المهم فجأه الباب إتفتح و طلعت لينا وحده كدا و من دون ما تسأل نحنا منو قالت لينا اتفضلوا!!
بقيت أعاين لأروى بس و أنا ما فاهمه شي ، الممر لحد البيت جوا كان طويل شويه بس الشي اللفت نظري الشجر و النجيله و الورود المزروعه يمين و شمال الممر ! و كمان في نافوره على كل جانب و في شجر مقصوص على شكل قلوب و دوائر ، يعني منظر قولة رهيب شويه عليهو ، بقيت بعاين حوليني بذهول و ما مركزه مع شي تاني لحد ما وصلنا مدخل البيت و دخلنا ، طبعاً لمن دخلنا الإتنين بقينا فاتحين خشومنا ، قلت ليها ما شاء الله تصميم البيت من جوه و من بره رهيب ياخ ! حتى أطقم الكراسي كانت فظيعه و لونها متناسق مع لون الجدران ، غيتو إنبهرنا شديد ! قلت ليها أروى دا بيت وزير ولا رئيس ؟؟
دخلنا و وقفنا في نص الهول و هي بقت تتلفت ، عاينت لي و أخدت نفس عميق و قالت لي مها انتي بتثقي فيني ؟؟؟
قلت ليها ايوه ، بتسألي ليه ؟؟
قلت ليها على قدر ثقتك و حبك لي أنا كمان بحبك بالطريقه دي و انتي بالنسبه لي أكتر من صديقه ، يشهد الله مكانتك زي مكانة أخواتي و مصلحتك بتهمني ...قلت ليها أروى في شنو خوفتيني ؟؟
قالت لي أنا مستعده اعمل أي شي عشانك و مصلحتك بتهمني و أنا اليوم عملت حاجه من دون ما أكلمك ، بس انا عارفه انك في النهايه حتكوني مبسوطه لأنك في المكان الصح مع الزول الصح ، البحبك من كل قلبو و ما مستعد يخسرك ، أنا ما ضد انو الأهل يتخذوا قرارات نيابة عن أولادهم بس في حاجات كتيره ما ينفع زول يتخذ فيها قرار نيابة عننا ، صدقيني لو كنتي ما فاقده الذاكره ما كنت ح أتدخل أكتر من اللازم و اعمل حاجه من دون رضاك لأنك أكيد لو كنتي متذكره كنتي ح تعرفي تختاري القرار الصحيح لأنك عشتي التجربه و تفاصيلها و كلها في بالك بس حالياً انتي ما متذكره شي و ما بتصدقي إلا البتقال ليك و الما معروف نسبة إذا كان صح أو غلط و حتى لو كان صح ماف زول غيرك مفروض يتخذ القرار دا ، قلت ليها أروى ما فاهمه شي انا ! قلبي قبضني بالجد ! نحنا في بيت منو ؟؟
فجأه جاني صوت بقول في بيتك ...لمن إتلفت وراي شفت منيب و كان نازل من السلم ، طوالي إتلفت على أروى و أنا مخلوعه و بقيت اقول ليها نحنا هنا ليه ؟؟ بتكلم معاك يا أروى ليه جبتيني هنا ؟؟
قالت لي معليش يا مها بس دا الصح و انا متأكده انو منيب هو الزول المناسب ليك و ماف غيرو بخاف عليك ، دموعي طوالي نزلت و قلت ليها ما إتوقعت منك حاجه زي دي ، ليه بس يا أروى تعملي فيني كدا ؟؟؟
دموعها طوالي نزلت و قالت لي لو ما كنت متأكده انو منيب هو المناسب ليك صدقيني أنا اول وحده كنت إعترضت عليهو ، عاينت ليها بزعل و إتحركت من مكاني و كنت ح أطلع بس منيب وقف لي جنب الباب ، قلت ليهو لو سمحت زح من وشي ، قال لي مها....قاطعتو و قلت ليهو ولا كلمه ! صدق اني برضو ما اتوقعت منك حركه جبانه زي دي ؟؟ يعني خلاص لمن احترا و ما عرفت تعمل شنو طلبت من أروى تجيبني ليك ؟؟
