الزهر المبارك ومسعود هو هذا الي وقع لا لنوار ولا لياسين تاهو ...ومن اصعبها حرقة خصوصا الى كان سكار ...الالم اشد ولما لا والحرق يعتبر اول الم يليه الم الولادة ...ناضو كلهم وقفو يامنة مشات تجري لعندو وعينيها خارجين نوار ماعرفت باش تبلات ....
يامنة"دارت ايدها على قلبها " : ولدي ...
نوار : ياسيييين
يوسف : ارسول الله...ارسول الله …
ياسين : شش مكاين باس ...
يامنة : دغيا حيد سروال لا يلصق عليك ...سارة جيبي قرعة ما بارد ...
صهيب : اجي لدوش خوي عليك الما قبل متكبر ...
نجود : ياربي سلامة دغيا سير اولدي حيدو لا يلصق عليك مينة طيري جيبي سينيال ديريها ليه حتى يمشي لسبيطار ...دغيا ولدي ماتعطلش...
فؤاد : يلاه دابا نيت...
ياسين : غير تهدنو ماوقع باس "حرقاتو نيت ومكمدها مسكين " ...تهدنو ...انا نحيد هاد سروال بعدا ..."كيعض فشفايفو ...هز سروال من جيهة الحرقة لا تلصق ليه ومشا كيزرب لدوش صهيب لحق عليه دخل حيد سروال وعطاه شورط حتى دقات عليه يامنة دخلات عطاتو قرعة ما بارد خواه على لحرقة باش تبرد ...نوار "غير كتشوف فيه كيفاش ملامحو تبدلات وتزير ومبغاش يبين قدامهم ...مرة مرة كيعض شفايفو ويكمش عينيه ...حتى شد شورط من عند صهيب وحيد لكرافاط الي دعقاتو وحل صدافي القميجة ...بالحريق تقهر ولا غير يحيد حتى جابت ليه يامنة سينيال ووجهها مزير تاهي لان الحرقة لا يستهان بيها ..وعطاتو سينيال دارو عليها كلو ...
يامنة : خليه اولدي متحيدوش ...
جا ايساف هاز كونطاكت فايدو ...
ايساف : يلاه دغيا قبل متولي فدرجة الواعرة ...
داكشي الي كان مشا مع ايساف ومحمد الحبيب هبطو وحتى اسامة معاهم ركب كيجري....خلاوهم وراهم يامنة كانت غاتمشي غير فؤاد حبسها ومخلاهاش تمشي...
دخلات يامنة كتولول ...
يامنة : ياربي ياربي على ولدي ...
يوسف : دات الباس دات الباس ...
يامنة : حرقة خايبة راني شتووو مكمدها وساكت مهدن انا الي كنعرفو لا ضراتو الحاجة والى مرض مكايبينش ...اهى اهى ..
فؤاد "خنزر فيها " : يامنة !!! هادي خطبتو واقيلة اذن الولد راجل لاش البكا ؟
يامنة : حرقة خايبة شفتها كي ولات ليه ...
الياس : وراه الكلينيك غا فدورة مزيان مشاو معاه خوتو دغيا ينقيوها ليه وهاهو هاني ...
فعلا الحرقة صعيبة وخصوصا اتاي طايب كمدها وكمد الالم مبغاش يبين قدامهم وتصرف انه ماشي شي حاجة خصوصا شاف خوفهم عليه وهلعهم اكثرية يامنة ونوار الي وقفو بزوجات بلا ميحسو ...مروان بالخلعة تخبا فالبيت حتى جابو صهيب وطمنو خاف لا يضربوه ...بقاو جالسين كلهم ومارادينش لبال ليها مشات لبيت ودخلات تبكي ...وتمشي وتجي شادا تيليفونها فايدها ...
فؤاد : نوار فين هي ؟
حتى ناض يوسف على وقفتو وسول عليها مينة عاد عرفو بالي فالبيت دق عليها ودخل لقاها كتمشي وتجي وتبكي ...
يوسف : نوار ...شش متخافيش ابنتي موقع باس موقع باس ...
نوار "تمرات فحضنو " : اهى اهى شوف اش وقع نهار خطبتي ابابا اهى ...انا ومينة معندناش زهر معندنااااش اهى ...
يوسف : شش اعوذ بالله من شيطان رجيم اااش هاد الهضرة ...هادشي مكتبو الله ربي الي عالم اش كاين ماعرفتي لگات علينا ماكفس ماعرفتي كتبها عليه حيث عمرو طويل ...هاهو دابا يرجع ونحطو العشا مشا غير ينقيوها ليه لا تولي فدرجة واعرة ويضرب شوكة ويجي نحطو العشا ...
نوار : اهى اهى "كمشات ليه فصدرو وخشات راسها " ...حرقة خايبة هاديك راه اتاي ابابا طايب الي تخوا عليه انا شفتو كيفاش ولا وجهو وتبدل ليه غييير ساكت ...
يوسف : ايهاي هاي هاي غاتخطبتي وليتي عارفاه ...نوضي الله يمسخك غسلي وجهك
يسرى"دخلات " : نوار بنتي اجي خرجي راه كيسولو عليك مسحي دموعك موقع والو بنتي راني شفت الحرقة الى زرب عليها ميكون غير الخير غا ميتعطلش باش متحفرش ليه اللحم وراهم يكونو وصلو حيث كلينيك غير فدورة ...مسحي دموعك احنينة هادشي كيوقع مكاتيب ابنتي ...الحمد لله موقع ما كثر ...
مسحات دموعها ومشات غسلات وجهها عاد دخلات عندهم صالون عيط ليها فؤاد جلسات حداه وعنقها جنبو كيطبطب عليها وتيليفون فايدو كيعيط لايساف يسولو عليه ...
(نصيحة الي تحرق اول اسعاف اولي ديروه هو خويو الما بزااااف وديرو سينيال او خميرة معجونة رطبوها وديروها فوق الحرقة او زيت رومية والملحة هادو كيحبسو الحرقة من بعد كاينة عشبة سميتها "طيرنت "عند العطار دايرة فحال طباشير ليموني غبرة دردريها على الحرقة راها دقة ببطلة حسن من بيافين كتطلق الما هادي كتكمش الحرقة وتنشفها)...
أنت تقرأ
نور الياسين
Randomمنقول هاني وجعت من جدييد له في قصة الي ممكن نقول تابعة لقصة يامنة وممكن تكون لا يعني الى مقريتيش يامنة بلا مترجعي تقرايها باش تفهمي هادي ...ولا ديال عائلة رمسييس القصة الي تسنيتوها شحاااال هادي والي نقول تولدات قصتو وسط القصة ديال واليديه فرض الحضور...
