برضو ما إتكلمت ، من دون تردد ضماني عليهو و بقى يحاول يهدي فيني و أنا ما قادره أسكت نفسي ...
فجأه أروى جات و قالت لي مها !
زحيت من منيب و مشيت حضنتها هي و قعدت أبكي و لحد اللحظه ديك ما إستوعبت الحصل ، أروى قالت لي يا مها مرام كويسه ....لمن قالت كدا طوالي رفعت راسي و قلت ليها ما تكذبي علي ، قالت لي والله العظيم ما بكذب عليك ، هي ما عليها شي بس جناها ضاع .....قلبي وجعني والله بس ارتحت شويه لمن عرفت انها ما ماتت ، من مكاني داك و طوالي مشيت عليهم ، لقيتهم قعدوا على الكراسي لأنو شبه اتطمنوا على مرام بس وفاة الجنين زعلتهم و ماهر كان متأثر شديد ، مشيت حضنت أمي بس و قعدت جنبها ، بعد مسافه كدا الدكاتره طلعوا من غرفة العمليات و نقلوا مرام لغرفة العنايه المكثفه ، ماهر جاط و هاج فيهم شديد و قال ليهم انتوا بتكذبوا علينا ليه ؟؟ بتقولوا لينا إنها كويسه و هي عكس كدا ليه ، جاط شديد إلا أبوي و حسام ولد خالة مرام مسكوهو و مشوا بيهو بعيد ، محمد أخوها قال للدكتور خليك صريح معاي ، أختي كويسه ولا لا !؟؟ الدكتور قال ليهو حقيقة هي اتجاوزت مرحلة الخطر بس برضو لازم نراقب وضعها لحد ما نطمن عليها تماماً عشان كدا نقلناها لغرفة العنايه المكثفه....
المهم اليوم داك قعدنا في المستشفى لحد المغرب ، بعدها أبوي قال لينا أرجعوا البيت ، ما بنقدر كلنا نقعد في المستشفى ، المهم كلهم في البدايه عاندوا و أي زول قال عايز يقعد في النهايه أبوي و أبو مرام حسموا قرارهم و قالوا محمد و ماهر بس هم الح يقعدوا ، المهم أنا و أمي و أبوي رجعنا البيت و معانا حمودي و ديلك رجعوا مع أبوهم رغم انهم كانوا عايزين يسوقوا حمودي معاهم لكن هو رفض و مشى معانا نحنا، طبعاً أروى رجعت قبلينا لأنو الوقت اتأخر....
لمن رجعنا البيت ياداب استوعبت الحصل !! نططت عيوني و قلت ما معقوله !! منيب حضني و أنا ما مانعت!!؟؟ لا و دا كلو حصل قدام حمودي و أروى كمان !!
وااااي أنا دا شنو !!؟ أنا ما كنت واعيه لحاجه و الحاله الكنت فيها قفلت مخي و ما خلتني افهم الحاصل بس هو كيف يسمح لنفسو يقرب مني !!
حمودي لو جاب سيره لأهلي اقول ليهم شنو أنا !؟؟
بعد حكاية نص ساعه كدا جاتنا أروى مع أمها و أختها أريج عشان يتطمنوا على مرام و يعرفوا مننا الحصل ليها ، أروى كانت قاعده جنبي ، ف أثناء ما ناس أمي بتكلموا ، قالت لي بصوت واطي : واااي دا شنو الحصل قبيل !؟؟
قلت ليها اسكتي ساي أنا ذاتي ياداب استوعبت الحصل ! ما عارفه كيف بس هو اتجاوز حدودو معاي ! ما تبرير لنفسي لكن أنا بالجد ما كنت واعيه للحصل ، قالت لي منيب بالغ والله و المحير إنو بعد ما انتي مشيتي من جنبنا لا خجل مني لا حاول يبرر لي العملو ! حسسني كأنو ما عامل شي !! من بعدك مشى طوالي !!
