احببتُ مخدرچية

يوماً ما سنلتقي ونحكي،كيف سارت بنا السبل حتى اللقاء

الجزء الرابع ..
يوم الخميس ..
نهاية اسبوع وچان عدنا عمليات جراحة اطفال و لوود حيل .. خلصنه عمليات ب٢ الا ربع ..
مباشرة من الصاله رحت لغرفة تبديل الملابس ..
نزلنا جوه حتى نبصم مغادره ..
وكولش مالي خلك احچي وي البنات او اضحك لان منهكه عقلياً وجسدياً ...
ابويه جان ماموجود بيومها .. لان عده فاتحه بالحله لاقاربه .. راح هو وماما من الصبح
فـ رجعت ويه بنيه تداوم ويايه .. چان اخوها ياخذها
اني كتلهم ينزلوني براس فرع بيتنا .. ورحت اتمشي للبيت ..
قبل مااوصل باب الحوش بشويه .. سمعت صوت صياح ورايه ..
ألتفت ..
چانت عيونه حمره وصاح اسمي بصوت عالي (ولج زهيره )..
اني خفت وجمدت بمكاني .. رفعت راسي اباوعله واحس خدر بوجهي وبشفتي من الخوف ..
ظليت اباوع يمنى ويسرى اخاف جيران او اهلي
احد يطلع ويشوفني هيج ...
رجعت خطوه ليوره وهو تقدم بأتجاهي ..
چان لابس مدني .. وانتبهت سيارته السوده العاليه براس الفرع مالت بيتنا ..
زهره:( عفيه شتريد مني ، روح منا مااريد فضايح )
هاني :( منو هذا الصاعده وياه ، ابوج وين ..هااا (صرخه) ) ..
زهره:(بابا مو هنا بالحله .. بعدين ليش تصيح عليه )
استهضمت وخنكتني العبره ، وحجيت بصوت بچي
( لا تصيح عليه، عفيه )
هاني :( استغفر الله .. انتي ح تخبليني .. ح يطگلي عرگ براسي ولج .. راسي ديوجعني بسببج ..
باباتي اعقلي اعقلي ، يعني اجي داطمئن عليج وره خبالاتج ، الكاج بموقف يعصبني ازيد ... )
حط ايده اليسرى على عيونه وضغط ع وجهه بيها وايده الثانيه على خصره .. وافتر راسه وجسمه من فوك ع جهة اليمنى نص فره .

خايفه ،گلبي يدگ قوي وسريع
مااعرف شنو احجي
مااعرف شنو اتصرف
خايفه احجي وياه
خايفه اعوفه وادخل البيت .. خايفه منه وعليه
گلبي ماينطيني اعوفه هيج ..
زهره:( انت حيرتني شبيك )
دموع ودموع ودموع
مااحس نفسي اله دابچي ، ابچي واشهگ
هو من شافني هيج .. تغير وجهه وتغير لونه وتغيرت نبرته .
هاني :( الله ياخذني اذا تبچين ، لا تبچين راح اولي
بعد ماتشوفيني بس لا تبچين .. الله ياخذني .....)
اجه اتقرب ودنك عليه ، صارت عيوني بعيونه ..  حچه هذا الكلام وراح يدردم وي نفسه ..
ظليت واكفه بمكاني وهو صعد سيارته ومشى ..
فتحت الباب ودخلت للبيت .. رحت لغرفتي مباشره
چان بابا وماما بعدهم ماراجعين من الحله .
دخلت للحمام مباشرة بملابس الدوام .. وفتحت دوش فاتر .. ظليت جوه المي فوگ النص ساعه ..

خوف على تعب على نعاس على فتور بجسمي
سبحت وطلعت بدلت .. تمددت على الچربايه ..
مااحس نفسي اله نمت غفيت ..
وفزيت ماما دتكعدني من النوم ساعه ٦ المغرب ..

يتبع ....