اسمي نجود عمري 23 سنة يتيمة الوالدين عايشة مع خويا لكبير ومرتو وولادو وخويا قل مني يقرا فالجامعة وختي لكبيرة متزوجة عندي مرت خويا هذه جامي يكسبها واحد فالدار زين وعاقلة و طيبة وحنية بعد ماتوفاو والديا كانت لينا احن ام تعامل فينا كي ولادها مالغري هي صغيرة غير 35 دايرينها امنا ماشي حتى اختنا وفي نفس الوقت صديقتي الوحيدة، تخطبت من واحد وليد حومتي مانلقاش واحد يحبني كيفو وانا صح نحبو بصح ماشي حب وعشق عقدنا وكلش وجد بصح بعد ما بقا شهر لعرسي طلقت بعد ما فاقلو خويا بلي يزطل ويسكر وهكذا وليت مطلقة قبل الدخول فاتو اليامات وفاتو شهور ،جا خويا قالي وجدي روحك بالجمعة العشية يجو يشوفوك قاتلو سعاد(مرتو) شكون هذو قالها ماشي بعيد غير من البلاصة لفلانية قاتلو واش تعرف عليه انت حتى تقولو ارواح تخطب سقسيت عليه قالها ايه سقسيت عليه بيت الرجال والمال ويسكنو في بلاصة كبيرة ومليحة قاتلو انا نحوس هو واش يخدم واش يدير وليد فامليا قالها انا نقولك بيت الرجال والمال وانتي تقوليلي واش يخدم ووليد فامليا قاتلو لازم تسقسي ماشي كعاد وليد الرجال والمال تمدهالو هكذاك قالها واشبيك ماتفهميش راني نقولك بلاصة مليحة بصح كاينة حاجة قاتلو واشنو قالها مطلق وعندو طفلة قتلو انا ملا مكلاه قالي علاه مكلاه لاه المطلق مايتزوجش ماحقوش يعاود حياتو قاتلو لاه تدي هي المطلق وعندو طفلة ديجا سقسيت انت علواه طلق المراة لولى واقيلا كاش مافيه كاش مابيه قالها ماتفاهموش طلقها قاتلو وهكذا نورمال سير كاينة حاجة علاه حتى يطلقو بلا قالها واش راح يكون هي ماهنتش روحها طلقها راح يقعد يضيع في وقتو معاها قتلو خويا انا مانقبلش بالمطلق قالي حتى انتي مطلقة ماتسنايش واحد عازب يجيك قتلو مانقبلش ونضت خليتو، فاتت هذو اليومين بالرفض القاطع مني واقناع خويا ليا بقينا بالشد والجذب حتى قبلت ، بالخميس دارت سعاد شوية ڨاطو قضا خويا لغدوا الجمعة الصباح فرزنا الحالة كي كملت دوشت اذن الظهر صلينا وجدنا كلش حطيناه على ظهر وبدات سعاد توجد فيا سشورتلي شعري سرحتهولي انا شعري نوار وطويل مكيجتلي سامبل غير فوندوتا مسكرة وحمارة بوردو انا سمرة نميل شوية للخمرية لبست قفطان سامبل فالڨري انا لاطاي تاعي كيما ڨاع لبنات تاع الجيل هذا طولي معقول مانيش قصيرة و شوية هازة صحتي واحيانا نشيان نولي رقيقة كل مرة كيفاه،قعدت انا ومرت خويا الفوق وقعدنا نستناو فيهم حتى يجو قاتلي مرت خويا راح تروحي عليا وتخليني وحدي ضحكت غير يقبلو عليا وساهل قاتلي لاه مايقبلوش عليك الوجه صافي مراية الخدود الشعر لطاي حوتة السر يقطر منك العقالة الحنانة واش راح يخيرو عليك قتلها شكون يشكر لعروس مها ولا فمها كي تفكرت ماما بكيت جات عندي حظنتي قاتلي ياعمري والله انا يماك كون مانخرجكش احلى عروس منا نحرم على راجلي خلاص ماتبكيش يفسد مكياجك راهم قريب يوصلو حنا نهدرو دخل وليدها قالها ماما وصلو وصلو ناضت هبطت تجري وانا نضت نطل شفت غير طوموبيل كحلة مايبانش كعاد البالكو بقيت نستنى ماعرف لاه خفت بقيت رايحة جاية حتى طلعت عندي مرت خويا قتلها شكون جا قاتلي يماه ومرت خوه الصغير قتلها واش رايك قاتلي والله غير عسل عطاك ربي على حساب قلبك قتلها مدام هما ملاح يعني راجل ماشي مليح خاطر جامي شفت وحدة راجلها ودارهم ملاح ديما جهة مليحة وجهة ماشي مليحة والوخدة اذا جهة الراجل لي ماشي مليحة خاطر هو الصح هو لي راح تعيش معاه قاتلي خليتيها ديجا امشي حابين يشوفوك قتلها شوفيني مليحة نعجبهم زعما قاتلي والله جيتي تهبلي هيا برك هبطت انا وياها دخلت هاي جات عروستكم دخلت ناضو عندي في زوج يماه مسكينة حتى نوضتها عروستها كبيرة فالعمر فتحتلي يديها يا الحنانة يا الوردة تبوس فيا بوس تبوس وتعاود حكمتلي وجهي يازينة يا لوريدة الله الله يبارك نشالله تكوني من مكتوبنا شوفي ليلى شحال شابة قاتلها ايه الله يبارك درت عند ليلى هذه سلمت عليها وحظنتتي تقول يعرفوني من 10 سنين قلبي رتاحلهم داروني فالنص بصح حنانة لعجوزة وحدها عقلها طار فيا مابقالهاش تهزني فوق راسها بقات حاكمتلي وجهي تمسلي في شعري وتصلي على النبي حتى حسيت روحي ملكة الجمال تالمو شكرتني بزاف بصح بالي ڨاع مع هذاك لي برا تنحاتلي الرهبة منهم وعجبوني بقات لعجوز وتهدر لكتب ربي راح تعيشي غير معايا انا عندي 5 عرايس وانتي بربي نشالله 6 عرايسي في 5 ساكنين فرد دار بصح كل وحدة بدارها بلي طاج تاعها وحدها انا عايشة وحدي لتحت لكنتي من مكتوبنا تعيشي معايا غير انا وياك انا مانطلب منك والو غير تهنيلي وليدي برك انا مابقاليش قد لي فات حابة نتهنا عليه٫ انا كان عاجبني الحال بصح كي قاتلي 5عرايس هذو كيفاه نعيش معاهم غاشي كبير بزاف عرايس وولاد وحفاد شفت مع سعاد تقول مرت خوه فهمتني قاتلي خايفة كي عدنا في غاشي نورمال ضك توالفي ديجا حنا كل وحدة بدارها بصح كاينة حاجة غير نخلصو شغالانا نهبطو عند لعجوز نسهرو ديما هكذا سكت مالقيت مانقولها تاع صح ماعجبنيش الحال مانقدرش نعيش هكذا والفت نعيش في عايلة صغيرة غير انا ومرت خويا خويا يضل خدام مايروحش من ليل ليل خويا الصغير يضل فالجامعة يقرا ثما يبات ثما قليل وين يروح لدار ولاد خويا في زوج مرة هنا مرة عند جداهم يبقى غير طفل صغير ماعرف كيفاه راح نتأقلم على هذا الغاشي قاتلي علبالي خفتي يصح والله توالفي وتجيك نورمال قاتلي لعجوز ماتخافيش والله نورمال بالعكس تولي تحبي اللمات والسهرات مكانش قد اللمة والجمعة سكت بقينا نهدرو عرفت بلي اسمو نعيم عمرو 35 طلق مرتو خاطر ماتفاهموش بزاف ديما المشاكل وعلى حساب مافهمت هي قبيحة بزاف وطايرة وهو مايحبش المرة طايرة ولي تتحكم فيه استنتجت بلي هو تاع راسو ورايو وبس وعندها وليدها واحد ميت ... جا ولد خويا ماما يعيط عليك بابا راحت خرجت شوية دخلت قاتلي راح نخرج الراجل راح يدخل لاحتلي الخمار على شعري رجعتلي جهة ورا ظهري حكمتني واحد الرهبة منو قلبي عاد يخبط سمعتو قال السلام عليكم نضت وطلعت راسي شفتو اسمر عيينه مارو ملامح وجهو حادة حادة حادة حتى نظراتو حادة الوعارة طير من عينيه وزاد طراس تاع موس تحت عينو على عظمة الخد قدقد خط صغير يبان مافيا حتى وقفتو وشخصيتو تخوف هذا مستحيل نقدرلو هذا تاع رايو وبس مستحيل تحكمي فيه ولا تفرضي رايك عليه واش يقولك تقولي حاضر صينو تعشي مطلقة مكانش معاه اللعب ڨاع كي شفتو هكذا ماعجبنيش ڨاع قريب خرجت في وجهو لابس سروال ليطوال بيض وتريكو بيض وفوقو فاست نوار ومڨود في يدو طفلة صغيرة تكون ف4سنين لابسة روبة تاع جين بالفاست تاعها وبسكات تاع الجين وطالقة شعرها ودايرة سيراتت تاع الجين بيضة عينيها خضر وشعرها كحل تهبل تهبل تبان واقيلا تشبه ليماها ماتشبهش لباباها بصح اذا عاد يماها شابة هكذا لاه طلقها بديت نتوسوس من طلاقو ،شاف معايا جا عندي وقف قدامي عطاني يدو لحت يدو صافحتو كنت حاسبة روحي سمرة بصح قدامو بيضة حليب حتى يدي في يدو بيضة قالي لباس قتلو لباس وانت قالي الحمدالله جبد يدو بقينا واقفين قتلو يماه اقعد قعدنا هو دار بنتو بين رجليه بقات تهدر معاه ماعرف واش بقات تقولو تهدر بالشوية كي بقا يهدر معاها تمعنت فيه شوية ملامحو مالغري حادة بصح جذابة بزاف سورتو هذا لطراس لي على عظمة خدو زاد فيه النص اول مرة نشوف واحد يخرج عليه لطراس تاع موس ماعرف كي جات على عظمة الخد ماعرف كعاد سمر ووجهو متحف ماعرف هو لي شباب كي تمعنت فيه شوية عجبني طلع راسو شاف لقاني نشوف معاه دورت عيني كشغول ضحك جا يهدر معايا قاتلو بنتو papito عطشت قالها اصبري حتى نروحو نضت قتلو ضك نجيبلك ونجي قالي اقعدي برك راهي تتمسخر برك باه تحكمو تسيحو قاتلو لالا عطشت قتلو معليش وزربت خرجت لقيتها فرصة باه نهرب منو دخلت لكوزينة لقيت مرت خويا فالكوزينة قاتلي واش ديري هنا قتلها هاتي هنا الما هاتي لبنتو راح تشرب قاتلي واشنو جابها قتلها ايه باينة متعلقة فيه عطاتي كاس ما ورحت دخلت عندو عطيتلو حكمو قالي تعبتك قتلو معليش قعدت عطاها شربت وحط الكاس دار عندي قالي شوفي يابنت نصارحك من ضك انتي قرري انا مطلق وهذه بنتي انا عايش في دار عايلة كبيرة لعرايس ولولاد ولحفاد واللمات والمعاريض والعشوات عندي بنتي هذه هي مومو العين اللولى وعندي يما هاهي قدامك مومو العين الزاوجة بابا معنديش الله يرحمو انا المراة عندي ماتخدمش برا سما اذا دايرة في بالك تخدمي ديري حسابك من ضك انا المراة عندي ماتلبسش السروال والمكياج وتضل طورس برا انا مرتي تلبس عباية كحلة وعلى راسها خمار كحل مانقبلش لي كولار الخرجة برا والطوريس والزنقة والحوانت مكانش غير معايا نروح عند خوالي وعمومي وخلاتي مكانش ابار دار باباها الفايس والانستغرام والتكنولوجيا هذيك معنديش التخلاط ماعنديش الطيارة والقباحة ردان الهدرة والتشناف ممنوع عندي واهم شي دير بنتي بنتها ويما يماها وتقوم بيهم وتتهلا وتهزهم فوق راسهم انا بحر عليا مهم يما وبنتي تغلط مع يما وبنتي مانهدر معاها مانحاسبها ديراكت دار باباها هو يهدر وانا تقول دارولي حبل فالرقبة تخنقت منو و هدرتو ومن شروطو كنت هذيك اللحظة راح نقول غير اخرج عليا ماني قابلة لا بيك لا بك شروط حمرت حمرت راح نطرطق وزيد يهدر بصوت عالي وبأمر ماعرف هذه هي عقليتو ماعرف لقا راحتو بزاف كي مكاش خويا خاطر مدخلش كعاد مرت خوه قالي نشالله شروطي يساعدوك انتي خمي ورجعيلي بلخبر قبلتي بشروطي اللهم بارك وحاجة ماتخصك عندي ماقبلتيش انا ماجيت انتي ماشفتيتي بقيت ساكتة ومهبطة راسي نلعب بالخاتم في يدي قالي فهمتي يا..واسمك انتي واسمك قاتلو ختو نجود قالي فهمتي نجود بقيت ساكتة باينة على وجهي الرفض وتالمو ماعجبنيش الحال راح نبكي ماتوقعتش يديرلي هكذا حسيتو دايني باه يديرني خديمة ليماه وبنتو هي نورمال والله مافيها والو مستعدة ندير بنتو بنتي ويماه يما والله مانوصلهم بحاجة بصح هو ماهدرش ڨاع عليه ولا علينا جابد روحو كشغول ماشي هو لي راح يتزوج ويعيش معايا وصاني على يماه وبنتو وصاي كأي مربية ولا بونيشة جديدة راح جيه لدار يوصي فيها على يماه وبنتو وزيد اسلوبو فالكلام تالمو صريح بزاف وبارد بزاف مكاش ڨاع ظرافة مافيهش لباقة قالي نجود بقيت مهبطة راسي قاتلو مرت خوه واقيلا خافت منك كي بقيت تعيط قالي نجود شوفي عندي طلعت راشي شفت معاه صح خفتي مني سكت ضحك ماتخافي ماتفهميني غالط والله هذا هو اسلوبي فالكلام نهدر بالصوت العالي وبالصراحة هاه سقسيهم فالدار كيفاه نهدر قاتلي ليلى ايه هذا هو اسلوبو فالكلام ضك توالفيه اذا كتب ربي بيناتكم سكت قالي شوفي نجود خمي مع روحك انا صارحتك هكذا باه ماتبقا حتى حاجة غامضة باه اذا كتب ربي بيناتنا تكوني علبالك بكلش انا اهم شكون تكوني قانعة بشروطي ماعجبوكش شروطي نورمال واحد مايسالك حياتك وانتي حرة كيفاه حابة تعيشيها انا من ضك نقولك عجبتيني وراني قابل بقا عليك انتي واش تقولي نميرو راه عند خوك اذا قبلتي مبروك علينا ماقبلتيش الله يكتبلنا في جهة اخرى اك نجود قتلو اك قالي خلاص ملا انا نخليك على خير وناض وقف نضنا معاه جبد دراهم عطاني دا بنتو وخرج قعدت دخلت مرت خويا قاتلي لعجوز واش رايك قتلها ماعرف حتى نخمم قاتلي انا مانروحش منا حتى نرجعك عروستي بقاو من مورايا حتى مرت خويا معاهم عيط خويا لمرتو ماعرف واش تفاهمو وعيطلي ليا خرجت عندو قالي انا راني قبلت ماعندك ماتخيري عليهم قتلو ماعرف خايفة قالي لاه خايفة قتلو عايلة كبيرة وراهم في غاشي بزاف قالي وامبعد لاه وحوش راح ياكلوك بقا هو ثاني من مروايا حتى قنعني قالي خلاص ملا ضك نقولو قبلنا بالجمعة الفيونصاي تاعك وراح بقيت غير نشوف ماعرف كيفاه طورت الامور في لحظة في بلاصة مانقول لالا قلت ايه سبحان الله المكتوب كي يوصل في لحظة يفرا كلش لابغا انتي رافضة وماكيش حابة في بلاصة ماتقولي لالا تقولي ايه ،دخلت عند العجوز قاتلي قبلتي درتلها براسي اه ناضت تزغرت هي وليلى وسعاد نحات خاتم ذهب من صباعها دارتهولي قاتلي منا لهذاك لوقت الفيونصاي ماتبقاش صبعك بلا خاتم بقيت غير نشوف ماني جايبة خبر لعمري في لحظة طورت لامور ووصلت هنا كنا مخططة حاجة والمكتوب مخطط حاجة عشيت مخطوبة
