بدا يقرب عرسي درت ليماش لشعري درتو فالابيض عطاوني دراهم لاروب رحت حكمت وحدة تفاهمت مع الحفافة جيني لدار دارتلي تنظيف البشرة نقاتلي جسمي خرجت مني نجود جديدة خلاتني نلمع ، وصلت ليلة الحنة تاعي لبست قفطان جات غير عجوزتي وليلى حناولي برك وراحو قالولي هو ثاني عرسو اليوم جينا نحنولك برك ونرجعو خلينا العرس ورانا انتي غدوا كي تجي تلقاينا غير حنا الفاميليا كملت ليلة حنتي جات عندي مرت خويا فهمتني في كلش بالتفصيل هي تهدر وانا مانيش معمرة راسي تالمو مانيش متحمسة لعرسي حتى الخوف مانيش خايفة ،غير حكمت بلاصتي ونخمم في ليلة غدوا كيفاه ندير كيفاه يكون معايا وبعد العرس كيفاه نعيش معاه يعاملني مليح يحن عليا يحبني على حساب الحالة ماشكيتش راح نكون زوجة للواجب وخلاص هذاك ماهو تاع حب ماهو تاع رومانسية ماهو تاع حنية ،طلع صباح دوشت نقيت روحي وقعدت قالولي على ال5 باه يجو سما مزال الحال درنا لغدا تغدينا الحفافة جاتني لدار وجدتني دارتلي كواف طلعلتلي شعري ڨاع الفوق هبطتلي غير سلبات منا ومنا دارتلي تاج صغير غير قريب يوصلو نضت لبست لاروب ذرعيها تاع تيلو وعندها ذيل طويل بالبرنوس تاعها، فاتت ل5 ومزال ماجاوش الساعة روحت ل 6 واش خفت افكار يدو ويجيوبي واقيلا مايجوش واقيلا بطلو واقيلا كاش ماصرا فالطريق بقيت حاطة يدي على قلبي كاش مايصرا والله تصرا بيا حاجة مانيش قادرة نزيد نحمل هدرة ناس ،بقيت نطلب في ربي مايكون والو برك حتى قالو راهم وصلو بقيت نسمع غير فلاصونات برا وصوت البارود حتى لقيت لعجوز دخلت جات سلمت عليا وخرجتني للباب تاع برا دخل هو ماشفتوش ڨاع في وجهو حكمني من ذراعي هز معايا الروبة دالي لطوموييل ركبت ملور غلق عليا الباب وجا ركب معايا واحد السخانة طبت كعاد فالصيف في اوت راهي 6 ومزال الشمس طالة غلق الكارو قالي نحي على راسك مكان حتى واحد هذا وليد خويا دار عندي اهلا مرت عمي لباس قتلو لباس قالو اغلق الكاروات وشعل الكليماتيزور بقيت نمروح على وجهي قالي ضك يشعل الكليماتيزور تبرد الحالة وغير نديمارو افتحي البرنوس علبالي طبتي هو يهدر طبطب الكارو تاع طوموبيل دار لقينا واحد هاز بنتو حتى هي لابسة روب بلونش فتح الباب قالو هاك عمي ماحبتش تقعد معانا هذا ثاني وليد خوه حكمها وغلق الباب قعدها في حجرو تبكي مسحلها دموعها باسها واش بيها بنتي تبكي قاتلو كنت نحوس عليك قالها راني هنا شوفي لعروس دارت شافت معايا بقات غير تشوف قاتلي تهبلي ضحكت قاتلي حتى انا لابسة كيفك قتلها حتى انتي جيتي تهبلي شافت مع باباها قاتلو بصح انا ماشرتليش تاج قالها لاه ماقلتليش علبالك انا مانعرفش قاتلو نسيت بقات تشوف معايا قالها لجين علبالك شكون هذه دارتلو براسها لالا قالها هذه ماما نجود راح تولي ماماك انتي وانتي تولي بنتها بقات ساكتة قالها ماعجبتكش قاتلو لالا عجبتني قالها هيا بوسيها ملا ناضت باستني من خدي وقعدت بيناتنا بقات غير تشوف معايا ومع الروبة تمس فيها قاتلو papati شوف تشبه لساندريلا شاف معايا تقول هذاوين انتبه ليا بقا غير يتمعن فيا قالها هي خير من ساندريلا ودار لوليد خوه هيا امشي واش تستنا شعل طوموبيل وبقا يصوني عليهم باه يفتحولو طريق حتى ديمارينا
