المهم بعد ما ناس أروى مشوا لملمنا الحاجات و دخلناهم جوه ، بعدها صلينا المغرب ، مرام قالت لي حمودي دا مشى وين ؟؟ قلت ليها ما عارفاهو لكن يمكن يكون مشى بيت ناس أروى للحلاوه القالتها ليهو ، قالت لي بتغشو ساي و هو زي الأهبل جاري وراها ، ضحكت و قلت ليها انتي قصدك حمودي ولا ماهر ، قال لي هيييي ما تجيبي لي مشاكل مع الراجل ، قصدي حمودي أنا 😂
المهم و نحنا بنحضر ، ماهر جا داخل و قال انتوا حمودي دا مشى وين ؟؟ أمي قالت ليهو في بيت ناس أروى ، قال ليها مشى ليه !؟معقوله يقعد للزمن دا ! قال كدا و طوالي طلع ، تاني جا راجع و قال لي تعالي يا مها ، طوالي مشيت ليهو ، قال لي ألبسي توبك و أرح معاي نجيب الولد دا ، قلت ليهو واااي يا ماهر ما قايلاك بتخاف بليل!! ضربني ضربه خفيفه على راسي و قال لي بطلي خفه ، سايقك معاي عشان تكوني شاهده اني لا اتكلمت مع أروى لا عاينت ليها ...عشان مرام دي ما تقعد تزعل و ترجع تاني للضيق و الإنزعاج ، قلت ليهو يا سلاااام يعني ح تتعبني بالمشى عشان مرتك ما تزعل ، قال لي اي ، قلت ليهو كويس كويس ، ضحكت عليهو و دخلت جوه مشيت جبت توب ل مرام و قلت ليها هاك ألبسيهو ماهر واقف ليك برا ، قالت لي ليه في شنو ؟؟
قلت ليها ما عارفه بس أمشي ليهو ، لبست توبها و مشت ليهو ، أمي قالت لي في شنو ؟؟
قلت ليها خليهم ساي على راحتهم ، قالت لي ما فهمت يعني في شنو ؟؟ مياسم قالت ليها ما ح تفهمينا ، قلت ليها المهم هم ماشين يجيبوا ولدهم ، قالت لينا قايلني أم جيقه يعني و ما بفهم حركات عصافير الحب دي يعني 🙂
طبعاً ضحكتنا ضحك ، قلت ليها مباااالغه يا أمي و انا أقول حمودي جايب التفتيحه دي من وين ، قالت لي من بوتيك قمرنا ، قلت ليها لا انتي الليله خطيره يا أمي عديييل ، مياسم قالت لي بكون أبوي غازلها أو سمعها كلام حلو كدا عشان كدا النفسيه عال العال ، أمي قالت لينا غايتو انتوا الواحد ما يفتح معاكم خشمو ، شويه كدا جات رفيف و قالت ل مياسم أنا نعسانه يا ماما ، مياسم قالت ليها خلاص أمشي نومي ، قالت ليها لا عايزاك تنومي معاي يا ماما ، مياسم قالت ليها طيب أرح قدامي ، أمي قالت ليها يعني إلا تنوميها !! مياسم قالت ليها شفعي ديل ما بتعرفيهم يا أمي ، بتاعين غلبه شديده و لو ما نمت معاهم ما بنوموا ، أمي قالت ليها عشان دلعتوهم شديد ، بجنس الطريقه دي ما ح يخلوك تاخدي راحتك و وين ما مشيتي إلا تنومي معاهم في نفس الوقت ، قلت ليها طيب خليني اجرب انومهم لحد ما يتعودوا علينا تاني ، قالت لي ما بنوموا ليك ، قلت ليها ما مشكله بجرب ، قالت لي خلاص أول ما تدخلي الغرفه في شنطه يمين الباب فيها قصص اطفال اقريها ليهم ، ضحكت و قلت ليها ديل ياهم ذاتهم الشفع البجيبوهم في التلفزيون ، المهم مسكت رفيف من يدها و مشيت بيها الغرفه ، لقيت عمر و رنيم قاعدين في نص السرير و منتظرين أمهم تجيهم ، قلت ليهم امكم عايزه تتونس مع أمها شويه عشان كدا ح أنومكم أنا ، قالوا لي و ماما ح تنوم وين ؟؟ قلت ليهم ح تجي تنوم معاكم هنا ! انا بس ح أنومكم و امشي أنوم في غرفتي ، المهم طلعت قصص الأطفال من الشنطه و رقدتهم التلاته و بقيت أحكي ليهم ....صراحه القصص عجبتني في بقيت مركزه معاها شديد و بقرا ليهم بصوت هادي عشان ينوموا.....بعد مسافه كدا رفعت راسي و انا قايلاهم ح يكونوا في سابع نومه لقيتهم لسه مفتحين عيونهم!!
