احببتُ مخدرچية

فأنا أساساً لم اعرف الحب الا بك !

الجزء الثاني ..
بنفس الاسبوع بالتحديد بيوم الاربعاء .. بعد مارجعت من الدوام .. نزلت من السياره برأس الفرع مالت بيتنا لان الوالد راح حاجز سمك شوي مسگوف وجان ح يجيبه ع جيتي حتى نتغده سوه ..
بيتنا مسافة مشي ٧ دقايق تقريبا عن الشارع الرئيسي .. ووقت الظهر والشارع فارغ محد موجود
مشيت مسافة فرع ودخلت بفرع ثانوي لان بيوته هواي واني اخاف امشي بمناطق ترك في حال صار اي موقف لان اني چنت كولش جبانه وخوافه
حسيت واحد يمشي ورايه ويتعمد يشحط برجلي بالكاع علمود اعرف هو موجود .. اني مااهتميت بالبدايه بس من حذري دائما افضل امشي وره الناس ومااحب امشي كدام احد .. خففت بالمشي شويه وكولش تقربت ع جهة البيوت ..
اما هو طبيعي اجه مشى بصفي كأنما أعرفه من زمان ..
اول ما شفت بدلته الزيتونيه بصفي وچان كولش طويل وضخم عن قرب  رفعت راسي وباوعت عليه ( اه ..عززه) كلمتي المشهوره اللي دائما ع لساني وكفت وخليت ايديه ع حلكي ..
هاني (ضحك بصوت عالي ) : شبيج ششفتي بعبع ، اشو اليوم ابوج ذبج ع الشارع وماوصلج للبيت .. گلت اني اكمل الواجب ، احنه شغلنا حماية الوطن
اني من الخوف رحت مشيت سريع ع ركضه خفيفه .. هو ظل ورايه يمشي ع كيفه الى ان دخلت بالفرع الثانوي الوراه وكمت امشي سريع حتى اوصل للبيت .. وصلت لباب البيت التفت ماچان موجود ورايه .. ظليت واكفه دقيقتين بالباب حتى مادگيت الجرس حتى اتأكد اني شفته لو داهلوس .. ضربة شمس يمكن !!
ماكو هاني
بعدين دكيت الجرس وفتحت امي الباب واستقبلتني ورحت لغرفتي مباشره ذبيت جنطتي وظليت ابجي على الچربايه .. اني ليش بهيج وضع .. هذا  تحرش وتخويف ، اني صدك شفته لو هاي الشمس ضربت راسي وكمت اتخيل .. هذا ليش يلحكني لكل مكان .. اني ليش اشوفه بكل مكان
لو اتخيل چان ما شافته جنات بالحديقه .. ولا اللي بالمفرزه جانوا يحجون وياه
هذا بالشرطه مدري الجيش ليش هيج يسوي .. شيريد مني .. ليش هيج ياربي
اخذتلي وقت يله طلعت من ذاك الوضع النفسي .. غسلت وبدلت وفتحت السبلت ونمت ..
اهلي هواي حاولوا يقنعوني ان اجي اكل وياهم سمچ شوي .. وكل محاولاتهم فشلت رغم هم منتظريني حتى جابو  وتعذرت بحجة ان موصين دلفري للمستشفى وماكله ، بس بالحقيقه چانت معدتي تغلي من القهر

ظلمت الغرفه والسبلت مفتوح وجسمي برد شويه بعد ما چان نار .. فتحت شعري الطويل اللي اطرافه مبلله ونمت ع بطني وخليت ايديه جوه وجهي وظليت افكر بيه افكر بيه .. تفكيري جان خوف وقلق وانزعاج .
وبنفس الوقت شعور الرفرفه بمعدتي كلما اتذكره او تجي صورته ببالي مايفارقني ..
ظليت افكر ان لازم مااتصرف بعفويه واخلي حد للموضوع .. لگيت صعوبه ان اگول لامي وابويه ان ليش حجيت بالبدايه .. ويظلون يقلقون ويخافون عليه اكثر منا وهيج .. خفت يرجع ذاك الموقف الظهر مره ثانيه ويمكن يتلازم وي بابا واني مااريد مشاكل وقلق زايد عليهم ..
رحت راسلت صديقتي جنات حتى احجيلها المواقف الصارت وشكوكي .. بداية كلامنا ع الاسنتا بالبدايه
لگيتها دازتلي صور صديقه النه جانت بالكليه متزوجه ومنزله ستوريات صور زواجها .. جانت البنيه گصيره يمكن ١٥٥ سم طولها او هيج .. وزوجها كولش طويل تقريبا فوك ال١٨٥ طوله
وصور جلسة التصوير كولش رومانسيه
واني تذكرته من يمشي بصفي رغم اني طولي ١٦٠سم بس هو چان طويل طويل
رحت أبحث بالغوغل عن الرتب العسكريه وعن لون الازياء حتى اعرف عنه اكثر وين يداوم جيش شرطه لان ماچان عندي معلومات عن هالامور

يتبع ...