قلت ليه امجد انا عندي فكره.. نحن مدام امنا و ابونا عاجزين و م قادرين نحن ليه م نساعدهم و نبقى ليهم سند زي م هم بقوا لينا سند؟... قال لي اه قولي!.... قلت ليه اول شي لازم تبقى قوي و امجد البعرفه بعدين بقول فكرتي د عاوزه عزيمه و ايمان... قال لي طيب اه قولي... قولت ليه وريني عزيمه و ايمان اول🌚.... قعد يضحك قال لي قاعدين ف تلفوني بوريك ليهم بعدين😂... و اخيرا قعد يضحك.... قلت مدام وريتنا ضحكتك الكساره د بقول ليك.... قلت ليه عاين انا لمن كنت ف بريطانيا كنت شغاله زي م عارف و لميت قروش كتيره عشان افاح بيها شركتي و جهزت الخرائط المفروض ابيعها و كده و كنت مخططه انه اشتري لي ارض من هناك و اشتغل و بعدين اجي السودان جاهزه بس للاسف حدس م حدس🙂.... قال لي صحي انا نسيت اسالك 🤦♂️... انت الوداك حتت الناس ديك شنو ي بتي انا عارف و متاكد انك م حتكوني مدمنه لانه انت اصلا طبيعي م نصيحه لكن بالجد الوداك شنو؟؟... قلت ليه بحكي ليك بعدين هسه خلينا ف موضوعنا د..... قال لي حتحكي لي بعد الموضوع د طوالي فاهمه؟؟ قلت ليه حااضرر.... قلت ليه المهم بس كنت ناويه ابيعها هناك لانه كان حتجيب لي قروش كتيره بس الحمدلله اني م بعتها.... ممكن ابيعها بالنت و تجيني القروش بالدولارات هم زي ٩ خرائط لحدي م اشوف ناس الجامعه يرسلوا لي الشهاده حقتي اونلاين.... و بعدين بفتح الشركه و للزمن داك امورنا بتكون ظبطت و انت زاتك حاول تصلح سمعة المستشقى و ديرها زي الناس و امشي شوف الغلط شنو!!....انا لحدي م امورك تتحلى انا المسؤوله من مصروفات البيت!.. قال لي لا طبعاََ ماف كلام زي د انا الراجل هنا كيف تكوني مسؤوله من المصروفات انت؟؟.... دايراني اكون عاطل و انت البنت تتشاقي من هنا ل هنا؟؟ قلت ليه امجد كدي استكين!! انا م قلت ليك ابقى عاطل ممكن تشوف ليك شغل تاني اضافه لقروش المستشفى و ربنا كريم بعدين.... قال لي اها طيب و الخرائط د مؤكد حتتباع؟؟...قلت ليه اي مؤكد لانه كان عرضت واحده و الناس كلهم قعدوا يطلبوها..... قال لي خلاص تمام الله كريم.... الله يخليك لي م كنت عارف انا من غيرك حيحصل لي شنو!! لانه المسؤوليه بقت علي كتيره شي ابوي و شي امي و شي انت الانا هسه مفروض اكون بقوي فيك م انت البتقوي فيني(الاولاد عندهم انه اذا شكوا لي اختهم او اي انثى بعرفوها معناها هم م رجال!!.. الفهم الرجعي انه البنت هي المفروض تبكي هي المفروض تكون ضعيفه.. و حتى اذا شافوا راجل بيبكي معناها هو م راجل!! دقيقه؟ نحن م كلنا بشر؟ الاحاسيس و المشاعر العند البت و القلب العندها هو نفس العند الراجل... بس الرجال بطبيعتهم م بحبوت يظهروا الشي د... امجد حكى لي اخته و م قال انا الراجل كيف اسمع كلامها... بالعكس قعد معاها ووافف ع خطتها و كمان م وقفنا ع كده بس... حكى ليها انه هو مهموم ضعيف و هي الوحيده القدرت تساعده و تطمئنه ف نحن كلنا بنات ع اولاد م مفروض نخجل من مشاعرنا نهائي بالعكس نقدرها و نحمد ربنا انه نحن بنشعر و عندنا قلب!!)... قلت ليه امجد م بيناتنا ياخ زي م انت وقفت معاي ووثقت فيني انا اكيد حاقيف معاك و اثق فيك💛.... قال لي اه الموضوع الاول خلص احكي لي الموضوع التاني.... ابتسمت قلت ليه طيب حاحكي ليك ي امجد.... قلت ليه مش كان حكيت ليك عن بنات و قلت ليه ابعد منهم بس..... حكيت ليه الكلام كله لحدي المسج الجاتني من مؤتمن..... رفع لي حواجبه كده و عاين لي 😏.... قال لي مؤتمن د كمان الخلاك تثقي فيه شنو؟ احتمال هو مخطط معاهم!!..قلت ليه لالا ياخ هو م معاهم حتى عسجد قالت لي.... قال لي ااااهااا و كمان بتدافعي عنه😒... قلت ليه امجد ياااخ افصلها م تندمني اني حكيت ليك.... قال لي لينا قعده تانيه اصبري لي هسه انا ماشي اجيب امي و لارا ديل من المستشفى قلت ليه تمام و انت زاتك عندك قعده معاي ي اصلي😏😉......
بقينا قاعدين انا و يس برانا ف البيت الساعه كانت ٣ عصر.... مشيت فتحت الشنط الماشفتها بعيوني من م جيت اتذكرت الشنطه الاتسرقت خفت تكون د الفيها المستندات بموت😭... فتحتهم التلاته لقيت و الحمدلله انه الاتسرقت د الكان فيها هدوم المشيت بيها من السودان... فتحت الخرائط شفتهم كده و بعدينك رتبت هدومي ف الدولاب و ختيت لي كل زول هديته ف غرفته لمن وصلت لغرفة بابا مشيت فتحت درجه و دخلتها و عيوني بقت تدمع براها😭.... هسه لو كان في كن قال لي عان بتي بقت تجيب هدايه كمان و شغلها لي😭.... قلت متاكده انه بابا حقوم و يجي يشوفها 😭.... ضربت لناس امجد سالتهم منه قال لي ماف جديد الحمدلله بس..... قفلت منه مشيت عاوزه اشوف موضوع الشهاده يس جاني قال لي خالتو.... قلت ليه عيون خالتو قال لي ماما وجدو و حبوبه وين؟؟ 😭.....قلت ليه مشوا يجيبوا ليك حلاوه و جايين م تخاف تعال اعمل ليك شي تاكله.... قال لي حادر..... مشينا و اكلته و ختيته جنبي ف الاوضه اديته تلفوني يلعب بيه... و بقيت بتراسل مع ناس الجامعه قالوا لي الشهادات طلعت بس الاونلاين لسه.... الا بعد اسبوع.....
الايام مرت و بابا تم ٣ شهور و م كن حاسين بيها حتى و انا الحمدلله بعت الخرائط كلها و بقيت قادره اصرف ع البيت و اسس للشركه و امجد اوضاع المستشفى اتصلحت بس م شديد انا مسؤوله من حاجات البيت و امجد من المستشفى..... و اجرت لي زي بيت صغير كده حاعمله الشركه كبدايه خفيفه بابا لسه زي م هو ف الغيبوبه..... اهلنا المفروض يساعدونا بجونا مره ف الشهر و م بسالونا حتى اذا محتاجين حاجه بس نحن ف غنى عن مساعداتهم.... بقيت جاده شديد و رجعت منعزله تاني و شخصيتي الاكتسبتها ديك و فرحت بيها للاسف الدنيا خلتني اخسرها و م اتمناها تاني..... بديت اشتغل و ارسم و مشغوله شديد عسجد عرست و للاسف مقدرت احضر عرسها حضرت الحنه بس و ف العرس لبست و جهزت بس بابا حصل ليه مضاعفات و مشيت المستشفى..... ماما بقت ذبلانه شديد و نادر م تضحك و حتى لو ضحكت بتكون بتجاملنا.... املنا ف ربنا كبببيير انه بابا حقوم بالسلامه.....مؤتمن حاولت انساهو و انسى مواقفه معاي كلها بس م قدرت ف بقيت بشغل نفسي كتيررر عسجد قالت لي كل م يزورهو بسأل مني و بطلب انه يشوفني م كلموهو الا بعد شهر من رجعتي زعلل شديدددد و بقى م بقبل يشوفهم.... من اول مرتب لي مشيت اشتريت ليه ناس ماما كلهم هدايه عشان اغير ليهم الجو بابا بخت ليه حقته ف دولابه و بقى كده كل م اشتري هديه بخت لي بابا و جواي امل كبير انه حيصحى (انا عند ظن العبد بي).....
بعد سنه و تلاته شهور....
ادهم سريع اديني كل الملفات حقت الخرائط البعناها عشان داخله اجتماع و رد ع الاتصالات كلها م تقعد تتسيب كده...حاضر انسه ليان.... دخلت الاجتماع لابسه بدله باللون الكبدي و توب ابيض طرحه كبديه و شارب ابيض هيلز كبدي..... اول م جيت داخله كلهم قاموا لي و سلموا علي قعدوا و بدينا الاجتماع... انتهى مرقت جاني واحد من الموظفين...
يتبع..
الجزء القبل الاخير
صلوا ع محمد(صلى الله عليه و سلم).
الكومنت م بعضي🌚
