الجزء: 141
♦️ أهل الغرام ♦️
بقلمي: نونة ✍🏻
نزلات عندهم كانو واجدين للحمام .. جامعين حوايجهم، تجمعات معاهم و خرجو مفرقين فالطموبيلات، النص ركب مع ريماس و النص صوفيا و اللي شاط يديهم الشيفور
غاديين على النشاط و التطبال فالكراسة و التزغريت و الموسيقى، دخلو هيام معاهم فجوهم بالسييف .. كايطبلو و يغنيو و يصليو على النبي و يصفقو تا وصلو للحمام و دخلو بداك الجو
كانو كراو حمام شعبي دالزنقة غير ليهم لداك النهار .. طلقاولهم الطيابات بالحليب و التمر و دخلو معاهم تا لداخل مگابلينهم، كان الما عامر من البرمة و السخون موجووود .. فنفس الوقت فواحد البلاصة كان واحد الدائرة على شكل حوض .. عامرة بالحليب و الورد و الفواكه ضايرين بالطباسل بينهم مع العواصر
جلسو كايسخنو لداخل و يديرو الصابون البلدي .. كولشي بقوامه .. من الصابون لبلدي دازو لعدة خلطات و وصفات كايديروهم كاملات و يغنيو و يشطحو محيحات على الجهد
كولهم بدون استثناء عاطيينها للضحك و التكركير و التقشاب جماعتهم حلوة و عاجبهم الحال بيها .. كملو الخلطات و شللو .. من بعد جا وقت الحكان
كانو كثار، تجمعو عليهم الطيابات وحدة بالوحدة من راسهم لرجليهم حكولهم تا طابو و اللي بغات تكمل من ورا الطيابة كاتحك البلايص اللي بغات هي، شللو الوسخ و دازو للشعر .. و بين كل مرحلة و مرحلة ينوضو يزغرتو و يصليو على النبي
ألماس بيناتهم كانت فرحانة و قلبها كايرقص .. عاجبها الحال و متحمسة
تزنگو كاملات بالسخونية
ناضت ماريا جرات حليمة و رحمة و بسمة كايشطحولهم فرحانات ببنيتهم كبرات قدام عينيهم .. رحمة البكية شداتها وسط الشطحة تا شداتها ماريا عنقاتها
ماريا: حبيبة ديالي ماساخياشي بكبيدتها
رحمة: (بابتسامة كاتمسح دميعاتها) هادو غير دموع الفرحة ليها هههه
حليمة: الله يسگم سعدها
بسمة شدات فألماس وقفاتها جابتها الوسط و ناضو البنات تا هوما دارو عليها كايشطحولها و يصليو على النبي، الطيابات دخلولهم تا البنادر يضربو بيهم، التحمحيمة دوزوها حمقة
غسلو شعرهم و مللي كملو، دخلات العروسة لداك الحليب و الورد يدوشولها فيه
قربات عندها رحمة كاتحكلها و تبسملها عينيها مغرغرين و هي كاتشوف فيها عينيها كايفرفرو .. دوزات حمام الورد و خرجات منه شللات و غسلات بالصابون، غير خرجات هي من الحوض دازو البنات ليه كايضحكو مخشيين وسطه
بقاو فوسطه لمدة طويلة تا شبعو عاد خرجو شللو و خرجو للبارد يرتاحو و يشربو العواصر و ياكلو الفواكه
خرجو مزنگات و جدادات، لحمهم كايزلق .. كولهم ضربوها بتحمحيمة دالغدايد دوزو فيها السوايع .. بدلو عليهم مللي كملو و خرجو راجعين فحالهم باقي فيهم الجهد دالنشاط و الحيحة
أنت تقرأ
أهل لغرام 💍 ❤
Romanceقررت نحط هاد القصة هادي! هي جزء ثاني لقصة القابلة رحمة و لكن غانشير لنقطة مهمة نتمنى تقراوها! الناس اللي ماقراوهش الجزء الاول يقدرو يبداو معانا هاد الجزء حيت قصة مغايرة تماما، احداث بعاد على الجزء الاول و اي حاجة غاتحتاجو تفهموها غاتفهملكم مع الاحدا...
