الجزء: 147
♦️ أهل الغرام ♦️
بقلمي: نونة ✍🏻
بينهم كانت تا زينب جالسة، صاحبة بسمة من الجمعية، كادور فعينيها و تميق و تمتم لواحد السيدة جنبها جالسة
زينب: ويلي ياختي و هاد الناس شحال فيهم دالتفخام و التبعكيييك، مت العروسة ماشافتش لجيهتي وانا اللي مكبرة بيها و جايا نحضرلها ، ضحكت معاها داك النهار هجراتوليا و جرات عليا گاع
المرا: جرات عليك و جايا؟ بعدا عرضاتك؟
زينب: دارت معايا الصواب عمة العروسة و جيت
المرا: ايوا السيدة باينة ماعندهاش معاك و انتي جايا عندها، انا كانعرفها، رحمة مرا مزيانة و حقانية ولداتليا بنتي و يدها زويينة تبارك الله
زينب: (تأفأفات) تا انتي! هه تا القابلات ولاو يتنفخو و يحسو بكرورهم، و لكن الراجل اللي حازمة عليه و دايرلها هاد الفيلا قداش و ديك الطموبيل بالسييييف مايعجبها راسها
المرا: (كادور فعينيها) اختي الله يهدي ماخلق
زينب: واللهما تستاهلو، الزين و الهمة و التبوگيصة و الفلوس، باينة مامبرعاهش اصلا، ماشتيهاش والدالو غير ثلاثة؟ انا فبلاصتها نولدلو و نبرعو تلقايه مزال باغي، خاصو شي وحدة صغيرة راك عارفة الرجال الكبار كي دايرين، كايبغيو يتباهاو براسهم و يرجعو شبابهم
المرا: (تحنحنات) احمممم اختي واش انتي جايا تسرقي الراجل من مرتو؟ عندها الحق تقلب عليك وجهها
زينب: (ناضت من جنبها كاتقلب فعينيها) غانمشي شوية و نجي
ناضت غادة كاتمايل بمشيتها، لابسة طالون فيه تقريبا شبر دالطول .. بجلابة لاصقة على فورمتها كولشي واضح و مفروز عندها، رحمة لمحاتها خارجة .. دورات عينيها طالعالها القردة من وجودها، شافت فبسمة
رحمة: عارضاها و انتي عارفاني محاملاهاش
بسمة: والله ماحاشيتهالها راني عرضت واحد السيدة هي كانت معانا فالجمعية، سمعات داكشي و جات قالتلي انا ماتعرضينيش لصقاتني تا قلتلها مرحبا غير من القرجوطة لفوق صدقات جايا بصح
رحمة: (بفقصة) تفو، تجي تمرضني هاد النهار
قربات عندهم المرا اللي كانت جنبها و جلسات كاضحك و تحنحن
المرا: ختي رحمة كي بقيتي لاباس؟
رحمة: (تبسماتلها) حمد الله و انتي
المرا: لاباس يسول فيك الخير و الربح و الله يكمل عليكم بالخير (تبسماتلها) اممممم ديك السيدة كانت جالسة جنبي لابسة جلابة فالصفر صاحبتك؟
رحمة: (بجدية) معرفة و صافي، ياكما قالتلك شي حاجة ماهياش؟
المرا: و فحالا علمك الله اختي مللي جلست جنبها و هي تعيب فيك ماخلات ماقالت فاللخر لاحت الهضرة فحالا ناوية دورليك براجلك و قالك خاصو اللي تولدليه شي وحدة صغيرة (غمزاتها) راك عارفة حروب النسا و انتي ولية فحالك فحالها، ردي البال عفاك انا عزيزة عليا على داكشي قلتلك هادشي
أنت تقرأ
أهل لغرام 💍 ❤
Romanceقررت نحط هاد القصة هادي! هي جزء ثاني لقصة القابلة رحمة و لكن غانشير لنقطة مهمة نتمنى تقراوها! الناس اللي ماقراوهش الجزء الاول يقدرو يبداو معانا هاد الجزء حيت قصة مغايرة تماما، احداث بعاد على الجزء الاول و اي حاجة غاتحتاجو تفهموها غاتفهملكم مع الاحدا...
