بقيت بين أرد و ما أرد في النهايه ما رديت عليهو و عملت تلفوني صامت رغم انو في صوت جواي بقول لي ردي عليهو بس ما عملت كدا ....المهم لمن وقفت مكالماتو شلت تلفوني و إتصلت على مرام و قعدت أحنس فيها عشان تحل سوء التفاهم الحصل بينها و بين ماهر أخوي و ترجع البيت ، قالت لي أخوك ما عايزني يا مها و أنا ما ح أفرض عليهو نفسي أكتر من كدا ، هو لو عايزني بقدر يجيني ، بقدر يتصل علي و يراضيني ، بقدر يحل المشكله الحصلت بيناتنا بس هو ما عايزا كدا و أنا مخلياهو على راحتو و خليها تجي كيف ما تجي ، بقى ما بهمني شي غير حمودي ولدي...
قلت ليها ما تصعبيها يا مرام ، لو بالجد ولدك بهمك ما بتقعدي مكتفه كدا و أساساً ما ح تفكري في الإنفصال.....قالت لي يعني أعمل شنو ؟؟
اشحد اخوك شحده عشان يتحرك و يعمل حاجه ؟؟ و بعدين انتوا ليهو ما بتلوموا ماهر ؟! ليه دائماً شايفنوا الصح و انا الغلط ؟!!.....طبيعي لأنو ولدكم
قلت ليها و انتي ما غريبه عننا و أمي بتعتبرك زي بتها ، الصح منو و الغلط منو دي حاجه بتعرفوها انتوا الإتنين ، نحنا دا كلو ما بهمنا ، همنا الوحيد هو كيف انتوا ترجعوا لبعض ، قالت لي ما ظنيت ، شكلها دي النهايه.....قلت ليها إلا لو انتي عايزا كدا ، قالت لي الموضوع ما بيدي و ما فرقت أنا عايزا شنو ، قلت ليها لا بتفرق و الموضوع بيدك ، بتقدري في أي لحظه تلمي ملابسك و ترجعي بيتك و ماف زول ح يسألك ....ضحكت ضحكه باهته كدا و قالت لي الجايه من الشارع ما بترضى ترخص نفسها كدا ، الموضوع خلاص كبر يا مها و أهلي استلموهو و أنا تاني غير اتفرج ما بقدر أعمل شي ، قلت ليها ما تقولي كدا يا مرام ....قالت لي المهم طمنيني على حمودي ، قلت ليها كويس الحمدلله و هسي نايم ، قالت لي بتقدري تجيبيهو لي بكرا ؟؟
قلت ليها إن شاء الله ، المهم بعد ما قفلت منها كدا تاني تلفوني رن !! و المتصل كان الضابط منيب !!
بتردد شلت تلفوني و فتحت الخط
قال لي بزهج ياخ من قبيل جادعه الزفت دا وين ؟!!.... طبعاً إتخلعت و ألف استفهام بقى في بالي !
معرفة من متين دي لمن يتكلم معاي كدا ؟!! لساني إتربط و ما قدرت أقول حاجه ! ...قال لي آسف ما قصدي بس عشان زهجت من الإتصال و انتي ما بتردي ....قلت ليهو بس ماف شي جابرك !
قال لي المهم بقيتي كيف ؟؟
قلت ليهو تمام
قال لي ما تكذبي علي !!
أخدت نفس و قلت ليهو انت منو ؟؟
قال لي مها بطلي ، انتي عارفه أنا منو
قلت ليهو عارفاك يا حضرة الضابط منيب بس انت ما فهمت سؤالي ...
سكت ما رد علي و بعد مسافه قفل الخط ، في كل مره بحيرني فيها زياده ....يعني اذا كان بحبني زي ما قالت أروى ف ليه ما إعترف لي و فضل انو يتصرف بغرابه و يتعامل معاي بعشوائيه و يتصل علي من دون سبب و من دون ما يفهمني أنا شنو بالنسبه ليهو أو هو غايتو شنو من دا كلو ، لأنو ما معقوله تتصل على زول و تديهو إهتمام مفرط من دون ما يكون في سابق معرفه بيناتنكم ! يعني لا معرفتي لا علاقتي بيهو وصلة لدرجة انو يتصل علي زي ما عايز و يتزهج فيني عشان ما رديت !! محسسني كأني بعرفو أو ليهو حق علي عشان كدا بتزهج ساي و بحشر نفسو !!
