت حياتي عاوزه اموت عاوزه انتحر.. يعني عاوزه ارفع راس امي و ابوي القى اني نزلته ليهم زياده... فجأه عسجد فتحت سوره من القران بتقول(و اصبر لحكم ربك فانك باعيننا)... بقيت ساكته و بعاين ليها و تاني بكيت لانه انا سخطت ع حكم ربنا لانه انا كنت مؤمنه و بصبر لاي شي بجيبوا لي ربنا بس هسه قعدت اقول ليه و ليه،،، 😭😭.... قلت لعسحد عاوزه امشي البيت خليني براي.. قالت لي طيب اوصلك و امشي قلت ليها طيب..
ركبنا تاكسي و مشينا... وصلت الداخليه عمو البواب قال لي عسحد مالها عيانه؟ قالت ليه لا لا كويسه بس عشان الامتحان.. انت كنت وين الليله ي عمو؟ قال ليها والله ضربوا لي من البيت زوجتي عيانه... اهاا طيب سلامتها.. الله يسلمك..... طلعتني وودعتني وووصتني و الكلامات الكتيره د..... بقيت قاعده براي و اكيد الافكار م حتلقى فرصه انسب من د عشان تبدا تشتغل فيني... بقيت بفكر هل مؤتمن من اول كان بحبني و لا بغش فيني ساي!. لالا لكن شكله كان بحبني لانه ماف زول بعمل الحاجات العملها د كلها الا يكون عنده دافع و دافع حب م كره... لكن ماف زول بحب بخاطر بالبحبه.. لكن ي ليان احتمال كلامه صح... طيب عمار و عسحد كانوا عارفين؟ عمار م صديقه شديد بكون وراهو معناها عسجد زاتها معاهن ف الموضوع د.... م اظن لانه هي وقفت معاي ف الحاجات الصعبه كلها..... اااااا بقيت بكورك اسكتي خلاص اسكتي و بضرب ف راسي ف محاوله مني انه اوقف الافكار الفي راسي😭😭و قعدت ابكي احتجت لماما بس هي حتكون زعلانه مني.. م عندي زول كرهاَت اليوم الكان عندي حلم فيه... مسكت نوتي و قعدت اكتب و ببكي... انتهيت حسيت بالراحه حبه... جسمي برجف.. عشان من الصباح م اكلت شي... قبل م اكل شغلت قران ف السماعه سورة البقره. 💜، اكلت جبنه و رجعت بقيت قاعده ف سريري.. (لمن يجينا ابتلاء من ربنا بنزعل بنسخط.. بنقول ليه ربنا عمل لينا كده.. بس لمن يجينا خير م بنفرح و نشكر ربنا الا ناس قليلين... نحن لو شفنا القدر او عرفناه حنختار الاختاره لينا ربنا اكيد و بلا منازع... الزول م يفقد الامل طوالي لا يقوم ع حيله بعد يقع و يجيب ورقه و قلم و يكتب فيها الخطوات الحيعملها عشان يحقق الفي راسه مهما كان بسيط يدعي ربنا كتيير... و بكده حيلقى روحه ماشي ف الطريق الصح و بب طمئنينه كمان)... قلت لي روحي ي ليان انت م بتنهزمي و م حتنهزمي اقفلي صفحه اسمها حب تجربه و انتهت اي حاجه صعبه حتكون بس حتقدري... لو م التجربه م كنت حتتعلمي... بكره حتمشي للجامعه و تطالبي بانه يمتحنوك نسبه لظروف حصلت ليك... و بعد م ارجع السودان ححاول بكل م اقدر انه اراضي ناس ماما...
خطط الحاجات الحاعملها و اديت نفسي دفعه امل قويه عشان يكون عتدي سبب اقوم عشانه بكره،،💛
رقدت نمت،، زي الهدنه بتاعت المحارب بعد حرب طويله......
صحيت الصباح بدري و كلي امل بس برضو كلي احباط... لبست بدري و استحميت و لبست و اتكحلت و اتزبط عشان ماف زول يشوفني و انا ضعيفه. انا ليان القويه و طول عمري حاكون قويه. 💪💛..... مشيت الجامعه و استاذنت منهم وافقوا لي عشان عارفين انه انا طالبه مميزه و اولة الدفعه.. كل الدكاتره حنسوا لي المدير و ف النهايه وافق قال لي بكره حنمتحنك... قلت ليه تمام و شكرا كتيرر....
مشيت المطعم جات عسجد جاريه علي قالت لي ليان؟؟ انت كويسه؟؟
قلت ليها اي ي بت مالك!.. قالت لي عشان امبارح و كده و هسه شايفاك.... قلت ليها الفات مات م تفتحي لي الموضوع داك تاني.. هسه انا دايره اقابل جاك(سيد المطعم).. مشيت ليه و قلت ليه انه انا حاغادر اكسفورد بكره و راجعه بلدي و حاخلي الشغل و كده و شكرته ع انه اداني شغل لمن كنت محتاجه.... قال لي ولو و ان شاء الله دايما موفقه و اداني مرتب كبير حق اخر شهر اشتغلته... انا لميت قروش كتيره بتخليني انه ابدا مشروعي ف السودان و زياده للقروش الحيدوني ليها لو جيت اولة الدفعه.. و بكده بزبط روحي ف السودان،، مرقت المدير نادى عسحد و حات مارقه و هي مغيره هدومها.. قلت ليها ف شنو؟ قالت لي قال انه مديني اجازه الليله و بكره عشان انت راجعه 💃.. قلت ليه الله الزول د انا بحبه😔💛.. ارح ارح سريع....
مشينا كافيه كده و قعدنا نتونس قالت لي ليان م تدسي زعلك مني انا بعرفك كويس قدام الناس كلها قولي انه انت فرحانه و م فارق معاك بس م قدامي. 😊
قلت ليها انا كويسه ي عسجد م تفتحي الموضوع د و الا بقوم و بخليك.. قالت لي لالا ي بت خلاص اهو سكتت... و بقت تسال فيني حارجع كيف و الشهاده و كده... قلت ليها انه الشهاده ممكن يرسلوها لي اونلاين و امحد حيعمل لي الاجراءات كلها مفروض بس اركب الطياره انا... (ي جبره💃🤣) .....
رجعت الداخليه لميت هدومي كلها ودعت شقتي القضيت فيها ايام حلوه كتييره💛.... مرقت قلت اتمشى لاخر مره مشيت السوبر ماركت اشتريت لناس البيت كلهم حاجات و اشتريت لي انا زاتي و لفيت كده و مرقت بقيت بتمشى ف زي حديقه كده فيها ممرات... و بقيت اتذكر اول يوم جيت فيه هنا و كنت كيف و هسه بقيت كيف و راجعه كيف كنت شافعه و متحمسه للحياة بس هسه راجعه زوله عاقله و ناضجه و عارفه انا دايره شنو قدر م الزول اتألم حيتعلم و حيكون ممتن لكل لحظه اتوجع فيها... بالجد الزمن بجري بطريقه مبالغه...
رجعت تاني الداخليه بعد ودعت مدينة اكسفورد و كل الذكريات الحلوه فيها كنت حامشي السجن لانه الليله محاكمة مؤتمن بس اتراجعت ف اخر لحظه و قلت انه انا حاقفل الصفحه د نهائي.. قعدت اقرا لحدي الساعه 6 بليل قمت صليت المغرب ضرب لي امجد... قال لي بقيتي كيف؟؟ قلت م اضرب ليك طوالي عشان تقعدي مع نفسك و ترجعي ليان القويه تاني😎💪....
("ان بعد العسر يسرا"). 💜
صلوا ع الرسول( صلى الله عليه و سلم).
