الجزء: 7
♦️ أهل الغرام ♦️
بقلمي: نونة ✍🏻
صباح نهار جديد
خارجة من غرفتها ببيجامة منزلية زويونة و طويلة .. شعرها مطلوق و وجهها صافي و مقاد مجبد .. مهلية فراسها و فصحتها مباينش فيها انها داخلة لسن الاربعينات، صبح بالها مشغول و مهموم بالمسكينة اللي صادفاتها البارح!
حالتها قطعاتلها فقلبها و فكراتها فذكريات ماضية كثيرة خلاوها تنفاعل بديك الطريقة بلا ماتحس على نفسها، تصرفات بدون وعي منها .. عقلها ماتقبلش انها تسمع بنت اخرى تكرفصات و ملاقياش اللي يعاونها!
دخلات لغرفة فالطابق الثاني كان بابها مسدود .. حلات الباب بشوية كاطل عليه .. بانليها ناعس مغمغم فغرفته، صوت شخيره الخافت مسموع فأرجاء الغرفة باين فيه عيا مع جا مباشرة من المطار للسبيطار و مادخلو للدار تا لساعة متأخرة من الليل .. خلاته على خاطره تا يشبع نعاس و خرجات من الغرفة نازلة لتحت .. تلاقات فطريقها بنتها ريماس .. بنت واخذة زعورية باباها .. العوينات خضيضرين غاديين للزروقية وارثاهم من عمها اللي توحمات عليه رحمة فاش كانت حاملة .. و طايتها عادية، ماشي من النوع اللي مهووسة باش تبقى ذات قد و طول مناسبين .. رغم أنهم من الناس اللي لاباس عليهم و ساكنين ف ڤيلا فمنطقة داللوكس .. و وليداتها مربيين احسن تربية فمدارس بريفي الا انهم متواضعين و كايعيشو عيشة عادية مكايتضاهروش بأنهم مالكين الدنيا بين يديهم!
ريماس: (بابتسامة خفيفة) ماماتي الكبيدة ديااالي (نقزات عليها باست خذها قبلة بالصوت) صباح الحب
رحمة: صباح الخير بنوتتي الفنيونة .. فين ختك باقا ناعسة؟
ريماس: امممم البارح سهرات مسكينة (تكسلات كاتفوه) داك المشرف عليها هي و الغروب ديالها كايقيل ينگر تا حاجة مكاتعجبو كايخليها تخدم واخا يتسالاو الساعات المفروضين عليها!
رحمة: ايوا الله يسهل عليكم يا ربي و يعطيكم مكاتمناو .. (شدات فيها جاراها معاها) اجي نمشيو نوجدو الفطور خوك غايفيق فيه الجوع
ريماس: كنت غادة نبوسو و نفيقو هههه
رحمة: (ضحكات) راه عيان تا يشبع نعاس و يفيق لراسو
ريماس: عرفتي اماما على تمارة كاندوزو، الحمد لله اللي اليوما صبح الحد و نرتاحو شوية
رحمة: صوفيا مشات البارح عند ماماها؟
ريماس: ههههه اه كاتحماق تبقى معانا الزغبية بليناها بغات تا هي تولي طبيبة
رحمة: مزيان شكون فحالي بنياتي كبرو و ولاو طبيبات
ريماس: عاد قلنا باسم الله ههههه
رحمة: (دخلو للكوزينة و بدات رحمة كاتجبد الطحين و المقادير اللي تحتاجهم باغا تقاد فطور متول على حقه بما ان اليوم الحد الخادمات مكايجيوش كاتبغي تاخذ نهارها اللي تدخل فيه لكوزينتها و تعتاني بعائلتها لراسها بلا مايتدخل حد فيها) يكون خير تا ديرو عيادتكم انشاء الله
أنت تقرأ
أهل لغرام 💍 ❤
Romanceقررت نحط هاد القصة هادي! هي جزء ثاني لقصة القابلة رحمة و لكن غانشير لنقطة مهمة نتمنى تقراوها! الناس اللي ماقراوهش الجزء الاول يقدرو يبداو معانا هاد الجزء حيت قصة مغايرة تماما، احداث بعاد على الجزء الاول و اي حاجة غاتحتاجو تفهموها غاتفهملكم مع الاحدا...
