بقيت أعاين ليهم و هم بتونسوا مع بعض ، فجأه الضابط عاين لي و قال لي مش قلت ليك يومين و ما ألقى المشتل دا هنا ؟؟
طبعاً ما رديت عليهو ، أروى قالت ليهو انت ليه عايزنا نمشي من هنا !! قال ليها عشان عارفكم ما بتسمعوا الكلام عملت اللازم ، قالت ليهو يعني انت الشلت رواكيب القهاوي دي من هنا ؟؟ قال ليها ايوه !
قلت ليهو بالجد حرام عليك ياخ قطعت ليهم رزقهم ! النسوان المساكين ديل يلقوها منك ولا من الظروف الجبرتهم يشتغلوا ستات شاي ! ما عندك ضمير انت ؟
يعني دا كلو عشان الولدين ديلك جوا لاحقني!؟
قال لي عايني أنا ما قطعت رزق زول كل العملتو اني نقلتهم من هنا عشان كانوا عاملين زحمه و لمه لكل العواليق و الصعاليق و الناس المنطقه دي حصل و شكوا من السكارى و الصعاليق البقعدوا في القهاوي دي ، يعني العملتو دا ما ل سواد عيونك..... ، أحرجني طبعاً ، لويت ليهو خشمي و سكته ، أروى قالت ليهو انت إنسان غريب والله ، قال ليها كيف ؟
قالت ليهو كدا دا !! انت ما مفهوم ، مرات بحس اني فهمتك و عرفت شخصيتك بس بتفاجئني بتصرف يخليني احتار فيك ! صدق إنو يوم نهرتني و رفعت أصبعك علي قربت ابكي بس عملت فيها صنديده ، ضحك و قال ليها الخوف كان واضح عليك و حقيقة يعني أنا ما كان قصدي اعمل العملتو بس انتي وحده لسانها طويل ، قالت ليهو فعلاً لساني طويل و انت قربت تقصو لي .....المهم هم بقوا يتكلموا كدا و أنا بس بعاين ليهم ، حسيت أروى مبسوطه بالونسه معاهو و هو رغم انو بجينا على طول بس دي أول مره أحسو مرتاح كدا و بتونس بنفس فاتحه!!
أروى قالت ليهو اليوم شكلك مبسوط و رايق ، قال ليها فعلاً عشان كدا مزاجي مظبوط ، قالت ليهو ممكن سؤال ! قال ليها اسئلتك بتخوفي ، قالت ليهو يعني انت بتخاف ؟؟
قال ليها أكيد لا , قالت ليهو سؤالي يمكن ساذج شويه او ممكن تشوفو عبيط بس انت ليه على طول بتجينا في المشتل ؟؟
قال ليها جيتي بتضايقكم ؟...قال كدا و عاين لي !
قالت ليهو لا لا بس غريبه انك على طول بتجينا لدرجة أننا بقينا نعرف اسامي بعض 😅
قال ليها المنطقه دي و المكان دا بدخلوا مزاجي و موقع المشتل ممتاز و ما بحس بالراحه إلا لمن أدخل المشتل دا ، قالت ليهو خلاص تاني ح ندخلك بقروش ، قال ليها ماديه ، ضحكت و قالت ليهو طيب أحكي لينا عن حياتك ، قال ليها ما بحب أحكي عن حياتي .....قالت ليهو كسفتني ...لكن غالباً الناس البتقول كدا هي الناس الأخدت شاااااكوش و ظاهر إنو في وحده دقت بيك الواطه ، قال ليها أنا ماف بت بتشوشكني ، قالت ليهو برضو الناس ال.....قاطعها و قال ليها ما أنا البتشوشكني بت ، قالت ليهو الثقه الزايده ما كويسه....
و هم بتكلموا كدا أنا من دون ما أحس بقيت أعاين ليهو و سرحانه فيهو ، كل كلمه كانت بتطلع منو بحسها بتتردد جواي ، حسيت كأني متعوده على طريقة كلامو دي و انو دي ما أول مره يتكلم كتير كدا !!
