اليوم الفيونصاي تاعي جاتني الحفافة لدار وجدتني لبست كاراكو فالبلو فونصي بالشابو تاعو جيت في شمبرتي الفوق وقاعدة وحدي كي مكانش ولديا سورتو ماما حسيت بالنقص كبير مالغري ڨاع حضرولي وفرحولي بصح حاجة ناقصة كون غير غاب بابا وماغابتش ماما مكانش في من نحمي كتافي دموعي ماحبوش يحبسو مانيش ڨاع فرحانة وزاد كمليا عليا بلي مانيش راضية على هذه الزواج دخلت عليا ختي ومرت خويا لقاوني ذايبة ياخاه عليك واشبيك هكذا غير قالولي واشبيك وليت نبكي بالصوت بقاو معايا غير يفهمو واشبيا دخلو عندي خالاتاي وعماتي عياو سكتنوني كي شافوني ندير هكذاك ولاو يشوفو معايا ويبكو حتى راحت مرت خويا عيطت لخويا دخل عندي الفلوسة تاعنا واشبيك علاه راكي تبكي جا قعد على ركايبو واشبيك فلوسة قتلو توحشت ماما وبابا قالي ولاه انا وسعاد وين رحنا والله نديرلك عرس ماصراش هذو لي دايرين بيك ڨاع نخليهم يغيرو منك هيا فلوسة امسحي دموعك راكي فسدتي مكياجك وليتي زي المهرجة يشوفوك هكذا يديو لعريس ويهربو ممبعد كيفاه نديرلك وكيفاه نقنعهم بلي هذا الغولة راهي شابة غير هي فسدت روحها ضحكت هيا ارواحو مسحولها منا اعدلوها جات الحفافة عاودت سڨمتني شاف مع الساعة قالي مزال نص ساعة باه يوصلو هيا نهبطو نشطحو انا وياك حتى يجو نوضني هبطنا ڨاع التحت حنا فالنص وهما ڨاع دايرين بينا بقا يشطح فيا جات سعاد دخل خويا صغير راكم تشطحو بلا بيا زاد دخل خويا وختي درنا دويرة نشطحو ولولاد فالوسط غير قريب يوصلو طلعت الفوق ،سمعت لاصونات برا ملا وصلو بقيت غير نسمع فالزغاريت لتحت يديا يرجفو خلعت خلاوني وحدي وراحو بقيت نستنا حتى جات ختي ريڨلتني قاتلي ضك يجو شوية سمعتهم طلعو عندي دخلو عليا ماشفت حتى حاجة من لفلاش تاع التليفونات جات لعجوز سلمت عليا هي وليلي وسلمت عليا شحال من وحدة ماعرفتهمش شكون دارولي لافوال لابسولي طالو عطاوني شمع ونوضني كون ماشي حاكميني راني طحت عييت نثبت روحي غير نشوف ماعلباليش ڨاع وين راني هبطوني على الدروج دخلوني لصالو قعدوني على الفوتاي سمعتهم غير بقاو يقولو حنيلها انتي يا لعجوز العريس مايدخلش كشغول استرحت شوية كي مراحش يدخل حناتلي العجوز دارتلي الخاتم حتى خاتمها تاع الشوفة قاتلي احكميها برك عندك قسمنا لاتارت كلينا وقعدت هما بقاو يشطحو ونص قاعد بقيت نشوف هذو ڨاع راح نعيش معاهم انا جات عندي وحدة كبيرة تكون فالربعينات سلمت عليا باركتلي عطاتني الفرح قاتلي انا مرت سلفك لكبير ڨاع عندي 5ولاد 3 ذكورة وهذوك زوج بنات شفتهم يجو قدي زادت جات وحدة كيفكيف فالربعينات براكتلي وعطاتني الفرح قاتلي انا مرت سلفك لي تحت الكبير عندي 4 ولاد زوج ذكورة وهذوك بناتي زوط شفتهم يبانو قل مني غير شوية زاد جات وحدة هازة طفل صغير سلمت عليا باركتلي وعطاتني الفرح قاتلي انا مرت الوسطاني عندي 3 ولاد ذكورة زاد جات وحدة تكون فالثلاثينات لابسة صواري راح يطرطق عليها وشعرها صبغاتو اصفر فاقع سلمت عليا من فوق القلب مابركتليش ڨاع قاتلي انا مرت سلفك قبل صغير المتوفي عندي 3 ولاد هذه برك مارتحتلهاش وقلبي ماغلطش وراحت جات ليلى سلمت عليا قاتلي وانا ليلى تعرفيني وعندي طفلة ضحكت قتلها ايه نعرفك قاتلي مزية جيتي صغيرة قدي نتصاحبو هذو كبار مقدرتش نصاحبهم وهذيك لي سلمت عليك هذاوين عواطف مرت سلفي المتوفي مانتحملوش انا وياها قتلها حتى انا ماحملتهاش قاتلي ملا مزية نتعاونو انا وياك وياربي لقدرنالها راهي واعرة شوية قتلها باينة بقيت غير نسلم عليهم ونتعرف عليهم ياخاه انا راح نعيش ڨاع مع هذو ماشكيتش نوالف
