حبها أقرب لقلبي من الوريد

البارت السابع عشر

بالطريق للديره وقف عند المقبره الي فيها صاحب دنيته ومايدور في راسه الا شي واحد ان لو كثرو حولي الاصحاب ماراح القى صاحب مثلك وفعلاً الكل لو يمتلكون اعداد كبيره من الاصحاب بيكون فيه صاحب وحيد هو الي ياخذ مكانة كل هالاصحاب هو الي يوقف معك بكل حلاتك وهذا الي كان يوسف يسويه مع تركي مشى تركي وهو يجلس عند قبر يوسف ونزل على ركبه ومسك التراب بقوه بيده يحاول يتمالك نفسه لان مو سهله عليه فراق صاحبه مو سهل عليه يرجع لديره مايشوفه صعب جداً فراق شخص غالي صعب جداً انك تعرف ان خلاص مراح تشوف هالشخص
تنهد تركي وهو بقلبه نار قام وطلع من المقبره بعد مادعاء لصاحبه وهو يتوجه للعزبه مايبي يروح للبيت وهو بهالحاله ويعور قلب امه عليه دخل الديره وهو يشوف كل شي حوله يذكره بصاحبه كل شي بكل مكان كانو يجلسون فيه توجه للعزبه وهو ينزل ويتوجه للادهم فتح الباب وهو يشوف الادهم يتوجه له مسح على راسه وهو يركب عليه ويمشي لين ابعد عن العزبه وقف وهو يجلس على الصخره وجنبه واقف الادهم
تركي:كل الغالين يبعدون يالادهم بالاول وريد وبعد راكان والحين يوسف لو اتصبر واقول مصير الحي يلتقي بلتقي براكان وبلتقي بوريد اذا ربي كتب بس يوسف كيف التقي فيه الله يرحمك ياصاحبي
رجع وهو يدخل الادهم بمكانه ويكلم حمد
حمد:هلا يابوي اشتقنا
تركي بضحك:مسرع تشتاق
حمد:شنسوي القلب رهيف يشتاق بسرعه
تركي:بكرا وانا عندك الا ماتعرف مكان احط فيه الخيل
حمد:عندك خيل انت
تركي:اي بس مادري وين احطه هو الحين بعزبة ابوي وتعرف كلنا بننقل لرياض صعبه يكون لحاله
حمد:شف عندي مكان حلو
تركي:وين
حمد:بالمزرعه حقتنا كبيره وزينه وابوي يرممها الحين وابي اضيف مكان للخيول وتجيب خيلك عشان نروح لها هي بعيد شوي عن الرياض بس حلو مكانها
تركي:ماابي اكلف عليك
حمد:مافي كلافه اخوان حنا
تركي:بيض الله وجهك اجل كيف نجيبه
حمد:انت ارسل لي لوكيشن العزبه وازهلها اجيب سياره تاخذه من عندك بالليل وهي عندك
تركي:كفو ماتقصر
حمد:كفوك الطيب ماسوينا شي
مشى تركي بعد ماخلص مكالمه وهدا وانبسط ان الادهم بيجي معه لرياض وتوجه لبيت اهله وقف عند البيت وهو ينزل ويشوف سند واقف بالحوش وعنده الهنوف والواضح انه جاي ياخذها معه سلم عليه
تركي:سند وين يارجال
سند:ارحب ياولد العم ماشين لرياض والله
تركي:البقى اجلس تو الناس اجلس بس وبجلس عند اختي من زمان عنها
سند:جاي اخذ حبيبة القلب وارجع للرياض
الهنوف وهي تضم تركي:عادي انتم بتجون لرياض ولا سويت دراما على سند وجلست عندهم ولا شرايك سند اجلس واجي مع تركي
تركي بضحك:الله يخليلك حبيبة القلب بس انت توكل وانا اجيبها بكرا معي
سند:مااقدر اخليها
تركي:اقول توكل بس انا اجيبها لك لاتخاف
الهنوف وهي تمسك يد سند:اي تكفى سند خلاص اجي مع تركي تكفى
سند بعبط وهو يمسك قلبه:اه قلبي كيف اقول لا ياخو راكان مااقدر اختك لعبت بقلبي
الهنوف بحياء وهي تبعد عن يده وتروح لتركي وبعناد:ترا بجلس عاد
سند وهو يسحبها من يد تركي ويبوس يدها:خلاص ياحبيبي اجلسي بس لاتتاخرين قلبي ينتظرك
رمى تركي عليه العقال لان شاف الحياء بوجه اخته وهو يهرب من عندهم ويودعهم ويروح للرياض دخل تركي والهنوف وهو يدور امه
تركي:وين امي ونجد
الهنوف:راحو مع ابوي للسوق يجيبون الناقص
تركي بضحك:وصافي لكم الجو انتي وسند
استحت الهنوف وهي تحذف عليه المخده وتقوم تجيب له قهوه قام تركي وهو يمرها بالمطبخ ويقول لها بينام على بال مايجون امه وابوه راح لغرفته وهو ينام بعد ماتعب اليوم من الادهم وكيف كان مشتاق له وتعبه كثير من جنونه.

بالرياض عند وريد
وهي تقوم اول ماقامت فزت للدريشه تشوف سيارته هنا او لا ارتاحت اول ماشافتها انها مو موجوده دخلت الحمام تتسبح وطلعت على طق الباب دب بقلبها الخوف من سمعت صوت حمد معصب
حمد بعصبيه:وريد قومي اخلصي شوفي الساعه كم افتحي الباب
وريد بخوف:دقايق بلبس وافتح
حمد:يلا اخلصي البسي وانزلي تحت ابيك
لبست بسرعه وهي خايفه وبقوه من حمد واول ماخلصت نزلت تحت وهي تشوفه جالس مع امها يسولف ويضحك وريد وهي تبوس راس امها وتجلس بجنبها
حمد:وش ذا النوم يابنت
وريد:وانت وش ذا الصراخ فجعتني
حمد:احسن طفشت امي وقالت رح نكد على وريد
هناء بضحك:ياكذبك ياحمد انا قلت كذا ولا انت قلت راح تركي وباقي وريد اطفشها
وريد بتوتر وهي سمعت اسمه بس:اشوا راح امس انكتمت داخل
هناء بضحك:اي اصلن استغربت انك ماطلعتي برا
وريد:الا طلعت بس جلست وراء المجلس
حمد:كيف وانا ماقلت لك لاتطلعين بالحوش
وريد بتوتر:ماطلعت عنده بس جلست وراء والله ماافوت الجو عشانكم
ضحك حمد وهناء من توترها وضحكت هي من التوتر وهي تشوفهم يضحكون وكملو يتقهون ويسولف لهم حمد عن امس ووش صار بالشركه والمزرعه
حمد:اي صح وريد قال شعر تركي امس يخي احسه يحب
وريد وهي تسوي انها مو مهتمه:وش كان شعره ومين يحب
حمد:مدري بس شعره حلو
هناء:وش كان شعره
حمد وهو يتذكر:اي صح كتبته هنا عشان اقوله لوريد لاني واعدها
ضحكت وريد وهي تحمد ربها ان حمد كان حافظه عشان ماتموت من الفضول
حمد:يقول الشاعر تركي بن عبدالرحمن
"هي الوحيده الي قدرت تدخل هالقلب دون استأذن
اشهد بالله ان قلبي مشرع لحبها كل الابواب
وان قلبي مانساها لو يمر عليه سنين واعوام
يقولون انساها وشف لك غيرها ابقول محال
اي والله محال والفين محال يكون القلب لغيرها مجال.
وريد:الله عليه ماشاءالله صدق شاعر
هناء:لا واضح ان الي يحبها كان يحبها من الصغر يارب يكتب لهم نصيب مع بعض
توترت وريد لانها متاكده هي المقصوده بس فيه شك بسيط بداخلها ان وين يحبها للحين ومحد دخل حياته وهو بهالجمال وتوترت من دعوات انها ان الله يكتب لهم نصيب معبعض كملت قهوتها وهي تسمع سوالف امها  وحمد وهي بالها مو معهم تكذب لو تقول ان ماتحس بشعور تجاهه بس ماراح تكبر هالشعور لين تتاكد اذا صدق يحبها او لا

بالديره بعد ماقام ونزل تحت شاف ابوه امه وخواته جالسين سلم على امه ونجد ويسولف معهم ويتقهوى
عبدالرحمن وهو يعطي تركي ظرف فيه فلوس:تركي ابوي هذي الفلوس كمل فيها الييت وادفع الباقي
تركي:ابشر يعني تبيني اجهز البيت كله
عبدالرحمن:اي يابوي احسن عشان نجي لرياض وكل شي جاهز
نوريه:اي يابوي انت سو كل شي ذوقك حلو
تركي:ابشرو مايصير خاطركم الا طيب
نجد:تكفى يبه بروح مع تركي اساعده تكفى
عبدالرحمن:بكيف تركي بياخذك ولا
نجد:تركي بروح معكم يكفي بتاخذ معك الهنوف
تركي:خلاص اخذك بس بشرط صوتك مااسمعه وماتدخلين بختياراتي الا بغرفتك
نجد:اي اي بس خلني اروح وبعدين نتفاهم
ضحكت الهنوف وهي تقوم مع نجد تكمل الاغراض الباقيه عشان اذا مشو لرياض كل شي جاهز

⭕️نزلت لكم البارت هذا لان تاخرت عليكم بس انشغلت بالجدول والجامعه عطوني رايكم فيه وتوقعاتكم وش راح يصير🤍