حبها أقرب لقلبي من الوريد

البارت الثامن عشر

بباريس
بعد ماخلصو من دزني لاند وهو مالعبو كثير ولا طلعو طاقتهم بس المشاعر الي جتهم بحزة المطر تكفيهم رجعو البيت وبعد ماكل واحد راح لمكانه جمان دخلت غرفتها تكلم امها ووريد وطبعاً كل وحده تخبي عن الثانيه شي وريد تخبي عنها تركي وهي تخبي عنها راكان وزواجها هو شي كبير انهم يخبون على بعض شي لان علاقة جمان ووريد كبير وماقد خبو عن بعضهم شي بس الاقدار شائت ان كل وحده تحتفظ بسرها بعد ماكان كل وحده تحتفظ بسر الثانيه وراكان مثل الشي بس تركي للان مايخبي عن راكان شي حتى راكان مايخبي بس الاقدار شائت انه يخبي عن حافظ اسراره هذا السر الي تعبه وارهقه
راكان وهو متمدد على الكنب جاه اتصال من رقم مجهول
راكان:الو مين معي
المجهول:راكان بن عبدالرحمن
راكان وهو يعدل جلسته:اي نعم مين معي
المجهول:مو مهم مين معك المهم وش ابي فيك
قام راكان وطلع برا من شاف جمان نزلت المطبخ ومايبي جمان تخاف او تتوتر من شي وهو ماصدق انها تهدا
راكان:وش الي تبي
المجهول بنبره مستفزه:اسمع اخوك تركي غالي عليك صح وحبيبته وريد اخت زوجتك كلهم غالين اكيد
راكان بعصبيه:وش تبي توصله بالضبط
المجهول:تخلي اخوك تركي يبعد عن التجاره ولا والله لااخليه يندم وصدقني انا اذا بغيت الشي سويته واي صح مثل مايبكي بالمقابر على صاحبه اخليه يبكي بالشوارع على حبيبته والله
راكان بصوت عالي:ياحقير وش غايتك انت فهمني تركي ماتقربه ولا والله بيصير شي مايعجبك والله
المجهول بضحكه مستفزه:تهددني انت انا كلامي وقلته تقنع اخوك يبعد عن التجاره تفهم ولا لا وماتجيب له طاري تفهم
راكان:واذا ماابعد وش بتسوي مسوي رجال فوق راسي وانت ماتسوى ظفر من تركي
المجهول:والله لااحرق قلبه على وريد لااخلي غيره ياخذها والله
راكان بعصبيه:انت مو رجال لاتقرب الحريم وخلنا نتفاهم اطلع بوجهي
المجهول:صدقني ياراكان ان طلعت بوجهك راح تندم لا تتحداني وعلمي وجاك ونفذه مااشاورك انا امرك تفهم
كان بيتكلم راكان وهو يسكر بوجهه ورمى راكان الجوال بعصبيه وصراخ:يارب لاتكسر قلب تركي يارب والله ينكسر قلبي يارب رمى كل شي قدامه طلعت جمان من صوت صراخه وهي تشوفه جالس على الارض وماسك شعره ووجه منقلب باللون الاحمر جلست جنبه ومسكت كتفه
جمان بخوف:راكان ايش فيك
ناظر لها وهو يهز راسه ويتمتم بس مافهمت عليه بشي بس الواضح انه معصب ومو بوعيه طلع راكان وقامت جمان وراه وقف وهو يأشر لها  ويصرخ بصوت عالي ارعبها راكان:ارجعي للبيت ياجمان
خافت جمان منه وبالاصح عليه لان مو بوعيه مشى راكان وهو مايدري وين يروح من القهر الي داخله ومعروف ان اشين شي قهر الرجال والرسول قاله في حديث ويتعوذ به من قهر الرجال مشى راكان ووقف عند مكان يعتبر ممشى جلس وهو يحس انه مخنوق ولا هو قادر يتنفس وكل خوفه على اخوه يخاف ان اخوه يجرحه شي يخاف على اخوه اكثر من نفسه لان تركي عنده غير جلس وهو يحاول يلقط انفاسه بس مو قادر ابد لانه مخنوق وبقوه من كل شي حرفياً جلس وقت طويل بدون اي حركه وكان الي  يمر و يشوفه يوضح عليه انع انسان طاقته صفر وماكان منه ردات فعل بس كان جالس وواضح عليه الارهاق والخوف الي حتى عيونه بانت فيهم

بالديره
بعد ماخلص من الغداء  قرر يمشي بس ابوه رفض وقاله تعب عليك خلك هنا الليله وتمشون بكرا بعد الغداء ووافق وطلع مع ابوه يعزلون البقاله لانهم بيبعونها وبعد ماخلص على العصر رجع للبيت وابوه راح لمجلس الديره دخل واستغرب ان  البيت هدوء دخل الصاله وهو ينادي على امه
نجد:تعال بالمطبخ
راح تركي للمطبخ وهو يشوف نجد جالسه فوق الدولاب ولابسه السماعات
تركي:وين امي
نجد:راحت للجيران تتقهرى عندهم
تركي:والهنوف وينها
نجد:تكلم حبيب القلب
تركي بضحك:وانتي وش تسوين
نجد:مثل ماانت شايف على هالجوال لين نلقى حبيب القلب
ضحك تركي وهو يحذف الجوال على نجد ويقول لها ردي وحطي سبيكر وهو كان يسوي له قهوه ردت نجد على غيث وهي تحطه سبيكر
غيث:ياحقير وين انت مامشيت للحين
تركي:يهلا بغيث لا ياحيوان مامشيت بكرا امشي ابوي رفض امشي اليوم
غيث:اي اسمع ركبنا المطبخ وخلصنا والحين بنركب الغرفه بس مدري وين غرفتك
تركي:ياحبيبي ياغيث ماتقصر خلاص بكرا بنجي انا وخواتي ونكمل عشان كل وحده تختار غرفتها
غيث وهو يحاول مايبين لتركي اي شي بخصوص انه شاف اخته وان دخلت قلبه لو يدري تركي يمكن يذبحه
غيث:انت مو تقول عندي اخت وحده
تركي:لا عندي ثنتين الله يخليهم لي
غيث:امين الله يخليهم لك يلا تبي شي
تركي:سلامتك يابوي
خلص مكالمه وعدلت جلستها نجد شافها تركي كيف جلست وضحك
تركي:يلا فيه حش وش بسرعه
نجد بضحك:يخي رفع ضغطي صاحبك هذا احسه مسوي فاهم
تركي بضحك:بالعكس طيب ولا يحب التفاخر والفشخره وهذي الامور لو تعرفين وش عنده كان قلتي لو انا بمكانه كل الناس درت عني بس هو بسيط وصوته ماشاءالله بس
نجد بفضول:وش عنده
تركي:تدرين ان عنده شركات كثيره عقار وتاجير سيارات وابوه من التجار الكبار ومع ذالك مايربطه بأهله كثير يعني نادر يروح لهم
نجد:ليش يعني بينهم مشكله
تركي:مدري الله يصلح الحال بس قومي جهزي باقي الاغراض عشان نمشي بكرا
نجد:تركي يخي اشتقت لراكان الوصخ
تركي:والله وانا اشتقت له وكثير انشاءالله يرجع قريب
نجد:انشاءالله
دخلت عليهم الهنوف وهي تشوف تركي عند الفرن ونجد فوق الدولاب جالسه وقفت على الباب وهي تناظر لهم وتقول
الهنوف:ترا عبدالله وزوجته بيجون بعد شوي
تركي:زين حمدالله كنت شايل هم مين يجلس عند امي اذا رحنا
نجد:ماعليك امي تدور على الجيران تودعهم
تركي:زين امشو نتقهوى يلا
اخذو القهوه وجلسو بالحوش يتقهون ويعلمهم تركي عن البيت وش الي قريب منه..

عند العزبه
كان واقف عبدالرحمن وهو يناظر للعمال الي جاين ياخذون الخيل والاغراض من خيام وكان عنده بعارين واخذهم معهم للرياض وبعد ماخلصو قعد يناظر للمكان
عبدالرحمن:والله مادري كيف اروح وترك هالمكان لاكن شنسوي هذا القدر كاتبه هالديره هي الي ولدت فيها وتزوجت فيها وجبت عيالي فيها والله انها تعز علي كثير يالله انك تجعل الخيره بحياتي يالله وحياة عيالي
مشى عبدالرحمن ورجع للبيت هو صدق اختار انه يسكن بالرياض لاكن الديره عنده غير المكان الي طول عمره عايش فيه فا طبيعي بيضيق على فراقه

بالرياض
عند وريد وهي تسلم على ابوها الي رجع من الدمام وكانت الافكار تاخذها وتوديها بالمعنى الادق كان طول الوقت تفكيرها بتركي كيف شكله وكيف طوله متناسق وكيف عيونه حلوين وكيف اشعاره حلوين بس الي محيرها اكثر من كل شي هو يحبها للحين ويبيها او لا هو القلب ميال ويمكن يميل لشخص غير شخصه الاول لاكن تركي ماكان بقلبه الا وريد هي الي بقلبه بس
وريد:اقول يبه متى تخلص المزرعه
فيصل:باقي فيها بس شوي وتخلص يعني على الاسبوع الجاي وهي خالصه انشاء الله
وريد:حلو يعني بتعزم اهل ابو عبدالله فيها اذا جو
فيصل:انشاءالله