حليمة وكناينها الخمسة

#حليمة_وكناينها_الخمسة
حلقة15:
بعد مرور يومين في الصبح
رمضان:ياعمر بعد الفطور نبيك ترفعني لمصطفى
حليمة:وين علي خير
رمضان:ولد عمي وبنمشيله حرام
حليمة:لا مش حرام
عمر:تمام يابوي أنا كملت هيا نطلعوا
رمضان:هيا امالا سلامتك
وصلوا لحوش مصطفى
مصطفى:اهلا برمضان تي وين الغيبة
رمضان:توا ماسلمنا من حليمة
مصطفى:كيف حالك ياعمر
عمر:الحمدلله وأنت ياعمي
مصطفى:الحمدلله مافيش مرواح اليوم لليل تحضرو حتى العشاء
رمضان:من توا بنتعبوا كنتنا
مصطفى:تعبك راحة أنت جيتك خير علينا
رمضان:والله يامصطفى لو عندك بنت تانية خديتها لعمر
مصطفى:بعدها تبي حليمة وين تمشي
رمضان:والله هدي حليمة تبي عرس عمر مع محمد جميع والعرس قريب وقاعدة الدور تستنى العمر التاني
مصطفى:جارنا عنده بنات لو تبي تخطب نكلمهالك
رمضان:علي حليمة شارطة هي لتخطب لعمر علي ذوقها يعني
مصطفى:لو تقعد لحليمة مايعجبها عجب ولاصيام في رجب
رمضان:حليمة توا يعجبها كل شي لما أنت تقول هكي
مصطفى:نستأدن نشوف العيلة
خش مصطفى:نوال يانوال وينك
نوال:نعم يابابا
مصطفى:جي عمك رمضان نبوا حاجة نشربوها والغداء
نوال:باهي تمام شوية بس
وكانت نوال فرحانة بالطير كانت تحساب انه محمد هو لجاي مع رمضان وكنت تخدم بكل حب وسعادة جهزت سفرة الشاي وطقت عالباب وسمعت انه يتكلموا علي عمر يعني انه هو لجي ومحمد عنده عمل اصابت بخيبة أمل ورجعت حزينة وكل النشاط والحيوية ضاع بكلمة وحدة
وانتهى اليوم وروح رمضان وعمر للحوش وعمتك حليمة كانت تستنى فيه علي جمر
رمضان:اهلا حليمة شن ديري مقعمزة هنا
حليمة:نستنى شن درت من مصيبة من وراي أنت كل ماترفع في ولد ماتخلف عليه في خير
رمضان:خيره ماصار شي مشينا تغدينا وتعشينا وروحنا
حليمة:باهي لمصطفى عنده بنت وحدة كمهدا خطبت التانية المرة هدي من خطبت
رمضان:تعرفي ياحليمة شكلك كنتي تقري في أفكاري 😄
حليمة:من هي لخطبتها المرة هدي 😏
رمضان:لا ماخطبت حد بس قلت تقري في أفكاري علي لو عند مصطفى بنت تانية خطبتها
حليمة:على أساس لو كان نخليك تخطبها بنت مصطفى
رمضان:فيه بنت جارهم لىكن أنتي امشي شوفيها لو ماعجبتكش نشوفوا بنت تانية
حليمة:كان هكي طمنتني معناها بنمشي نرقد حتى النوم ماعاد جاني طيرتوه
رمضان:تصبحي علي خير
حليمة:وانت بخير 😴
وفي اليوم التالي طلعت حليمة تخطب لعمر بنت جار مصطفى وعجبتها ولاول مرة تعجبها حاجة وتقول عليها باهية وكملوا فيها وبدات التجهيزات للعرس
Aml Mohalhel
.
.
.
يتبع