بقيت كل مره اسأل ناس البيت عن الروايه و كل مره أرجع و أفتش الغرفه ! ما الغرفه بس فتشت بيتنا كلو و شنطة حماده حقت الروضه قلت يمكن لقاها و شالها عشان يرسم في الدفتر بس ما كان ليها وجود خالص و دا الحيرني !!
طبعاً تاني ما مشيت المشتل لأنو فجأه كدا حسيت نفسي عيانه و مصدعه شديد و حلقي واجعني يمكن لأني أكلت كميه من الآيس كريم مع حمودي ، أروى جاتني مرتين عشان تطمن علي ، أمي جابت لي بندول و قالت لي أبلعيهو عشان الصداع يخف ، شلتو منها و بلعتو و طوالي نمت ما صحيت إلا بعد صلاة العشاء ، الصداع خف حبه بس حلقي لسه كان واجعني و جسمي كلو مكسر ، مشيت صليت و أخدت لي قعده مع أمي و أبوي ، سألتهم عن ماهر بس قالوا لي لسه ما جا راجع ... طبعاً أنا لي يومين عايزا أتكلم معاهو بس هو بقى معظم وقتو برا البيت و مرات لو جا بدري بلقاني نايمه ، عايزا أتكلم معاهو و أبرر ليهو موقف مرام و أكلمو انها سمعتنا أنا و أروى لمن كنا بنتكلم عنو هو و أروى ....بس تاني إتراجعت و قلت لو كلمت ماهر بالكلام القالتو أروى و سمعتو مرام منظر أروى ح يكون بايخ قدامو !!.
المهم رجعت غرفتي و طوالي رقدت على السرير و أول ما غمضت عيوني كدا تلفون رن ، الرقم كان غريب ! فتحت الخط و قلت آلو ! ...آلو !
ما جاني رد !
كنت ح اقفل بس فجأه جاني صوت راجل و هو بقول لي بقيتي كيف ؟؟
قلت ليهو كويسه بس منو معاي ؟؟
قال لي صوتك تعبان شديد ، متأكده انك كويسه؟؟
قلت ليهو معليش معاي منو ؟؟
قال لي خليك مني و امشي اعملي ليك شاي ب ليمون ح تتحسني بس الأفضل تمشي للدكتور
قلت ليهو جاوبني معاي منو ؟؟
قال لي المهم حبيت أطمن عليك ، هسي اعملي القلتو ليك ، بتصل عليك بعدين و طوالي قفل الخط !!
طبعاً استغربت !!.
بس إحساسي قال لي انو دا منيب !
قلت معناها شال رقمي من أروى
رقدت على السرير و بقيت أعاين للسقف ! ما عارفه كيف بس فجأه كدا إبتسمت !.
و بقيت اتذكرت في كلام أروى لمن كانت بتقول لي شكلو بحبك و بجي المشتل عشانك و لمن سألتني اذا هو عاجبني أو لا .....يعني أنا ذاتي ما عارفه بس ما أنكر انو طول الفتره دي كنت بحاول اتجنبو و ما أركز معاهو بس من جواي كنت بحس بإحساس غريب لمن هو يجي المشتل و أروى تشغلها لي و تقول لي جا عشانك...
قعدت اتذكر فيهو من أول يوم جا فيهو المشتل لحد آخر مره شفتو و أنا بتبسم !
فجأه وعيت على نفسي ! قلت ايوه ظاهرياً كدا هو زول جذاب و عندو كاريزما و حضورو مميز بس آخر تصرف ليهو زعجني شديد و كون خوف كبير جواي منو !
