طبعاً استغربت!
قالت لي أنا تالا و دي تنزيل و نحنا أخوات منيب و دي أمنا....اتفاجأت بالجد !! قلت يعني هي و دانه لمن لاقوني في الموقف كانوا عارفين أنا منو !! عشان كدا كانوا بعاينوا لي بالنظرات الغريبه ديك !!
تالا قالت لي ايوه كنا عارفنك بس أكيد ما ح نفاجئك طوالي كدا و نقول ليك نحنا منو في نص المحطه..
هزيت ليها راسي بس و بتردد قلت ليهم نورتو والله ، تنزيل قالت لي لينا كم يوم كدا مخططين نجيك لمن عرفنا إنك هنا بس منيب ما سمح لينا و هسي جينا من دون علموا ، قلت ليها ما حصل كلمني ، ما كان يمنعكم والله..
المهم قعدوا يتكلموا معاي و أنا بالعافيه برد عليهم ، أمهم قالت لي يعني انتوا هسي رجعتوا ولا دا اسمو شنو ؟؟ طبعاً ما عرفت اقول ليها شنو لأني ذاتي ما عارفه قعدتي في البيت دا اسمها شنو ، تالا قالت ليها أكيد يا أمي المهم و كويس إنهم رجعوا لبعض ، حسيت الجو مكهرب و إنو أمهم ما طايقاني لأنها كانت بتعاين لي بس و ما بتتكلم معاي كتير ، المهم تالا مشت معاي المطبخ و عملنا وجبه خفيفه كدا مع شاي و جبنه و كيك ، تالا دي ظريفه كانت بتحاول تمتص توتري و تحسسني انو الموضوع عادي و إنو لا هم غريبين عني لا أنا غريبه بالنسبه ليهم ، المهم بعد ما شربوا معاي الجبنه اتونسوا و مشوا ، قدمتهم لحد الباب ، تالا قالت لي الزياره الجايه عليك انتي ، قلت ليها إن شاء الله ...بعد ما طلعوا الحرس قفلوا الباب ، رجعت جوه و بقيت أفكر في ونستهم معاي و أحلل في نظراتهم و تصرفاتهم ، طبعاً من الروايه الكانت في الدفتر داك عرفت إنو فعلاً دي تالا لأنها كانت مذكوره مره في الروايه و تنزيل!!......معقوله دي الكانت صحبتي المقربه !!!
المهم المساء منيب جا داخل ، كنت بحضر ، قال لي مساء الخير و طوالي مشى من جنبي و ما إنتظرني أرد عليهو حتى !!
قلت أجييي! دا مالو كمان !
المهم قعد حكاية ربع ساعه كدا و ما طلع من غرفتو ، قلبي قال لي قومي جهزي ليهو أكل بس عقلي قال لي لا خليهو على راحتو ...حصل صراع بين عقلي و قلبي و في الآخر مشيت المطبخ و جهزت ليهو أكل و شلتو ليهو في صينيه ، لمن وصلت غرفتو سامعه جايط شديد كان بتكلم بالتلفون و هو متعصب ، قال للزول البتكلم معاهو : أنا ما بخاف من زول و ما أنا الباخد رشاوي ، خليهم يعملوا العايزنوا و أنا واقف ليهم بالمرصاد و ح أكون ليهم زي شوكة الحوت ، أصلاً البلد دي ماف زول دمرها غير الناس العواليق الذيهم ديل ....ضربت الباب و بعدها دخلت طوالي ، إتلفت عاين لي و تاني لف مني و قال للزول البتكلم معاهو : تمام بكرا لمن ألاقيك ح أتناقش معاك ، جا علي و قال لي ما عايز شي أنا رجعيها ....كان متضايق شديد
قربت أبكي والله لأني عملت ليهو الأكل دا و هو من دون ما يعاين ليهو ذاتو قال لي رجعيهو ، من دون ما إتكلم معاهو رجعت بالصينيه بس وقفني جنب الباب و قال لي انتي ناس أمي اليوم جوك هنا ؟؟
