الجزء: 74
♦️ أهل الغرام ♦️
بقلمي: نونة ✍🏻
داوود: (غلباتو الضحكة) وااايلي ههه المسكوتة كبرتي و وليتي تخرجي عينيك و تهددي؟
رحمة: (بعبوس) واحد خيتي لداخل ماعاجبانيش عينيها غير كايدورو
داوود: (غمزها) خفتيني نحط عليها العين؟
عقدات حواجبها و يلاه غاتجاوبه خرجات عندهم زينب كاتمشى بتمختيرة و تعوج
رحمة: (شافت فيها و وقفات مغطية على داوود زعما بجسدها صدقات قصيرة عليه واصلاليه حد صدرو) مالك احبيبة؟
زينب: (كادور فعينيها و تشوف فداوود بنظرات مورقين كاطلعو و تنزلو) احمم بغيت نمشي للطواليط احبيبتي!
رحمة: (ورقات شوفاتها من الفقصة زطمات لداوود على رجلو) راه من ديك الجيه
داوود عرفها غتاكلو مللي تمشي ديك خيتي فحالها، حدر عينيه و مشا بلا مايدوي
زينب: (حضاتو بعينيها) مال راجلك مشا بلا مايسلم، ويلي مافيه صواب
رحمة: (قريبة تسبها) هو هاكا ماعزيزش عليه يدوي مع النسا مكايعرفهمش
زينب: (ضحكات) ويلي ههههه اشمن نسا انا غير بنيتة مايخافش مني ماعنديش الراجل اللي يحكمني
رحمة: (ماحساتش بنفسها تا طلقاتهالها) غير بلا ماتحمقي راسك معاه، راجلي قانع بيا بوحدي معمراليه العين
زينب: (ضحكات) هههه ويلي فين مشا عقلك
رحمة: سيري للطواليط الله يرحم جدك ازينب
زينب: (دارت غادة كتنهد) هانا غادة، الله يسقينا من بيركم .. بفففف بغيت غا زهر الخايبات
رحمة قربات تفرگع دارت جهدها باش ماتصرفش بطريقة خايبة و هي ضيفة عندها!
دخلات للصالون فين كانو مجموعين كاتهزهز فرجلها مغددة، تا جات زينب بقات كاتشوف فيها غير بنص عين مادوات و لا تكلمات تا نطقات هي
زينب: باباك ابسمة بوگوص الصراحة، اللي فحالو مكايقنعوش بمرا وحدة واقيلا يكون مزوج فجيهة اخرى!
غير سمعات رحمة اش قالت وقفات طافجة كاتنعت للباب
رحمة: خرجيييي عليا من دااري داااابا
زينب: (شافت فيها) اويلي ارحمة رجوع الله
رحمة: (بقلة صبر) خررررجي ولا نتفك والله حتى نتفك و نعضك نغززك
زينب: (وقفات كاتشالي بيدها فيها سرتلة دالذهب و كاضحك) ويلي ابسمة باك مزوج بمصعورة
غير سمعاتها رحمة و هي تنقز عليها مابقاتش عاقلة على نفسها فين ولا شكادير، شداتلها ديك اليد و حتاات عليها بعضة تا غوتات زينب لربي اللي خلقها و ناضت بسمة و هيام و تورية كايجرو فيها و يضحكو بالحس
زينب: اي الله ياربي الله، طبعتيني المجنونة
رحمة: (قريبة تسخف) واااخرجي فحاااالك خرررجي
جراتهالها تورية بالزربة كاتحمر فيها و بسمة تا هي ضارت فيها، تا خرجو بجوجاتهم و هي تهز رحمة الكاس اللي كانت كاتشرب فيه زينب شعطاتو مع الارض مغزفة
أنت تقرأ
أهل لغرام 💍 ❤
Romanceقررت نحط هاد القصة هادي! هي جزء ثاني لقصة القابلة رحمة و لكن غانشير لنقطة مهمة نتمنى تقراوها! الناس اللي ماقراوهش الجزء الاول يقدرو يبداو معانا هاد الجزء حيت قصة مغايرة تماما، احداث بعاد على الجزء الاول و اي حاجة غاتحتاجو تفهموها غاتفهملكم مع الاحدا...
