في اليوم البعدو لمن صحيت من النوم ما لقيت حماده جنبي ، قلت معناها بكون مشى لأمو فوق ، المهم بعد اتسوكت و صليت مشيت شربت الشاي مع أمي و أبوي و حكيت ليهم عن حماده و القالو لي أمبارح ، أبوي قال لي مشاكل أمو و أبو الكتيره دي طبيعي تأثر عليهو ، أمي قالت بجنس مشاكلهم دي ح يعملوا للولد دا نفسيات ، قلت ليهم عشان كدا مفروض تتكلموا معاهم انتوا الإتنين ، أمي قالت لي هسي لو إتكلمنا معاها تقول قاعدين نتدخل بيناتهم ، أبوي قال ليها خلاص أنا بتكلم مع ماهر ،، و نحنا بنتكلم كدا ماهر جا نازل و هو شايل محمد ولدو و بشاغل فيهو ، صبح علينا و قعد ، قلت ليهو حماده انت طلعت متين من غرفتي ؟!! ماهر قال لي أنا الجيت شلتو ، قلت ليهو عشان كدا صحيت و ما لقيتو ، أبوي قال ل ماهر بعد شويه عايز اتكلم معاك ، قال ليهو خير يا أبوي ، قلت ليهو يا أبوي أنا شايفه إنو احسن ننادي مرام و انت اتكلم معاهم الإتنين ، هز لي راسو بس ، شلت كباية شاي لبن و بسكويت و سقت معاي حماده ل غرفتي ، دخلت و أديتو البسكويت و الشاي و مشيت فوق ل مرام ، لقيتها بتلف في شعرها و هي زهجانه ، قلت ليها مرام صباح الخير ، قالت لي اهلين صباح النور ، قلت ليها أبوي عايزك تحت و طوالي طلعت من غرفتها و مشيت قعدت مع حماده لأني ما عايزا اسمع كلامهم البقولوا و نقاشهم الطويل و لأني عارفه إنو ماهر و مرام هسي ح يتشاكلوا و أصواتهم ح تعلى و أنا زي حماده بالظبط ما بحب الكواريك و المشاكل ، و فعلاً دا الحصل ، بعد مسافه بقينا سامعين صوت ماهر أخوي جايط مع مرام و صوت أبوي و هو بقول ليهم وطوا أصواتكم ياخ ما معقوله معاكم .....المهم بقيت ألهي في حماده ، قلت ليهو أرح أجهزك قبل ما الترحيل يجيك و فعلاً دخلتو الحمام و مشيت جبت ليهو ملابس الروضه و كويتهم ليهو سرعه سرعه و مسحتو و لبستو و رشيت عليهو عطر ، ما طلعنا من الغرفه إلا لمن اتأكدت انو نقاشاتهم و كواريكهم إنتهت ، لمن نزلنا لقينا أبوي و أمي قاعدين و متمحنين ، قلت ليهم ما كان في فايده صح ؟؟ أمي قالت هي غير الكواريك عندها شنو ، هدا زهجتو زياده و خلتو يمشي الشغل من دون ما يشرب الشاي و.....أبوي قاطعها و أشر ليها بعيونو على حماده ، سقتو و مشيت وقفت بيهو جنب الباب لحد ما الترحيل جا ، بوستو و خليتو يمشي يركب ، رجعت دخلت جوه و قلت ليهم غيتو الولد دا هو الوحيد ال حيضيع في وسط الحاصل دا كلو.....المهم أنا ماشه أجهز نفسي عشان ح أمشي المشتل ، أول ما إتحركت كدا أبوي قال لي تعالي ، لمن مشيت ليهو قال لي اقعدي ، قعدت و أنا بعاين بإستغراب ل أمي ، قال لي انتي المشتل دا مستفيده منو شنو ؟؟ هسي لو رجعتي قريتي ما أحسن ليك ؟!
قلت ليهو اقرا شنو يا أبوي و أنا حاجه ما متذكراها ، يعني كأني إنولدت من جديد و كل العملتو و الوصلت ليهو اتمحى في ساعات ، قال لي المشكله وين أبدي من البدايه !...قلت ليهو انت ما فاهمني يا أبوي و ما عارف الموضوع صعب علي كيف ، أمي قالت لي ما صعب ولا شي انتي بس ختي النيه و أبدي من جديد ، قلت ليهم قبل كدا سمعت كلامكم و مشيت إمتحنت تالت تاني و قدمت للجامعه و ما قدرت أكمل ، أنا لا عندي شغف لا حماس لا هدف ، و الله لا يوريكم إحساس الفراغ و التيه البحس بيهو الزول الفاقد الذاكره 💔
