احببتُ مخدرچية

دعوة زفاف

البارت الاول

استمرت فترة خطوبتنا لنهاية ٢٠٢٠ ..
چانت احلى أيام حياتي
هاني اكثر أنسان حبيته بعمري و الاول

علاقتي بأهله چانت بارده .. هو دائما يوصيني ان اتكتر ، وهو يسيطر على الامور ..
انطاني تفاصيل كامله عن امه وشخصيتها وأخته وبنت خاله اللزكه .
اني نوعا ما عندي عزله اجتماعيه ، مو فرفوشه حيل واجتماعيه او عندي تملق.
لذلك حافظت على مسافه هواي بيني وبين أهله .

سبب كرهه لبنت خاله ، أن ابوها چان السبب بأعدام ابوه .. بعد ان هرب من الجيش بحرب أيران (فراري) وامه چانت حامل بيه .
خاله چان حزبي بارز بحزب البعث المنحل ، بعد السقوط اخذ عائلته وطلع للاردن .
وخله بيت اليرموك بأسم اخته ليلى ( ام هاني ) اللي چانت مسانده اخوها بكلشي ، وصلت لدرجه حتى قتل زوجها مااخذت منه موقف، والاكثر قطعت علاقه ماهر ببيت جده اهل ابوه سنوات الى ان هو دورهم ولگاهم واكتشف الحقيقه .
لذلك چانت علاقته بأمه حيل موزينه .
اخته الچبيره مواليد ٨٥ .. ماجستير تربيه احياء
كملت دراسات بالاردن ، وقوت علاقتها بخالها وعائلته .
حتى زواجها چان مدبر من طرف خالها ، زوجها ابن صديقه المقرب .
لذلك اخذت موقف منحاز لامها ولبنت خالها .

سنة ٢٠٢١
شهر مارس

حددنا يوم الزفاف ، وجهزنا نفسنا ان بعد الزواج مباشرة نطلع لتركيا شهر عسل بسبب دواماتنا والاجازه وموجات كورونا .
٢٠٢١/٣/٢٠ چان يوم جلسة التصوير .
حجزنا قاعه ومصوره، ولبسنا ملابس الزفه وبتجهيز كامل من صالون وتبديلات البدلات وغيرها.

ماما بس چانت حاضره ويايه بجلسة التصوير .
وچان مبين عليها القهر والزعل ، رغم طول فترة خطوبتنا حاول هاني يطمنها بس ماكو نتيجه .

ظليت اباوع عليها، وهي مقهوره وعيونها مغرغره دمع.
چنت واكفه وياه وجهي على وجهه بس عيني على ماما ، گوه مركزه وي المصوره .
فرق طول بيناتنا يادوب الكعب اوصل لرگبته.
هي ماتحملت انفجرت تبچي وراحت للحمام.
أني هديت أيده وردت ألحكها .. داطمئن عليها.

هو سحبني بقوة من خصري ونبت اصابيعه بظهري ،
وگال : عوفي أمچ ، ركزي بيه .
نزلت الدمعه من عيني ، مسح دموعي وكملنا كم لقطه تصوير .. اجتي ماما كعدت ، هو راح الها دنگ وحجه وياها .
دقايق وأجتي عليه وگالتلي : اني رتبتلج امورج كلها ، خابروني بالبيت لازم اروح .
زهره: ماما شكو صاير شي ؟؟؟؟
ماما: لا ماما، ماكو شي .. أنتي خلصي وهو يرجعج للبيت مباشره ، لا منا ولا منا ، سمعتي .
زهره: تمام ماما .
ضجت وگلبت خلقتي وبوزت ، هو من بعيد يباوع عليه .
دخن ورجع بين ما حچينا هالكلمتين .
هاني: يله زهورتي، خلي نكمل.
زهره: انت شنو حچيت ويه ماما وراحت ؟
هاني: هددتها . وضحك ضحكه بصوت عالي.
زهره: شنو هددتها؟؟؟
هاني مد ايده ولزم ايدي ديريد يگومني وگال: شبيج كلشي تصدگين ، ماحجيت شي ، چنت اطمنها بس .

گمت وكملنا بقية اللقطات وساعدني هو بالتبديلات .
وراها بدلت ولبست حجابي ودنطلع من القاعه.
هاني: خلي نروح نتعشه.
زهره: مااا.. ماما گالت ارجع للبيت مباشرة.
هاني : ياطلابتج ياسهير ، اني وياها لو كاتل لو مكتول.
زهره: يمه اسم الله شنو الحجي هذا . وعقجت حواجبي.
هاني: ولج كافي هاي حركاتج ، اريد اكلج .. (خله ايده الچبيره على حنچي وخدودي وعصرهم )

وصلنا للبيت .. ونزلت .. هو نزل الاغراض ويايه ودخلهن ليجوه ، أني توسلتله أن يظل يتعشه ونطلب شي يحبه من المطعم ، بس چان راسه يوجعه حيل ومتأذي.
من ديطلع صاحلي ، اجه بصفي وخله ايده على زندي وتمشينا للحديقه ، وصلنا للمكان نفسه بذيج الليله .
هاني: تذكرين ذيج الليله ، چنتي تخبلين ، لوما كلامج القوي ، يمكن چان مالزمت نفسي وبستچ .
زهره: يوووو ، لا تذكرني ، يمكن چان متت بليلتها من الخوف ، اصلا ماادري شلون حچيت وياك بلحظتها ، جسمي كله يرجف.

هاني وگف گدامي ، ولزمني وعصر زنودي بأيديه اثنينهم ، بحيث  نبت  اصابيعه بلحمي .
زهره: شبيك ؟؟!! اووي دتوجعني .
هاني: اشوكت منستعجل ، اريد اكلج واشربج .
زهره: عفيه لا تخوفني ، هذا كلامك ونظراتك ،اخخخخ ايديه .
هاني ما فتر ايديه،على لزمته القويه .. دنگ عليه وباسني بوسه من حلگي بحيث شفايفي كلها وبقوة، اني تفاجأت وداريد ابعد عنه ، ماگدرت .
بعدين هدني بدفعه خفيفه ليوره ، اني خليت ايديه على حلگي ودرت وجهي صفح ودنگت .
گلبي يدك سريع وقوي، ووجهي صار حار .
رجع عندي أحساس الدغدغه الحلوه ببطني ، ماگدرت اباوعله واگوله دير بالك على سياقتك ولا تمشي سريع مثل كل مره يروح .
هو طلع بسرعه وطبك باب الحوش وراه .
دخلت للبيت ورحت لغرفتي ، تمددت على الچربايه لان احس رجليه مگطعه من الوگفه والكعب والجلسه الطويله .
رجعت اطلع افلامي ومسلسلاتي المفضله ، واشوف اشلون تصير هذه البوسه الرومانسيه بين الابطال ،
اللي صارت قبلة هاني الحقيقيه بعد ان چانت لقطه عابره .

يتبع ..