احببتُ مخدرچية

يوماً ما سنلتقي ونحكي،كيف سارت بنا السبل حتى اللقاء

الجزء الثالث..
مرت الايام ..
داومت ..
راسي ثگيل من الافكار ..
گلبي مهموم وخايفه ..
تفكير زايد .. ارق .. فقدان شهيه ..
(زهره تفكر )
اني وين جنت .. شلون صرت شصار بحالي ..
كل هذا لان شخص مااعرفه ضغط عليه شويه ..

اذا شفته بعد اصده وماانطي مجال .. على اي اساس يتصرف وياه بكباره هيج ..

بصاله العمليات گاعده يم راس المريض ..
عدنا طبيب مقيم اقدم تخدير اسمه ( حيدر الاعرجي ) احنه نلقبه سيد ..
•فـ هو ديچيك حالة المرضى بالصالات .. وگف يمي شافني صافنه ..
گال : شبيج بشنو تفكرين ؟؟
ابتسمت ابتسامه خفيفه :( ماكو شي سيد )
•هو سحب كرسي وگعد يمي
وگال :( اشوفج صافنه ومهمومه ، اكو شي مضوجج؟)
•(صارلچ فتره مو طبيعيه ..هاا ؟)

رديت :(لا سيد والله ماكو شي ، ابتسمت ودنگت راسي )
حسيت نفسي مهمومه ومثل الغصه بصوتي .. اريد اطلع هذا الكلام اللي بصدري وگلبي لشخص بس مااعرف ..
اني اخاف الناس تاخذ عني نظره لو تلومني لان رديت وحجيت وياه .. حسيت الناس راح تعتبرني السبب ان هيج تمادى ويايه
اذا اني ألوم نفسي .. مااتحمل ملامة الناس بعد
•حيدر:( على راحتج .. اذا شخص مضايقج لو عندج مشكله ، اعتبريني اخوج الچبير .. تمام )
تنهدت لا ارادياً .. ( تمام سيد ، مشكور)
• ضحك د. حيدر وگال شكلج سالفتلج موهينه على هاي التنهيده .. الله يعينج بس
هالمره صدك ضحكت من كل گلبي .. حسيت نفسي اشويه تنفهت .. على شنو الله يعيني سيد ..!؟؟ 
• الله بعينج ع ما ابتلاج زهره
( الله كريم .. مشكور دكتور )
هو طلع من الصاله .. جريت نفس ثگيل
فكرت( هذا الموضوع عبئ عليه .. محتاجه شخص احجيله وافضفضله واحل الموضوع )
اني ماداخله بعلاقة حب ولا عندي علاقات رومانسيه قبل ..
عقلانيه وصريحه ، شخصيتي مثل طفل مستمع بصف اول ابتدائي
احس نفسي ومشاعري وگلبي طفلة .. بس بنفس الوقت اتصرف مثل الكبار حسب عقلي
لذلك تأذيت من هاني ..
گلبي تعلق بيه
عقلي رافض يرتبط بيه
بأختصار هذا سبب معاناتي ...

ياترى منو الشخص اللي راح افضفضله هذا التناقض اللي بداخلي ويفهمني ؟؟!!

يتبع ...