حبها أقرب لقلبي من الوريد

البارت الثالث

طلع تركي وهو يركض ليوسف الي ماباقي شي ويدخل الدوره العسكريه لانه مايحب الدراسه ووصل تركي عند العزبه حقت ابو يوسف وطلع له طلال وهو يسلم طلال:ارحب ياتركي وين الناس ماعاد نشوفك
تركي :البقى ياعم والله كنت لاهي بالدراسه والحمدالله نقول جت على مانتمنى
طلال:حمدالله حمدالله بشر وقل انقبلت طب تكفى
تركي وهو يضحك:اي حمدالله ابشرك اني انقبلت طب والشهر الجاي ابدا دراسه
طلال:وهو يضم تركي كفو كفو ياخو راكان هذا العشم فيك بابوي
يوسف وهو يشهق من وراء:حلفتك بالله ياتركي انك صادق
تركي:بسم الله خرشتني يارجال اي اي ياحبيب اخوك انقبلت حمدالله
يوسف وهو يضحك لانه عارف وش سبب رغبة تركي بالطب ويعرف ان لو ماصار الي يبيه بينهار ضم تركي وهو يضرب على ظهره:كفو ياخو راكان كفو
تركي:كفوك الطيب والله ودي اخذك معي لاني مقدر بدون صاحب دربي
يوسف:لاتضن ماودي اروح معك بس تعرف مابقى على الدوره العسكريه شي
تركي:الله يعين ويوفقك ياحبيبي
يوسف: امين يارب وياك وهو يغمز له
ضحك تركي وهو فهم قصده ان كل الي قاعد يصير عشان هالوريد الي ماشافها الا لما كان عمرها ١١سنه
ومشى تركي وهو يردد البيت الي من مشت وريد عنه وهو يردده بيت لسعد بن علوش ويقول(قال انت جالس لحالك تنتظر من قلت انتظر نفسي الي ما اعرف وينها) ونفسه كان يقصد فيها وريد الي كان كل تفكيره فيها كل شي يسويه عشانها بس مايدري وين اراضيها مايدري وش الحياه سوت فيها الي يدري انه بيصير دكتور لاجلها وان حبها باقي فيه يمشي مثل مايمشي الدم بوريده

ببيت اهل العنود
دق الباب وهي تتوجه للباب بتفتحه
العنود:مين
عبدالله وهو يبتسم: لاتقول مين قل حياك ياوجه حبه القلب ومانساه
افتحت الباب و ابتسمت العنود:اي والله حي ذا الوجه الي يحبه القلب من اوله لين اقصاه
ابتسم عبدالله وهو يمسك يدها:اقول العنودي بشاورك بشي قبل اقوله لابوك
العنود:قول ياعيون عنودك
عبدالله:حبيبي هالعيون اقول شرايك نقدم الزواج ونخليه الاسبوع الجاي مثل مانتي عارفه اخواني انقبلو بالرياض وبيمشون ولازم اقدمه عشانهم
ابتسمت بخجل وهي تنزل راسه بالارض وتقول :مثل ماتبي
ضحك وهو يبوس يدها ويروح وراحت العنود وهي من كثر الخجل الي فيها مو عارفه شتسوي وصارت تركض لامها عشان تقول لها ان العرس بيقدمونه
عند عبدالله طلع لمجلس الديره وهو يدور على ابو العنود وشافه جالس عند ابوه وتقدم وهو يجلس عند ابوه قال عبدالله:هاه يبه بشر قلت لعمي ضحك ابو العنود محمد وهو يضحك:اي اي ياعمي قالي والزواج انشاءالله الخميس الجاي والله يوفقكم ياولدي
ابتسم عبدالله وهو يقول امين وقام وهو حاس ان الارض مو شايلته من الفرحه واخيراً بيجتمع بحبيبة سنينه واخيراً بيجتمع بالعنود راح يركض لتركي الي بالبقاله ودخل عبدالله البقالة وهو يقول حياك الله ياخو العريس يوم الخميس بيرتبط قلبي بقلب العنود واخيراً ياتركي
تركي وهو يبتسم:حمدالله الي ربي كتبكم البعض ومافرقتكم السنين والظروف جعل ربي يوفقك يالعضيد
عبدالله وهو يحضن تركي:اه ياخو راكان حمدالله صدق الي قال (لو حبك يهد الحيل نذر لاهد حيلي واحبك)
ضحك تركي وهو يقول الله الله عليك ياعبدالله الحب لعب فيك ياخوك حمدالله اجتمعتو ولا انهد لك حيل
عبدالله :اي والله حمدالله يلا بروح اشوف الاغراض الناقصه
تركي وهو يهز راسه:زين استودعتك الله
طلع عبدالله من عند تركي الي من طلع عبدالله وهو سرحان وكل تفكيره بالايام الجايه ويتخيل لو هو مكان عبدالله كيف بيكون شعوره ضحك من تفكيره وهو يقول(اه ياباب قلبي وقفله ومزلاجه ياوريد)
اذن الظهر وهو يقفل البقالة ويتوجه للمسجد وبعد ماخلص صلاة طلع للبيت واول مادخل لقى نجد جالسه بالحوش تركي:اخت تركي وين امي
نجد:ياخو راكان امي طلعت مع هنيفه للسوق
تركي:غريبه نجد ماراحت للسوق
نجد:والله مالي خلق اليوم اروح مكان بجلس بالبيت
تركي وهو يضحك:افا وش مضيق خلق نجد العذيه تبين نروح للبقاله
نجد وهي تضحك:اه منك ياتركي جبتها على الجرح
تركي وهو يضحك:وش سر حبك للبقالة امشي امشي قبل يجي راكان ويشغلنا
دخل راكان: بالله ياخو راكان انا اشغلك والله لاغير اروح معكم
تركي: لا بالله مايشغلني اخو تركي عن شي تروح معنا على خشمي
ضحك راكان:عليه الشحم يلا قومو بنروح للبقاله بعدها بنروح بوريكم شي بشتريه انشاءالله
نجد: وش بتشتري
راكان:مفاجاة قومو بس
قامت نجد تلبس وراح تركي للسياره وهو يشغلها وركب راكان وقعدو ينتظرون نجد لان قالت لهم بسوي باقي الاغراض الي قالت لها امها وتلبس وتجي
لف راكان لتركي الي سرحان: اقول ياخو راكان وين رحت
تركي ينزل راسه على الدركسون:مدري ياراكان مدري ياخوك كل ماكبرت كل ماكبر حبها كل ماقلت خلاص بعيد عنك هي خلاص متدري وين ارضها من سماها احس انها قريبه مني احسها اقرب من كل الي حولي تعبت والله ياخوك تعبت
راكان وهو يمسك كتفه:تدري ان القلب ماتقدر تملكه وان القلب اذا لقى دياره ماتقدر ترده عنها واذا ربي كاتب لكم عمر مع بعض بتكون من نصيبك لو كانت بمكان وانت بمكان ومصير الحي يتلقى ومصيرك اذا كان مع وريد بتكون لك
ابتسم تركي وهو يهز راسه:صدقت ياخو تركي وانقول جعل الي اخرج يونس من بطن الحوت جعله يكتب وريد من نصيب والتقي فيها
راكان:امين امين
طلعت نجد وركبت: هاه شباب يلا نروح للبقاله وجبت معي قهوه عشان نروح للعزبه نتقهوى
لف لها راكان؛تقرين افكاري انتي انا قايل بنروح للعزبه بعد مانرجع من البقاله
نجد:امم اكيد المفاجاة بالعزبه صح
ضحك راكان:اي اي صح بس صبي لي قهوه
نجد وهي تلف لتركي:اخو راكان مايبي قهوه
تركي؛الا يبي قهوه وفيه احد يرفض قهوه من يد نجد
راكان:يعع وتسبدي ماله طعم ذي القهوه
تركي وهو يضرب كتفه:اقول فك نجد من شرك والله كل شي تسويه حلو
نجد:اي وتركي صادق يا حبيب اختك وهي تبوس مع خده وضرب راسها راكان وهو يضحك وجلست وراء وقالت تركي شغل لنا شي نسمعه تكفى
تركي:طيب يلا
وشغل تركي على اغنيه كانت لابو نوره يقول فيها مرت سنه مرت سنه وانا انتظر ضحك تركي وهو يقول بينه وبين نفسه:لاوالله يابو نوره مرت سنين وانا انتظر منها خبر

بمكان بالرياض ببيت ابو حمد
كانت جالسه بالحوش ومعها دفترها وترسم جاء جلس عندها ابوها فيصل:اقول وريد ابوي ماجاء قبولك بالجامعه
وريد وهي تترك الي بيدها وتلف لابوها:والله يابوي مادري ماشفت بس بشوف الحين واقولك ودخلت عشان تشوف القبول حق الجامعه ولقت التؤام جالسين بالصاله وهي تقعد قالت جمان:اقول وريد ماودك نطلع نغير جو وقسم طفشت من هالجلسه وامي له اسبوع عند جدتي بالدمام هي وحمد وانت بس بغرفتك ولا ترسمين وانا مقابله وجه متعب ضحك متعب وهو يترك العب ويضحك:ليه وش فيه وجه متعب والله هذا زينه المشكله انك توأمي يعني فينا من بعض
وريد وهي تضحك:لا عاد يا متعب مافيه شبه بينكم انت وجمان ابد ماكنكم تؤام وابشري ياجمان نطلع اليوم اذا ابوي وافق يودينا متعب
متعب :تم بس على حسابكم
وريد وهي تشوف القبول جاها بتخصص التصميم الداخلي والي هي حاطته رغبتها الاولى لان كانت تحب التصميم والاثاث وتحب الرسم وتضحك وتقول حمدلله حمدالله
متعب: شفيك
جمان:بنت وريد اشفيك ليش تبكين
وريد وهي تمسح دموعها:امشو امشو معي لابوي واعلمك
طلعو للحوش وكان ابوها جالس ويشتغل بالابتوب ضحكت وهي تناظر لابوها المندمج ووقفت فوق الطاوله وهي تقول:ابو حمد ممكن تنتبه لي
فيصل وهو يضحك:عيون فيصل لك سمي
ابوي الغالي تؤامنا الحلو احب ابلغكم ان بنتكم وريد انقبلت بالجامعه بالتخصص الي تبيه تصميم داخلي
ابتسم فيصل وهو يروح يضمها:مبروك يا حبيبة ابوك مبروك
ضحك متعب قال :بهالمناسبه انا عازمكم على العشاء اليوم ومبروك ياوريدي مبروكك
جمان وهي تبكي وتضم وريد: الله اختي الصغيره كبرت اه ببكي لازم نكلم امي نبشرها
ضحكت وريد :وهي تقول لا لاتدقين هي قايله لي بتنام ومقفل جوالها اصلن
ضحك فيصل وهو يناظر لعياله وكيف هم كذا قريبين من بعض ويحمد ربه على الي عطاه راحت وريد لغرفتها وهي تاخذ الورقه الي تحت مخدتها الورقه الي صار لها ١١سنه الورقه الي من استوعبت كلامه فيها وهي غارقه فيه وهي مو قادره تستوعب انه كان يحبها بس كيف وليه يحبها وهي صغيره وهو توه صغير بعدين تقول وين ياوريد يمكن حب مراهقه وهي تاخذ الورقه وتقراها للمره الاخير والي كان مكتوب بالورقه(ادري ياوريدي مراح تفهمين هالكلام لين تكبرين بس الي حاب اقوله لك اني انا يا تركي احبك وان هالكلام الي بكتبه ماراح اكتبه لغيرك بس اوعدك اني بكبر واصير دكتور مثل ماتبين واجي اعلمك ايش معنى اسم وريد وقبل لااعلمك راح اعلمك معناه وانت زوجتي ببيتي الي راح اسويه عشانك وراح تسوين البيت معي احبك ياوريدي يارب لما تكبرين تفهمين ايش معنى كلامي) واخذت نفس وهي تاخذ الورقه وتدخلها بالصندوق الي بالدرج ودخلت الحمام وانتم بكرامه لجل تتسبح وطلعت بعد مالبست وسوت شعرها وهي تشوف ان الجو صار غيم بزياده وتدعي يارب تمطر يارب