حليمة وكناينها الخمسة

#حليمة وكناينها الخمسة
حلقة 18:
طلعت سالمة وكل الحاضرين وباقي العيلة كل واحد روح للحوش
ومع كل يوم كره حليمة لنوال يزيد
بعد مرور شهرين
جي بشير لرمضان
بشير:اهلين كيف حالك يابوي
رمضان:تمام الحمدلله
بشير:نبيك في موضوع وانا في حاجة
رمضان:احكي شن صار
بشير:أنا يابوي فلست ومعاد عندي شي وعليه ديون فوق راسي والناس توا تبي الفلوس ماعنديش من وين نجيبلهم
رمضان:بيع حوشك وخلص الناس
بشير:أنا جيت بناخد حصتي منك
رمضان:معقولة يابشير بتورثني وأنا عايش
بشير:أنا بحاجة ومستحق للفلوس وأنا قلت نبي حصتي مانبيش اي فلوس
رمضان:ماعنديش حصة للورث سلامتك
بشير:هدا كلامك يابوي مع السلامة أنا لمعتبر روحي من العيلة وجاي نطلب في مساعدتك وقلت مش حيسيبوني نقعد في الشارع وطلع وضرب الباب بقوة
جت حليمة تجري :شن فيه يارمضان خيره
رمضان:الولد يبي حصته من الورثة
حليمة:ورث من
رمضان:حليمة شن تستعبطي شكلك ورثي أنا
حليمة:ان شاء الله خير وشن قلتله
رمضان:قلتله ماعنديش حصة للورث
حليمة:شن درت في الولد
خش رمضان للدار وطلع من الحوش
امشي للسمسار
رمضان:أنا عندي حوش نبي نبيعه
السمسار:فيه عندك صورة ليه
وبالصدفة خش راجل يدور في حوش للبيع
شاف صورة حوش رمضان وعجبه
الراجل:انا نبي حوش نشريه لكن في الوقت الحالي بنسافر بعد سنة بنسكن
رمضان:لو بتشريه انا نقعد فيه لبعد سنة نعطيك ايجار الحوش
الراجل:لا ماصارت ياحاج اقعد في حوشك لعند مانرجع والايجار يقعد عندك
رمضان:بارك الله فيك والله ولد أصل ربي يخليك لعيلتك ويكثر من أمتالك
الراجل:عادي ياعمي مادرت شي اعتبره شريته منك بعد سنة
روح عمك رمضان مطمن حتى باع الحوش بسبب ولده لكن القي الخير قدامه سيب الفلوس في السيارة
حليمة:وين كنت يارمضان
رمضان:تعرفي توا كيف حسيت براحة البال
حليمة:ان شاء الله ديما لكن شن السبب
رمضان:لما يجي وقته تعرفي كل شي
رفع رمضان الفلوس لبشير ولكن عطاه لواد صغير مع الشارع لحتى مايعرفش من لبعته وكتب عليها ورقة:(رزق من شخص لشخص لعند ماوصل فيك اعرف وين تصرفه لو تريد ترجعه دير الخير في كل مضايق واعتني بعائلتك)
عمك رمضان كتبله اعتني بعائلتك لأنه بعد سنة بيقعد في الشارع وصاه لحتى يهتم بيه في يوم هدا
بشير:هه بنعتني بعائلتي قالك هو يوم لنبيه فيهم مالقيت حد وبوي أول واحد قال ماعندي ورثة لكن مش عليه يارمضان نوريك أنا اهو حصلت فلوس توا نمشي نخلص الدين ونتريح
Aml Mohalhel
.
.
.
يتبع ............