ملي ديمارينا وهو غير يهدر مع بنتو باينة متعلقة بيه بزاف انا كي قالولي راح تلقاي غير لفامي قلت خير من الغاشي قريب ساعة باه وصلنا ڨارا قدام دار طول عرض فيها 4 ايطاجات الباب فالوسط ويبان باب تاع الڨاراج مفتوح جا عاوني هبطت دخلنا على الباب لقيت الدروج يطلعو الفوق وجهة لادروات كاين باب مغلوق واقيلا تاع الڨراج وجهة لاڨوش باب مفتوح وقيلا راح ندخل هنا خاطر ڨاع واقين على هذا الباب ويصورو قالي هيا منا دخلنا على هذاك الباب ياك قالو زعما لافامي برك والعرس البارح وهذا واشنو الغاشي والغنا الدنيا مسركلة عندهم كاين هول كبير يبان حوش ماشي هول همسلي هاهي شمبرتنا دورت وجهي باباها مارو جاية غير وحدها مكان حتى شمبرة مساميتها رحنا دخلنا الصالو مليان حتى ولات سيركسلاصيو داخل ڨاع مفرش فوتيات انا جابلي ديكور سبيسيال ليا الفوتاي بيض او الروز والورد ابيض لاصق فالحيوط وطابلة بيضة طلعنا وقفنا جابلونا لاترات والجي قسمتها انا وياه كلينا برك تصورنا شوية وراح خرج وانا قعدت جات مرت خويا وختي قعدو معايا بقينا نتفرجو فيهم كيفاه يشطحو عواطف لي مات راجلها لابسة الميني وتشطح قاتلة روحها مقابلتني وتشطح قاتلي ختي واشبيها هذه دير هكذا ياك ماشي ديتيلها راجلها برك قتلها لاه قاتلي شوفي كيفاه جات قدامك وتشطح كشغول تمكر فيك قتلها تمكر فيا انا لاه وين تعرفني شافت عندي قاتلي نقولك هدرة وماتنسيهاش هذه حاذري روحك منها وعسي راجلك منها قتلها واشبيك ياخاه سلفها قاتلي سلفها ماشي خوها يعني نورمال قتلها الله يهديك قاتلي ياالجايحة فيقي مع عمرك انا غير شفتها دير هكذا فهمتها طايرة عسي راجلك منها والمراة مزالها صغيرة وشابة بحجة يتزوجني على جال ولاد خوه تعشي ضرتك قتلها ياخاه واشبيك راه سلفها قاتلي ماتورليش في النسا راني 40 سنة ضروسي طاحو هذا النوع مايعرفش سلفي وخو راجلي ومتزوج هذا النوع من خوها ماترحم حتى واحد المراة هجالة وصغيرة وشابة وواعرة الشيطان تلعبهالو راني وصيتك حاذري روحك منها وممنوع داصريها وديريها صحبتك وتحكيلها اسرارك انتي وراجلك راهي تبقا تنبش وراك حتى تديهولك بقيت ساكتة درت عند مرت خويا حكيتلها قاتلي عنهدها الحق حتى انا ماعجبتنيش وواش وصيتك طبقى سورتو هذه بعدي عليها قد ماتقدري هذو راهم واعرين يجو رطبين وحلوين بصح ضربتهم توصل لعظم تلقايها غير تسقسي على حوالك انتي وراجلك واذا غلطت وسقسات على راجلك وحوالك مع راجلك هذيك اللحظة ديريلها نهار جامي تنساه طيحي عليها السما ياربي وتدي عليه طريحة باه تشهم عليك وتخاف ماتزيدش دور بيك وتسقسي على راجلك خاطر من هنا تبدا تخربلك في دارك وعلاقتك انتي وراجلك قتلها ولاه خلاتهم ڨاع وجات ليه قاتلي هذوك كبار وهذاك واقيلا صغير عليها بقا غير راجلك كي شافتو طلق من قبل يعني تقدر دور بيه وطلقك وتديه بقيت غير ساكتة دخلولي الشك
