المهم بعد ما خلصت المحاضره الأولى ، فجأه كدا تلفوني رن ، قلت أكيد دا منيب ، بس لمن طلعت تلفوني من الشنطه لقيتها أمي ، لمن رديت عليها قالت لي نحنا في المستشفى ، اتخلعت و قلت ليها شنو ؟؟ قالت لي حمودي دا معوق ، اتشكل ليهو مع أولاد و فلقوهو في راسو و هسي نحنا في المستشفى ، قلت ليها حمودي كويس هسي في مستشفى وين انتوا هسي ؟؟ ورتني اسم المستشفى و أنا طوالي من مكاني داك مشيت ركبت مواصلات و طول الطريق كنت بتصل عليهم و بطمن على حمودي ، ماهر قال لي ما تجي حمودي كويس هسي و أمي ذاتو ما كان تتصل عليك بس هي خافة من منظر الدم و إتخلعت عشان كدا إتصلت عليك ، قلت ليهو جايه ما بقدر اقعد بقلقي دا ، المهم لمن وصلت المستشفى إتصلت على ماهر و وصف لي هم وين و طوالي مشيت ليهم و لقيت مرام دي تبكي قدرتها ، قلت لأمي حمودي كيف هسي و اتشكل مع منو هو ؟؟ قالت لي ولد أميره جاب ليهو أولاد كبار و إتلموا في حمودي و دقوهو ، ماهر قال ليها أقسم بالله ما أخليهم و حالياً الشرطه بتفتش عليهم ، ياخ ما معقوله أولاد كبار و بالغين يتلموا ليهم في شافع !!
قلت ليهو حسبي الله فيهم !! ولد أميره دا مالو مع حمودي كمان !! مرام قالت لي دا كلو بسببك لأنك أديتيهو فرصه و خليتيهو يتمادى اكتر على حمودي ، انتي امبارح وقت ما بتقدري تعدلي طالعه ليهم ليه ؟؟! امو أنا ولا انتي عشان تمشي و تخليهو يتصالح مع الولد رغم انو غلط عليهو ! قلت ليها لو أنا قصرت فإنتي و مياسم ما قصرتوا و طلعتوا شاكلتوهو و شاكلتو أمو ف أنا ذنبي شنو ؟؟ قالت لي لو من البدايه خليتي حمودي يتسدى حقو ما كان انا طلعت و إتدخلت و اشتبكت مع أمو ، قلت ليها يعني لو كان خليت حمودي يضربو الولد ما ح يحاول ياخد حقو !! المهم انتي على كل الأحوال ح ترمي اللوم علي عشان كدا ما حابه اتناقش معاك ، قالت لي تتناقشي كيف و انتي غلطانه ، أمي قالت ليها احسن ليك يا مرام تحترمي نفسك و تلمي لسانك دا عليك ، انتي وحده متسبله بس و بتحبي ترمي مشاكلك على غيرك ، هسي مها علاقتها شنو بالأولاد الضربوا حمودي ! من وين ل وين جايه ترمي عليها اللوم ! مياسم قالت ليها ليييه ما بتلومي نفسك ! طوالي جايه ترمي اللوم على مها لأنها بتتحملك و بتسكت ليك حتى و إنتي غلطانه !.... طبعاً مرام سكتت و ما قالت حاجه و ماهر دا بس كان بعاين ليها بنظرات حاده بس ما عايز يتناقش معاها ، المهم فجأه تلفوني رن ، من دون ما أعاين دخلت يدي جوه الشنطه و عملتو صامت و بالي كلو بقى مع حمودي ، المهم لحد المسا كدا طلعنا بيهو من المستشفى و ماهر حالف إنو ما يخلي الأولاد الإتفقوا عليهو و ضربوهو ، المهم باقي اليوم كلو قضيناهو مع حمودي و أنا نسيت موضوع منيب دا على الآخر ، ما إتذكرتو إلا لمن جيت داخله الغرفه بعد صلاة العشا ، مشيت طلعت تلفوني من الشنطه لقيت كميه من المكالمات منو ، رجعت إتصلت عليهو كتييير بس ما رد علي ، دخلت الواتس و رسلت ليهو منيب معليش بس حصل لي ظرف و نسيت الموضوع عديل ....كان متصل الآن بس ما رد علي ، تاني رسلت ليهو و قلت ليهو أنا بالجد آسفه يا منيب بس الموضوع ما كان بيدي ، دخل قرأ رسايلي بس ما رد علي ، بقيت أعتذر منو كدا لمن فترت و هو تاني ما كلف نفسو يقرا رسايلي ....المهم في اليوم البعدو ما كان عندي جامعه ف طوالي مشيت المشتل ، طبعاً أروى قبلوها في الشغل ، فلمن مشيت المشتل اتصلت عليها و كلمتها لمن تخلص تجي غاشياني و نمشي سوا ، قالت لي طيب ، بعدها إتصلت على منيب بس ما رد علي و ما كان داخل واتس ....لمن الساعه 3 جات ، أروى جاتني ، سلمت عليها و حكيت ليها الحصل ، قالت لي هو مفروض يتفهمك و يسألك عن الظرف المنعك ! قلت ليها مفروض ! بس شكلو زعل مني عشان كدا ما برد على مكالماتي و رسايلي ، قالت لي يعني خلاص العولاق بدا !!...قلت ليها هسي ما عارفه اصالحو كيف ، قالت لي انتي يا مها ما عايزا تواجهي أهلك و توريهم انك عرفتي الحقيقه! يعني لمتين انتي و منيب حتقعدوا كدا !!؟ قلت ليها ما عارفه والله و منيب ذاتو نبهني ما أجيب ليهم سيره ! قالت لي ليه ؟؟
