أهل لغرام 💍 ❤

البارت 23 ❤

الجزء: 80
♦️ أهل الغرام ♦️
بقلمي: نونة ✍🏻

الضحكات ديالهم وصلو لفين و الفين، الجو كان ممتع و منعش .. دازو الساعات فالجلوس مع بعض كايتناقشو و يدويو تا قربات ساعة الحسم .. ناضت رحمة هي اللولة غمزات هيام،  دخلات لداخل .. بقات هيام شوية، مدات عمر لشعيب و ناضت تابعاها .. طارت للكوزينة جبدو لاطاغط و تافقو يخليوها هكاك، قادو فيها الشمع و رحمة مدهوشة منها

رحمة: دابا هادي صاوبتيها بوحدك هههه عرفتي نجيبوها من الباتيسري ماتكونش فحال هادي، الله يعطيك الصحة

هيام: (تبسمات) اميين يا ربي هههه صاوبتها من قلبي نتمنى تعجبكم كاملين

رحمة: تعجبنا و تفوت لهيه، عرفتي شنو غاديري دابا، سيري بدلي عليك لبسي ديك الكسيوة اللي جبتليك داك النهار مع اللبسة اللي خرجتي بيها البارح

هيام: (تفكرات اللبسة دالبارح و تنهدات) امم احم واخا
رحمة: يلاه سربي قبل مايعيق

حركاتلها راسها بالايجاب و مشات طلعات لفوق بالزربة .. حلات الپلاكار و جبدات الكسوة كانت معلقة

كانت كسيوة زوينة، طويلة و بالكمام .. كانت مفرفرة من لتحت كاتوساع و من الفوق ايفازي لونها حمر، حطاتها فوق الفراش و دورات الساروت فالباب، دخلات دوشات دوش خفيف دوزات على البلايص اللي عندها فيهم الزغب حيداتو دغيا و هزات كريم من ڤيكتوريا سيكرت فيه واحد الريحة كاتصطي، ذهناتو فجسدها بالكامل .. دوزات السوشوار مع شعرها و لوات شي زغيبات بالبلاك ، لبسات دوبياس كوحل جاو مع لون بشرتها الحنطي و خرجات للبيت لبسات الكسوة و قادات شوية الماكياج .. دوزات عكر احمر غامق مع شفايفها و دارت ايلاينر رقيق و ماسكارا و فاراجو، تفادات دير فوندوتان حيت بشرتها الطبيعية مزيانة و الفوندوتان كاديرلها الحبوب واخا دوريجين .. طلقات شعرها قاداتو و هزات واحد الصنيديلة دومي طالون كحيحلة لبساتها فرجليها

نزلات لتحت كادور فعينيها كان كولشي مزال فالجردة .. بسمة و ماريا تجمعو مع رحمة، هزو لاطاغط للصالون اللي زينوه و قادوه بالنفافخ و داكشي د اعياد الميلاد .. حطات رحمة كاميرا من كاميرات شعيب باش يصورو و يوثقو الحدث .. طفاو الضيوان و شعلو الشمع، صيفطات رحمة ميساج لداوود علماتو يدخل و يجيب معاه كولشي تا هو كان كايتسنى غير اشارتها
.............

دقايق و كانو متقدمين للصالون .. غير حسو بيهم تقادو فوقفتهم و هزو ادوات الاحتفال، طلقو واحد اللعيبة طلقات صوت مسموع و نطقو كاملين تا هادوك اللي داخلين

"Happy birthday choaib"

شاف فيهم متفاجئ، مشا من بالو الموضوع في خطرة .. تبسم كايدور  عينيه عليهم كاملين و الكل كان كايصفق و يهتفليه عيد ميلاد سعيد .. كملو المعايدة ليه كولشي عنقو و باسو كايقدموليه الهدايا اللي وجدو و هو مبسم الدهشة مأثرة عليه تا قربات عنده هي، مع ضوء الشموع اللي كان ضارب فيهم، تطلقات اغنية بصوت انثوي عذب و حنييين بدا اولا بهمهمة خفيفة بدون موسيقى و غنائها كان مسجل