ملي روحو وانا غير ساكتة مافهمتش كيفاه وصلت هنا مانيش قابلة بصح راني مخطوبة ليه ماعرفتش واش ندير نجي نهدر مع خويا ونبطل نخاف يقولي تتمسخري بينا وعطينا كلمة لرجال قاتلي مرت خويا واشبيك غير تخمي قتلها مانيش قابلة قاتلي لاه ماعجبكش راجل قتلها ماعجبتني حتى حاجة لا راجل لا شروطو لا دارهم قاتلي نورمال شروطو لي قالهم اي واحد يطلبهم قالك البسي المستور ماتخرجيش وحدك ماتخدميش وصاك على بنتو ويماه نورمال وراه الصعيب فالحوايج هذو اما على دارهم راهم قالولك بلي كل واحد بدارو غير فالليل يهبطو يسهرو نورمال مافيها والو حنا كي لا لمات لا جمعات واش درنا بالعكس هكذا خير ماكش قد اللمات والجمعات والسهرة والضحك حنا نضلو وحدنا قريب نكتأبو ونتوحدو اما العجوز والبنت عجوزتك والله غير عسل شفتي مسكنية ماقاتلك خدميني ماقاتلك قومي بيا وصاتك غير على وليدها بنتو طفلة مزالها صغيرة ديرها بنتك وتهلاي فيها تربحي فيها اجر قتلها ماعرف انا نشوف فيها حاجة انتي تشوفي فيها حاجة قاتلي ديري نية وادخلي باه يكملك ربي ويسهلك ماديريش الحيلة ديري معاهم ڨاع نية وتربحيهم ڨاع اما على راجلك واقيلا خفتي منو كيعاد واعر شوية نورمال ڨاع رجال هكذا تدي راجل يخلع ويمنع خير ماطيحي في كاش بهلول حتى الغاشي يولي يعفس عليك كل ماكان راجلك عندو قيمة كل مازادت قيمتك الراجل هو لي يدير القيمة فالمراة وانتي ديري واش قالك راجلك تربحيه وتربحي راحة بالك كل ماسهلتيها تسهل بقيت ساكتة قتلها مانعرف والله خايفة بزاف قاتلي ماتخافي موالو عير توصلي لهيه وتعرفي العقلية ضك يجيك كلش ساهل ونورمال مهم انتي اذا كتب ربي ادخلي لدارك بالنية وادخليها صم بكم اوزني هدرتك اوزني تصرفاتك ماتكثريش الهدرة كون تصيبي اذا ماهدروش معاك ماتهدريش الدصارة ماشي مليحة النظافة ثم النظافة سورتو شمبرتك رجعيها شمبرة ملوك خلي راجلك يلقا راحتو غير فيها نظافتك انتي لازم تنعنعي التبدال والتدواش راجلك كي يدخل عليك يلقاك عروس الضحكة على الوجه الصوت رقيق والهادي صوتك لازم واحد مايعرفو تهدري غير بالشوية اسرارك انتي وراجلك يبقاو داخل الشمبرة توصل بيناتكم للشيطان الرجيم واحد مايسمع مادخلي حتى واحد في مشاكلك ومدام عايشة مع العرايس ونسا سلاف عقلية راجلي جابلي راجلي شرالي راجلي عطاني ممنوع يجيبلك لي يجيبلك ماتقوليش لابغا شافوه ماتستعرفيش ديما أنكري نسا راهم يغيرو ويحسدو حتى على حبة حلوة كي يجيبهالك تروحي تشكيلهم من راجلك يديرلي هكذا وهكذا ممبعد يحڨروك ويجو يفوخو عليك ويقولك راجلي دارلي هكذا ودارلي هكذا وهما راهم غير يكذبو تنوضي تقارني روحك بيهم وتبداي تطلعي وتهبطي وتنوضي عندو انت مادرتليش هكذا ونسا خاوتك خير مني و منا ومنا حتى تخربي دارك وماتزيديش تصدقي نسا اغلبهم راهم كذابات سورتو لي تشكر في راجلها المرأة لي لباس عليهامع راجلها عمرها لا تحكيلك وتقولك بلي راني عايشة لباس كلش تاعها فالسر وهذيك هي الطريقة الناجحة ملا تهلاي اقضي كلش فالكيتمان واحد مايسمع بك
