မျှော်လင့်ခြင်း မနက်ဖြန် (SUNSUN) (SEASON 2)

1

💕

တိတ်ဆိတ်မှုတို့သာ လွှမ်းမိုးနေပြီး အပ်ကျသံကိုပင် ကြားရလောက်အောင် ငြိမ်သက်နေတဲ့ ဧည့်ခန်းကျယ်တစ်ခု...

အဘယ်မျှ တိတ်ဆိတ်နေပါသလဲဆိုရင် လေအဝှေ့မှာ လှုပ်ခတ်နေတဲ့ ခန်းဆီးလိုက်ကာလေးဆီမှ မြည်သံတဖြတ်ဖြတ်ကိုပင် ရံဖန်ရံခါ ကြားနေရလောက်အောင်ပင်...

လူသူလေးပါ ရှိမနေလို့ တိတ်ဆိတ်နေခြင်းတော့ ဟုတ်မ​နေခဲ့ပါဘူး...

ထို ဧည့်ခန်းကျယ်ကြီးထဲမှာ ကျောက်ရုပ်တွေပမာ မလှုပ်မယှက် ထိုင်နေကြတဲ့ လူ ငါးဦးတော့ ရှိနေခဲ့ပါတယ်...

အတိအကျ ပြောရမယ်ဆိုရင်တော့ Kim မိသားစုဝင်တွေပေါ့...။

သူတို့အားလုံးရဲ့ မျက်နှာတွေဟာလဲ တစ်စုံတစ်ရာကြောင့် စိတ်မကောင်း ဖြစ်နေကြဟန်တွေ အတိုင်းသားလား...။

မိသားစုဝင်တွေ အားလုံး ဒီလို မျက်နှာမကောင်းစွာနဲ့ ငြိမ်သက်သွားကြရတဲ့ အကြောင်းအရင်းကတော့ မကြာသေးမီကမှ US ကနေ ပြန်ရောက်လာခဲ့တဲ့ Dr Kim Sunoo ရဲ့ နှုတ်ထွက်စကားတစ်ခွန်းကြောင့်ပေါ့...

အတွေးကိုယ်စီနဲ့ အတန်ကြာ တိတ်ဆိတ်နေခဲ့ကြပြီးမှ ထို တိတ်ဆိတ်မှုကို ဖြိုခွင်းပြီး ဖခင်ကြီး Kim ရဲ့ စကားသံက ဖြေးညှင်းစွာ တိုးထွက်လာခဲ့လေတယ်။

" သား တောင်းဆိုတာကို ဒယ်ဒီ သဘောမတူချင်ဘူး သားရယ်..."

" သား ဆုံးဖြတ်ပြီးပြီ ဒယ်ဒီ... ကျေးဇူးပြုပြီး သား ဆုံးဖြတ်တာကို လိုက်လျောပေးပါ..."

စိတ်မကောင်းပေမယ့် Sunoo အားတင်းပြီး ထပ်မံခွင့်တောင်းလိုက်မိတယ်။

ကိုယ့်ဝမ်းနာ ကိုယ်သာသိမို့ Sunoo မိဘတွေ ဆီ​က ဒီခွင့်ပြုချက်ကို ရမှ ဖြစ်မည်မဟုတ်လားလေ....

" မာမီလဲ သဘောမကျဘူး သား.... မာမီ သားကို စိတ်မချဘူး "

မာမီကပါ တားမြစ်စကားတို့ ဆိုလာလေတာ​ကြောင့် Sunoo မာမီ့ကိုပါ ဖျောင်းဖျရပါအုံးမည်။