الجزء: 45
♦️ أهل الغرام ♦️
بقلمي: نونة ✍🏻
شعيب: الفراش كبير غانتساعو فيه بجوج بلاما تبني آمالك على داك الفوطوي
دقات قلبها تسارعو من كلامه .. انفاسها كذلك تزايدو كاتشوف فيه و ترمش بسرعة .. تحنحنات كادور فراسها يمين و شمال و قالت بخفوت
هيام: ف فاش كاتفكر؟
شاف فيها مباشرة يديه خاشيهم فجيابه و واقف وقفة رجولية فحال شي جبل مكايهزو ريح .. طول فيها الشوفة تا بدات تبيض فبلاصتها، عض شفته السفلية و غمزها بطريقة خلات قلبها يرجف
شعيب: فاش كاتفكري انتي؟
جابلها البكية و الفقصة بالتلاعب دياله، اكتشفات فيه جانب آخر غير اللي كانت ضاناه عليه، عزيز عليه يلعب بأعصاب الشخص اللي قبالته!
صرطات ريقها بشوي كاتهمس
هيام: مكانفكرش و ولكن من الاحسن كل واحد ينعس بوحدو
شعيب: (قربلها بشوية و هي كاتحسب فخطاويه جالسة فوق الفوطوي) علاش كل واحد ينعس بوحدو؟ المزوجين هاكا كايديرو؟
تحدر عندها بعدما وصلها تا قفزات، ولات كادور فعينيها حاسة بالوحلة .. قلبها كايضرب بالجهد و حلقها جف .. عينيها موسعين و مدمعين فيه ولات كاتبني و تهدم بوحدها
هيام: (بخفوت) و وو انت ماقلتيهاليش من قبل!
شعيب: (هز يده لخصلة من شعرها .. ردها للجنب مور وذنها تا غمضات عينيها بقوة زيراتهم و رجعات حلاتهم فيه رادة معاه البال و هو يغمزها) اشنو ماقلتش؟
مابقاتش قادرة على الوضعية، لعب بأعصابها، خلاها تتخايل بزاف دالحوايج ليهم فذماغها، كاتشوف فوجهه قريب من وجهها و انفاسه كايضربو فبشرتها .. مخلوعة و كاتقلب على الكلمات اللي تواجهه بيهم حتى تبسم ابتسامة خفيفة جارها من خذها قرصها فيه و تقاد فوقفته
شعيب: كيفما قلتليك غانعسو فنفس الفراش انا وياك راه كبير و يساعنا و يشيط الخير، الفوطوي غايضرك فضهرك قاصح شوية، صبري غير علاما يدوزو هاد الايامات راني قربت نمشي
صرطات ريقها بصعوبة كاتدارك مخيلتها فين وصلات بتخيلاتها، تبسمات ابتسامة خجولة حاسة بيه عرفها فين كاتفكر و هادشي حشمها و غرقها فحوايجها .. مشا جيهت باب البيت غايخرج و رجع شاف فيها
شعيب: ارتاحي انا غانتعطل شوية عاد نجي، نقدر نجي لوقت الصحور
تبسملها و خرج مخليها فالبيت، بغاها ترتاح و فنفس الوقت تحس بالامان بما انه غايجي تالصحور يعني غاينعس بأدب جنبها حيت ورا الصحور غايأذن الفجر و غايبدا صيامه!
هادشي اللي فكرات فيه و هي مباشرة فالفطور ديالها .. حتى قفزات مخلوعة اول ماسمعات صوت صرخة عااالية مسمووعة من التحت جايا .. وقفات بسرعة يدها عند قلبها و مشات خارجة من البيت، بانلها شعيب نازل كايجري من صوت الغوات اللي تسمع تبعاته بدورها كاتجري تا بانتلهم يسرى جنب رحمة اللي طايحة فالارض مرخية، شعيب تخلع عليها مشا عندها كايجري شدها عنده و هيام لحقات عليه كاطل عليها
أنت تقرأ
أهل لغرام 💍 ❤
Romanceقررت نحط هاد القصة هادي! هي جزء ثاني لقصة القابلة رحمة و لكن غانشير لنقطة مهمة نتمنى تقراوها! الناس اللي ماقراوهش الجزء الاول يقدرو يبداو معانا هاد الجزء حيت قصة مغايرة تماما، احداث بعاد على الجزء الاول و اي حاجة غاتحتاجو تفهموها غاتفهملكم مع الاحدا...
