طبعاً عقلي جاط و أفكاري اتضاربت ! قبل ما اسأل حمودي عن حاجه قال لي جونا ضيوف يا عمتو ، قلت ليهو حمودي دقيقه ، طوالي قفل الخط !!
قلت إذا حمودي بعرف منيب معناها كمان منيب بعرف حمودي و معناها أهلي بعرفوهو ؟؟؟!
طيب ليه ما جاب لي سيره و ليه ما فهمني هو منو !! اذا هو بيعرف أهلي ف ليه لمن كنا في المستشفى ما مشى عليهم !!...اتذكرت لمن ركبنا معاهو أنا و أروى و سألني مرام مالا يعني كأنو بعرفها !! انا الوقت داك ما ختيت حاجه في بالي لأنو أولا بالي كلو كان مع مرام و تاني حاجه هي اني افتكرت انو عرف اسم مرام مني عشان أنا ذكرتو قدامو !!
أفكاري بقت تضارب مع بعض و غلبني أصل ل نتيجه ! احترت أسأل منو !!
طوالي إتصلت على أروى و حكيت ليها الحصل ، قالت لي زي ما إتوقعت و هسي اتضح ليك انو منيب دا جزو من ماضيك الكان قبل فقدانك للذاكره و بما إنو حمودي بعرفو معناها أهلك كمان بعرفوهو ، قلت ليها طيب ليه ما حكوا لي عنو ؟؟
قالت لي يحكوا ليك شنو ؟؟ دا برجعنا لنقطة هو منو و علاقتو بيك شنو تحديداً ، يعني اذا كان بعرفكم معرفه ساي ف طبيعي أهلك ما يجيبوا ليك سيرتو ساي كدا و يقولوا ليك نحنا بنعرف منيب ! يمكن هو من معارفكم و كان بحبك و أهلك ما عارفين ، بس هو ليه ما قال ليك انو بعرفك و بعرف أهلك ؟؟!..
قلت ليها ما عارفه والله دا المحيرني!!
قالت لي ح تسأليهو ؟؟ قلت ليها اول شي حابه اسأل مرام ، بعدها ح أشوف إذا الموضوع بحتاج اني اسألو عن حاجه ولا لا ، قالت لي ياااا بختك الضابط الحلو داك طلع بعرفكم و بحبك 🙈
قلت ليها ياااا زوله متين قال ليك كدا ، بطلي ياخ ! ضحكت و قالت لي خجلتي من كلامي ولا شنو ؟؟ قلت ليها أروى يااااخ!!
المهم لمن ماهر جا راجع من الشغل و أرتاح شويه و بعدها جهز نفسو عشان يمشي يجيب حمودي ، قلت ليهو أنا ماشه معاك ، قال لي طيب استعجلي ، المهم سريع سريع كدا جهزت نفسي و مشيت ركبت معاهو ، أول ما دور العربيه كدا قال اسمعيني ، قلت ليهو هااا!؟؟
قال لي حاولي اقنعي لي مرام عشان ترجع معانا ، ضحكت و قلت ليهو و انت بتخجل تحنسها ولا شنو ؟!!
قال لي ما كدا بس من طلعت من المستشفى بقت تاني ما بتتجاوب معاي و لو اتصلت عليها بتتكلم معاي شويه و بتدي التلفون ل حمودي !! ايوه انا مقدر حالتها و عارف انو في اكتئاب بحصل للوحده لمن تفقد جناها و أنا ما عايز شي غير أرجعها معاي البيت ، قلت ليهو الله الله على الحب !! غيتو لو ما كنت أخوي كنت طوالي عرستك ، ضحك و قال لي بالجد انتي مجنونه ، قلت ليهو على الأقل كنت ح تفك لي بورتي دي بدل ما أنا قاعده كدا و كل القدري و الأصغر مني عرسوا ، عاد إلا أنا شغاله أهني و أبارك 😂😂
