فاتت يامات مازادش ڨاع عيط انا غير مع لعجوز تقريبا انا حاكمة الميناج وهي دير لغدا ولعشا تحب دير لمراقي وانا نحكم الاطباق لخرى غير نكمل نقعد غير معاها العرايس لخرين كل ليلة عرضتني وحدة عندها غير عواطف ديجا هذه مانقربهاش ڨاع مام كي تهبط عند العجوز تقعد غير معاها انا راني في شمبرتي فالليل يهبطو ڨاع يسهرو عند العجوز يجيبوها حتى ل1 انا والفت شوية معاهم غير يخلصو نرقد انا والعجوز ولجين هكذا روتيني اليومي،فات شهر على هذا الحال بصح كرهت مليت كعاد مكانش هو صماطلي كلش قلت نروح لدارنا قلت لعجوز داني سلفي لكبير انا وعجوزتي بقاو شوية وراحو وانا قعدت يومين برك خممت مانرجعش قلت لمرت خويا قاتلي ياخاه واشبيك ترجعي في شهرك اصبري مافيها والو حتى يروح لاه غير انتي لي راجلك يخدم ومخليك وراه النسا قاع راهم صابرين لعشية جات العجوز داوني روحت مانيش ڨاع حابة نروح وصلت لدار درت لعشا دخلت عليا عواطف جات سلمت عليا قاتلي واشبيك قتلها واشبيا قاتلي ماكيش مليحة قتلها لا نورمال قاتلي ايه عندك الحق.كيفاه تكوني مليحة وراجلك خلاك في صبحية عرسك سكت قاتلي نجود والله دايرتك كي ختي قتلها تعيش قاتلي ومدام دايرتك كي ختي حابة نقولك هدرة قتلها ايه قولي قاتلي مانيش حابة نوسوسك جيست حابة نولهك قتلو لواه تولهني قاتلي مرت راجلك اللولى قتلها واشبيها قاتلي عسي راجلك منها قتلها لاه زعما قاتلي راني سمعت بلي حابة ترجعلو هيا قاتلي هكذا وانا شطت قتلها منين جبتي الهدرة هذه قاتلي هكذا سمعت راهي تقول هذا اذا ماعيطتلوش و الصراحة هما راهم يحبو بعضاهم نخاف تأثر عليهم مانيش حابة نتوسوس ونهبل وبلاك راهي تكذب تحوس ديرلي الشك قتلها اذا حابة ترجع ترجع على روحها وخرجت خليتها رحت لشمبرة خبطت الباب بقيت ندور اواه راهي تكذب تحوس ديرلي الشك تحوس تفسد علاقتي براجلي ودخل الشك بيناتنا ڨاع حذروني منها رحت غسلت وجهي وخرجت للكوزينة لقيت العجوز قاتلي وين كنتي قتلها هنا برك غسلت وجهي وجيت قعدت معاها على الطابلة قتلها خالتي مرت نعيم منين قاتلي منا برك قتلها علاش طلقو قاتلي ماتفاهموش هي قبيحة بزاف وطايرة وهو مايحبش المراة الطايرة قتلها وكيفاه عاشت معاه 4سنين ڨاع قاتلي كون ماشي انا كون طلقها في عامها انا برك لي نضل نحاول ونلحلح ونروح نجيبها كون ماشي على وجه بنتو والله مايقبل ترجع بصح هي جامي تتربا غير تزيد حتى طلقها قتلها وين يعرفها صاحبتو قاتلي ايه كان معاها غير جابها لدار تفرعنت هي دايرة في بالها ديرو في صبعها كي الخاتم وتقدر تحكم فيه ودير رايها وقلتلها بركاي ماتبعي في راي يماك نعيم ماشي باباك لي ديراتو يماك خاتم في صبعها هذا نعيم تاع رايو وبس انا يماه وكون نقولو موت على جالي يموت مستعد يقتل روحو على جالي بصح باه يدير رايي ولا نحكم فيه مايقبلش نعيم باه تربحيه ديريلو رايو برك تعيشي معاه كيما تحبي مهم مايحبش لي يكسر كلمتو والمعاندة هذا مكان بقيت نخمم صاحبتو سما مزال يحبو بعضاهم ياخوفي اذا هو مزالو يحبها كيفاه ندير لعمري
