لمن وصلنا أنا خلاص ما قدرت أمسك نفسي ف طوالي إنفقعت بالبكى ، منيب إتلفت علي و قال لي و هو بضحك دي دموع الفرحه ولا شنو !
كلامو غاظني و وجعني شديد ، قلت ليهو و أنا مقهوره : دي دموع الندم ، ندمانه لأني صدقتك و إنخدعت فيك ، ندمانه لأني امتثلت لأوامرك و ما عارضتك و رضيت اقعد معاك في بيتك ....اقول ليك حاجه انت خساره فيك الحب .، لأنك واحد منافق و ممثل شاطر ، أنا بس عايزا أعرف استفدتي شنو من التمثيليه دي ؟ كنت عايز مني شنو و انت عينك على وحده تانيه !! استفدت شنو بس فهمني!! ، قال لي الوحده دي منو دي العيني عليها ؟؟! قلت ليهو بطل تمثيل لأنك شفتك و أبدا ماف مجال للنكران ، قال لي شفتيني وين ؟☺️قلت ليهو شفتك واقف معاها في الشارع مرتين و إياك تحاول تنكر و عموماً كويس إني شفتك بعيني عشان ما تكذب و تقعد تمثل لي و توهمني بحبك الوهمي دا ، قال لي دا كلام غيره..
طبعاً غاظني لأنو كان بتكلم ببرود ! قلت ليهو ياريت لو أبقى عديمة ضمير زيك ، ياريت لو دمي بارد زي دمك ، قال لي ما فاهمك أنا مناسبة الكلام دا كلو شنو ؟؟ مش انتي زهجتي مني و فوقها بتكرهيني كمان و انتي العايزا الطلاق دا ؟؟!
ما رديت عليهو بس دموعي ما وقفت ، أول ما مسكت مقبض العربيه عشان أنزل أبى يتفتح لي ، عاينت ل منيب و قلت ليهو افتح الزفت دا ياخ ...ضحك و قال لي هسي انتي متضايقه كدا مالك !؟ مفروض تكوني أسعد إنسانه لأنك اتحررتي مني ، قلت ليهو منيب ما تخليني أعيد كلامي تاني ، لمن فك تأمين العربيه ، قال لي بعد دا خلي بالك من نفسك ، أنا ح أدخل معاك عشان ننتهي من الكلام دا كلو و انتي توقعي على الورقه و بعدها ح اسافر برا السودان طوالي و يمكن أرجع بعد سنوات أو ما أرجع خالص....لمن قال كدا قلبي قبضني والله ، ما مصدقه إنو دي آخر لحظاتي معاهو ...قالت ليهو ئهه طبيعي تسافر بعد ما جوطت لي حياتي ، يعني لو كان من زمان سمعت كلام أهلي و طلقتني ما كان دا كلو حصل و أصلا ظهورك لا قدم لا أخر ، قال لي ما فات شي هسي طلقتك ، طبعاً هنا قلبي وجعني بالجد ، إنفعلت و قلت ليهو على فكره انت حقير بالجد يا منيب و ما تستاهل ذرة حب ، قال لي على كل الأحوال انتي ما بتحبيني ، قلت ليهو عرفت كيييف !؟ ولا بس فالح تقول أي كلام عشان تطلقني غلطانه ، قال لي انتي قلتي كدا ☺️
سكت مسافه قال لي قبل ما ننزل حابي بس اقول ليك إنو أهلي يلي هم أمي و أخواتي ما عملوا ليك أي حاجه ايوه كان في مشاكل و نقاشات بتحصل بيناتكم بس صدقيني مستحيل يصلوا لدرجة انهم يعملوا ليك عمل ، انت زمان كنتي مصدقه الحاجه دي و واثقه انو ديل ما هم العملوا ليك كدا و للسبب دا ما كنت راضيه تمشي مع أهلك لمن كانوا بجوك في غيابي عشان ترجعي معاهم بيت أبوك ...قلت ليها كذاب و أنا تاني ما ح أصدقك ، و أهلك هم الورا الحصل لي حتى الحادث هم السبب... طبعاً ساي قلت ليهو كدا عشان أوجع ليهو قلبو و أحسسو اني ما واثقه في كلامو و إنو أي حاجه يقولا لي ح أصدق عكسها....قال لي لو في زول عايزا تلوميهو على الحصل ف لوميني أنا لأني خليت الباب فاتح و لأني جدعت مفاتيح عربيتي على السرير رغم علمي بالحالات الكانت بتجيك و تخليك ما واعيه للبتعمليهو ، تفاصيل اليوم داك لسه في بالي ، بتذكر و انا راجع على البيت شايفك ماشه في الشارع من دون توب ، رجعتك معاي البيت و رغم اني ما كنت مقتنعت بكلام السحر و العمل القالتو لي أمي بس وافقت أنها تجيب زول يعمل ليك رقيه شرعيه ، أنا كنت مفتكر إنو البحصل معاك دا مرض و كنت مخطط اسافر ليك برا السودان و هناك نعمل ليك صور مقطعيه للرأس ، المهم هديتي شويه بعد الرقيه و انا ما ختيت في بالي إنو ممكن يحصل ليك شي مسافة ادخل الحمام و أطلع ، الحاله الكنتي فيها كانت أشبه ب اللاوعي كأنو في زول بحركك بالغصب و بتحكم فيك ، المهم شلتي مفتاح العربيه و طلعت ليها برا و حصل الحصل 💔
