كتبت في حسابي حق الفيس :
البنات زي الورد بالظبط ، بحبوا الرقه و العنايه و اللطافه و الواحده على قدر ما تديها حب و حنان بتنور و تتفتح زي الورد لمن تسقيهو مويه 💜🌷
نحنا بسيطات شديد ، صح بنزعل بسرعه و من اتفه الحاجات و أبسطها و مستحيل من أول مره نقول المزعلنا شنو بس البسايرنا و بقرب مننا بتأكد تماماً من إننا فعلاً زي الورد ، لطيفات و رقيقات 🌷💜
كتبت الكلام دا و أنا في مواصلات الكبري ، لمن وصلت طقطقت و نزلت في المشتل ، طبعاً عندنا مشتل هناك حقنا أنا و أروى صحبتي ، طبعاً كالعاده هي لسه ما جات ! مع اننا ساكنين جنب بعض بس هي كسلانه و بتحب تجي متأخره ، اول ما فتحت المشتل و دخلت حسيت بالسعاده ، المشتل دا أكتر مكان أنا بحبو و بزرع جواي البهجه و السعاده ، بحب منظر الشتلات و هي منوره و مخضره شديد و منظر الورود بمختلف ألوانها و أحجامها ، المهم شلت مويه و بقيت لافه و بسقي في الشجر لحد ما أروى جات ، طبعاً هي وحده مجنونه رسمي أول ما تجي داخله كدا بأعلى صوت بتقول لي مهاااااويييي أنا جيييت مشتاقييين والله ، قلت ليها تعالي تعالي هاك اسقي الشجر دا ، قالت لي خليك من دا ما وريتك الحصل معاي شنو في المواصلات ...قلت ليها دقيقه دقيقه أكيد لقيتي ليك واحد سمح في المواصلات و أكيد أكلتيهو أكل بنظراتك البلهاء ديك ، قالت لي هيييي عرفتي كيف ؟؟
قلت ليها قالت لي العصفوره ! قالت لي خمنتي لكن تخمينك صحيح ، المهم خليني أتم ليك ، طبعاً الولد سمح سماحه لمن غلط كان قاعد في الكراسي المقابله لي و أنا النصيحه غلبني أرفع عيني عنو و هو ذاتو اتكسر فيني لأنو لمن نزل دفع لي 🙈
قلت ليها بعد نظراتك البلهاء ليهو دي و منظرك البطال دا أكيد افتكرك وحده مسكينه ما عندك حق المواصلات عشان كدا دفع ليك ، ضربتني في راسي و قالت لي لو كان ما عندي حق مواصلات هل كنت ح أركب ؟! من بيتنا ذاتو ما كنت ح أطلع ! .....واي بس ما شفتيهو لمن نزل و دفع لي كان بعاين لي كيف 🙈
كنت بعاين للسماء و أنا بسمع في كلامها ، قلت ليها السحاب شايل شكلها حتمطر ، قالت لي بتسفهيني لييييه انتي ؟؟
قلت ليها أروى ياخ ! ما خلاص سمعتك و عرفت الحصل معاك !! قالت لي اوكي تعالي نتصور ، المهم شلنا لينا شتلات و اتصورنا بيهم و هي نزلتهم في حسابها حق الإنستا و أنا نزلتها في الفيس و كتبت عليها ورد شايل ورد 🌷
أروى لمن شافت البوست قالت لي ابو الثقه في النفس ذاتو ، قلت ليها لازم لازم 😂🙈 ..وقفت على حيلها و عاينت للعبايه المكرفسه و المغبره الهي لابساها و قالت لي قولك منظري بالعبايه الوسخانه دي ح يخلي زول يعاين لي ؟؟ قلت ليها أكيد لااااا ، ضربتني على راسي و قالت لي دائماً بسأل الناس الغلط ، المهم انا واثقه اني جميله في كل الحالات حتى لو لبست شوال خيش بطلع حلوه ، قلت ليها طيب بتسألي ليييه ؟؟....
