حليمة وكناينها الخمسة

#حليمة وكناينها الخمسة
حلقة 8:
في الصباح اليوم التالي
مصطفي اتصل برمضان وقاله علي موافقة نوال
رمضان:عالفطور حليمة البنت وافقت والفضانية أسبوع الجاي ماتقوليش ماقلتلكش
حليمة:قبل ماترفع الفضانية نخطب لعمر قبل
رمضان:ومن هي البنت لقيتيله
حليمة:ايه بنت فاطمة نخطبها توا لأنه عرس اختها اسبوع الجاي
رمضان:ديري رايك مع انه انا نكرهه العيلة هدي
حليمة:انت تكره عيلة فاطمة وأنا نكره عيلة مصطفى نفس الشي
رمضان:باهي وأمتى بتمشي
حليمة:اليوم العشية
رمضان:بس بشرط
حليمة:شن هو الشرط
رمضان:تمشي نفس للبستيه عند مصطفى
حليمة:مستحيل وبعدها شن بتقول عليه فاطمة وبناتها
رمضان:بتمشي فيه او انسي انه تخطبي البنت كنتي فكرتي في الموضوع قبل ماديري شي
حليمة:تمام كل شي إلا هدا نمشي في لتبيه
وفي العشية طلعت من الدار عمتك حليمة عين تبكي وعين تضحك
حليمة:تو انا اليوم حليمة تمشي في الدبش هدا هدي آخرتي
رمضان:تمشي فيه يإما ولي علي وراك نوريك من هي حليمة
حليمة:باهي هيا طالعة
وصلت حليمة لصاحبتها فاطمة أول ماطقت الباب
فاطمة:حليمة والله ماعرفتك
حليمة:ايه انا حليمة
فاطمة:شن ناقص عليك فلوس أو شيء
حليمة:خليها في سرك خليني نخش قبل
فاطمة:باهي أمالا خلينا نقعمزو في الجنان طبعا عمتك فاطمة منقرفة من منظر حليمة كيف بدخلها للحوش
حليمة:أنا اليوم جيت نخطب بنتك صفاء لولدي عمر
فاطمة:والله ياحليمة شن بنقولك الكلام الأخير لبوها
وكملت حليمة هدرزة فوق من النفس من ردة فعل فاطمة كيف استقبلتها في الجنان لكن ياداير يالاقي وروحت وفي الطريق
رمضان:ها شن صار ياحليمة
حليمة:كله منك خليتني مضحكة قدامها
رمضان:مش تعرفي مرة تانية اعرفي كيف تحترمي الناس وعامليهم زي بعضهم المهم شن صار في البنت
حليمة:قالت علي راي بوها
وصلوا للحوش
رمضان:تعال يامحمد نبيك
محمد:نعم
رمضان:الفضانية الأسبوع الجاي والبنت موافقة
محمد:شن بيصير في أمي
رمضان:أمك خليها عليه أنا
محمد:تمام يابوي ربي مايحرمنا منك
وعمتك حليمة:شوي تبكي وشوي تندب علي أيامها وشوي تتحسر عالموقف قدام صاحبتها
رمضان:ياحليمة وينك
حليمة:مسحت دموعها انا هنا
رمضان:عمر غدوا مروح بيحضر الفضانية وبيولي علي طول جيت بنقولك
حليمة:من بكاء ولا فرح ولدي بيرجع وآخيرا بنحكيله علي فاطمة وأنا خطبتله وأكيد بيفرح امالا بوه هدا لمافكرش حتى فيه اه ياولدي عايش في الغربة كيف لماعنده والي
رمضان:توا فكيني وانتي قلبتيها فيلم
Aml Mohalhel
.
.

يتبع