احببتُ مخدرچية

ويعود فجأة، حدٌيث قديم بيننا الى البال.

مرت ومرت الايام والاشهر ..
زهره غيرت المستشفى اللي تداوم بيها ، وغيرت ناسها ، تغيرت نفسيتها وتغير شكلها .. گصت الشعر الطويل ..
بدت تداوم ، بمكان جديد بدون ذكريات وناس جدد ميعرفون هاني .
وضعهم بده يستقر وره كم شهر ...
زهوره احتفظت بأبنها وراحت بشهر الرابع ٤ / ٢٠٢٢
حتى تعرف جنس الجنين حتى تبدي تجهز وتشتري شي يعجبها من تشوفه .. لان الها ٦ اشهر وشويه .. وطلع ولد
ظلت متردده على اكثر من اسم الى ان استقرت على اسم هي وعائلتها ...

بهالفتره هاني صحته تدهورت ووزنه بده ينزل ، الالم براسه مستمر وهواي تجي حالات دوخه وتفتر الدنيا بيه ، صار عنده كم مره فقد الوعي ووكع بالدوام وغشاوه بعيونه ..
الى ان چان يوم من الايام بالدوام ، وصار عنده شمره ( نوبه صرع).
جماعته اخذوا للمستشفى ويعرفون ان هناك دكتور حيدر ابن عمته.
تحاليل ومفراس واجراءات طبيه .. ثاني يوم طلعت النتائج ..
ورم بالدماغ .. ورم سحائي بالدماغ .. ظل ينمو ببطئ سنوات الى ان بده يضغط على الدماغ ويسببله الصداع المستمر وضعف بالنظر ..
حيدر هواي حاول يضغط عليه ان يرتبله عمليه جراحيه لاستئصال الورم وچانت بيها نسبه خطوره اقل  نسبيه ..
بس هو ظل يماطل ويتجنب الموضوع گأنما چان منتظر
هالشي حتى يخلص عليه .

ولادة زهوره چانت نهاية السابع .. ولاده قيصريه ..
ونور ابنها دنيتها وحياتها .. أخذت امومه سنه وتفرغت تهتم بيه وتداري ويه عائلتها ..
باشرت بالدوام وره الامومه بمستشفى الجمله العصبيه التخصصي بالضبط بدايه شهر السابع ...
بعد ٣ اشهر من مباشرتها بداية العاشر ٤ /١٠ /٢٠٢٣
المصادف يوم الاربعاء ..
زهره چانت دتطلع مريض من العمليات حتى يستلموه اهله وينقل للردهه .

بالباب .. چان واكف دكتور حيدر ..
اثنينهم تفاجؤا ببعض .. وترددوا بالسلام ..
بعدين اجه دكتور حيدر على زهره ...
حيدر : اشلونج زهوره اخبارج ؟
زهره: الحمد لله دكتور ، انت شلونك ؟
حيدر : الحمد لله .
حيدر : شنو دتداومين هنا ، تفاجأت شفتج .
زهره : اي هنا .
حيدر : طبعا اني ماادري بالصار والله .
حيدر : انفكيت والتهيت بامتحان الفاينل والبحث ، من رجعت تفاجأت بالوضع ، يعني اخابر هاني ما حچالي اي شي اروح لبيتهم لكيت هاي امه وماتحجي ولا ترد .. صعدتله فوك مره
كاعد بغرفه اخشاب مكسره ومهجوره والله ماعبالي غرفتكم لان مااعرفها ، وهو جان تعبان سألته عنج سكت .. اني هم استغربت معقوله تعوفه زهوره هيج .
وراها طلعنا للكافيه وجان ديشوفني شغله بالموبايل وراح للصحيات .. اني ظليت اكلب بموبايله بالاستوديو وهيج ولكيت محادثات .. قريتها ماصدكت ، كتله والله هذه مو هي ..
حيدر : اني هسه لو يجيبولي صور فديو لو تسجيل صوت مستحيل اصدك هذا يطلع منج واگول مفبرك.
حيدر: هو غبي والله ، اصلا مو طريقتج بالكلام اذا هو حبج حب اعمى ، اني سنين وياج واعرف تصرفاتج ومستحيل هيج تسوين .
زهره: أشكرك على ثقتك بيه، بس هذا الكلام ميفيد بعد.
زهره: شي صار وتجاوزتاه .
حيدر : شوفي صح عصبي ومستعجل بقراره بس اعذري تره والله طفولته نشأته صعبه .
حيدر : يعني خاله قتل ابوه وامه مااخذت موقف عادي ..وظل سنين عايش ويه القتل ابوه بدون مايعرف .
حيدر : أنا اذكره من أول مرة اجه علينا البيت اجه دك الباب ودخل ، ولد اسمر اضخم مني وحتى لحد الآن شكله ببالي جان عمره 17 سنة وشواربه هستوهن منبتات واذكر لا حجة ولا گال غير أنه يريد يشوف جدي أبو أمي وظل ينتظر تقريبا ثلاث ساعات لأن جدي جان خارج بغداد بواجبه.
‏لما دخل جدي گالوا له خالاتي .. واجه للاستقبال وكف بالباب وصفن عليه شويه وگاله : ابن مقداد شنو اسمك ؟
هو كام فز وجاوب جدي ..
جان يجي لبيت جدي سكتاوي بدون علم امه .. ومن دروا جان خاله يضربه .
الى ان اجه بفاتحه جدي الله يرحمه وظل بايت يمنا ومنها بدأت المشاكل والمواجهة ويا أمه وخاله.
‏فأنت عذري صح هو الغلطان هو الظالم هالمرة بس هو عايش بدون ثقة صح السواه بيج اكبر غلط بس ترى والله هو اذاج واذه نفسه أكثر .
‏زهرة : عفيه دكتور حيدر نكدر منحجي بهذا الموضوع.
‏حيدر : تمام.
‏حيدر : أنا سمعت منه انه أنت جنتي حامل ، بشرينا ؟
‏زهرة : اي الحمد لله صار عندي عبودي عبدالله .
‏حيدر : فدوه لله، الله يحفظه إن شاء الله .
‏زهرة : دكتور حيدر عندك شي هنا محتاج احد ؟
‏حيدر : والله عندي اقاربي باجر عنده عملية هنا و ردت اشوف الولد المقيمين علموده ، بس ما دام انتي موجودة ما تقصرين .
‏زهرة : بس أنا باجر أوفي إذا تريد أداوم مو مشكلة.
‏ حيدر : لا يمعوده شنو السالفة الولد موجودين وما يقصرون.
زهره: تمام براحتك.
حيدر: اكولج زهوره، لحظه .
حيدر: ماعندي رقمج ذاك راح لا واتس ولا اي شي
زهره: اي بدلت الموبايل والخط .
حيدر: انطيني رقمج لو انطيج رقمي بكيفج حتى نتواصل اذا يصير ميصير شي .
زهره : تمام ( اخذت جهاز حيدر وسجلت رقمها وانطتهياه)
زهره: مع السلامه
حيدر : الله وياج عيني .