احببتُ مخدرچية

تائهه !!

مرت أيام واحنه بدون تواصل ..
مشاعر فرح وانزعاج بداخلي ، احس نفسي بين
حلم وردي وبين كابوس مرعب بذيج الليله ..

داومت وعرفت خالة د. حيدر اللي ويانه توفت ..
بنيه ويانه بالكلية چانت بس غير قسم هم توفى ابوها ..
وچنة نسمع بهواي ناس عرف او ناس تقرب للعرف ديموتون بكورونا ...
اني تجنبت اتصل بـ هاني او اراسله ، بنفس الوقت منتظره منه مبادره ..
يوم ويومين والثالث والرابع .. الى ان صار يوم الخميس ..
خلصنا عمليات ب١١ ونص .. لان چانت موجه كورونا الاولى وچنه انذار .. يعني نشتغل العمليات الطوارئ والضروريه بس ..

چنت بغرفة الاستراحه .. متمدده وراسي على رجل صديقتي جنات ..
باب الغرفه اندك وسمعت صوت د.حيدر ..
گالوله البنات تفضل .. گال : اريد زهوره موجوده ؟
اني گمت طلعت من الغرفه وسديت الباب ..
گال: عندج شي ، اريد احچي وياج بموضوع خاص ع صفحه اذا عندج مجال ..؟
گلت له: لا ماعندي شي دكتور .. ظليت وراها مستغربه
!!!

رحنا كعدنه على صفحه چان اكو كراسي انتظار (مخصصه للمرضى قبل ما يدخلون الصالات )

حيدر: خوما عندج شي او مشغوله؟
زهره :لا ماعندي شي ، تفضل !!
حيدر : شوفي اني صريح ودايركت ، تحمليني ، تمام
حيدر : اذا تقدملج هاني ؟؟ تقبلين لو ترفضين ؟؟
لا اراديا توسعت عيوني وگمت احس الدم بعروگي..
حيدر: اي هاني يصير ابن عمتي ، اوووو ... اقصد ابن خالي ، اني ابن عمته اصير ..
حيدر : شوفي للامانه هو لا دزني ولا يدري اني داحجي وياج ولا يعلم اي شي الله شاهد ...
حيدر : بس داشوف وضعكم اثنينكم مخربط !
زهره: يعني هو شنو گال ؟
حيدر : والله ما گال اي شي ، يحش جكاير وحتى اكل كوه ياكل وحارك الجو بعصبيته ، مااعرف شبيه !!
حيدر: وانتي من جهه تصفنين وحتى متغيره صايره
حيدر : يعني الگولكم حل ..

حيدر : اني اسبوع اليجي مجاز .. مموجود ببغداد ..انتي فكري ورديلي خبر من ارجع تمام .
زهره : تمام .

رجعت للغرفه سألتني جنات ليش اصفن وشيريد مني د. حيدر .!!
زهره: جنات اني احجيلج كلشي بس انطيني وقت تمام .
جنات : شنو تحجيلي ؟
زهره: على دكتور حيدر اليوم شنو حجينه ،تمام.
جنات : براحتج .
خلص الدوام ورجعنا للبيت ..
مرت عطلة الاسبوع واني ويه كل اشعار يفز گلبي
عبالي هاني ...
ظليت افكر اتواصل وياه اني ، اشلون اگول لاهلي شنو اگول لامي .. شنو شكلي وموقفي گدامهم وهم خالين ثقتهم بيه ...
ظليت ايام على هالوضع .. الى ان وصلت لحل تقريباً مرضي لكل الاطراف ....

يتبع ...