عرين الصياد

الفصل 42

ليال

‏ليتني لم اكبر وبقيت صغيرةً الى الأبد
آه كم احن لبراءة لم تخدشها انياب الأيام ولم اعرف بها قسوة احد

-

عرين الصياد بقلمي شذرة

سعاد : اجت شكحه من بيت الملا فاحطه اول ما طبت جوه وجان تصيح صارت لجه ابيتهم
هديت الملابس من ايدي وامشي عليهم تخوصرت يم الرمانه اريد اسمع زين

مبين حميد طاردهم طلع غازي من جوه على حسهم وجان يفوت عليهم ما صدگت على روحي وازرعد وراه طبينه عليهم ونهم يرجدون بروحهم من شكحه وهي محدره

غازي : ما تگلولي شعدكم يوميه طلبه يوميه حسكم يصل عالشارع هاي عود بيت المعلمين
والله لعبت نفسنه وين نهج من وراكم وين

سعاد : شكحه جانت مبسطه بالگاع
وگفت جدام غازي وجان اتخوصر فاحطه

شكحه : منين يتهيالنه انصي حسي اذا تمنجدنه بالعرب هاي ليال الي خلصت عمرك انته ومرتك ادافعون عليها روح شوفها هسع شسوت حبلانه يم اهلهااا

غازي : انتي كل عقلج مسويه طلبه عبن ليال حبلانه مو جنتي طايره بيها تا تحبل احمدي ربج واشكري
عبالي عندج سالفه لو ميتلج احد على هاذ حسج

شكحه : يول شحمد ربي منين حبلت اذا صائب صارله اشهر ما يطب فراشها وحللت گبل لا تنگلع وظلت شهرين يم اهلهاا منين حبلت هاا

غازي : استغفري ربج يمعوده شجاي تحجين

شكحه : غازي عوفني بضيمي هسع يجي صائب وبسيطه الهم

سعاد : ظليت فاكه اثمي وادحگ على غازي وابلع بريگي اريد اضرب شكحه اريد املخها شلون تتهم ليال اجان يا ظالمه
على صدمتي وفات صائب وجان تتنحره شكحه وتگوم تلطم وتصيح

شكحه : تمنجدنه بالعرب يمعثور روسنه صارت بالطين مرتك ست الحسن حبلانه يم اهلها حني ايدك وعدل عگالك يول منين حبلت مو گبل لا تولي لهلها حللت وماكو شي مو وديناهه اني وياااك انهجم بيتك

سعاد : ظل صائب مصدوم ويمتمت
ما گدرت اتحمل اظل كارصه وگفت بنصهم وجان احجي

انتو ما تخافون الله هيج عدكم هينه تتهمون مره هاذ قذف محصنات والله سبحانه يعاقب علي بالدنيا قبل الأخره
ليال حبله گبل لا تروح لهلها اجت عليه وگالت مشتهيه الطين واشوفها تظل دايخه ولايبه روحها استغفرو ربكم وراكم اخره وحساب

شكحه : الف نوبه گنالك نب مرتك يغازي لا تخليها تحشر روحها بينه انتي غريبه هذاك دربج روحي لبيتج