رواية جريح الصمت يا قلبي

بارت ٣١

اقتربت من ام ماجد ونطقت بلطافه: خالتي نادي
قاطعتها: ايه ..اجلسي أشوف!!
جلست وهي تناظر جميله الي اقتربت منهم ....التفتت لأم ماجد: تفضلي خالتي!!
ام ماجد ناظرت جميله الي سحبت كرسي وجلست بهدوء ...رجعت ناظرت بيلسان وهي تنطق بحذر : ليه ما سلمت على اخوات منار
بيلسان عقدت حواجبها ..نادتها علشان كذا وهي فكرت صاير شيء ...ما تدري كبار السن كيف يفكروا ....وبتبرير نطقت: أنا كنت واقفه ومروا من جنبي وما احد منهم كلف نفسه يسلم علي
قاطعتها ام ماجد: يمكن ما انتبهوا لك ..علشان منار لزوم تسلمي وترحبي فيهم ترى
قاطعتها جميله بضجر من تفكير امها ظنت عندها سالفه: اقول اتركينا من أخوات منار..على أساس حداد وحالتهم حاله وأشوفهم رازات نفسهم ..يبغون نحد على أمهم طول حياتنا... استغفر الله العظيم ما ابغى أغتاب ...فكينا منهم
ختمت كلامها وناظرت بيلسان وهي تتابع كلامها: وانت يا حلوة هذا القفطان من وين اشترتيه؟!
ام ماجد رفعت عيونها بضجر: استغفر الله انت ما تشبعين ملابس كل ما شفت وحده لابسه شيء طلعت عيونك واشتريت مثله؟!
كلها عبايه
قاطعتها جميله : عجبتني كثير شوفي لونها هذا اللون من زمان ادور عليه الأزرق النيلي...يجنن
بيلسان ابتسمت على شكلها وعيونها طالعه على الفستان..نطقت بلطافه: مقدم على حسابك ما يغلى عليك
جميله ابتسمت لها: يا قلبي على الناس الذوق..تسلمين بس من وين اشترتيه
بيلسان بملامح هادئة: كنان اشتراه لي ما أدري من وين
ام ماجد مطت شفتها: والله حاله يعني وش فيها لو لبست مثلك مثل البنات ...ما ادري كيف يفكر وش هالعناد الي برأسه الحين الناس تقول اكيد إنه مقصر على زوجته وتباخل يوديها للمزينه ويشتري لها فستان...تراك الكنة الكبيره وين صارت هذي لابسه عبايه!!
قاطعته جميله بحسره: يا ليتني بأناقتها وألبس على قولتك العبايه ... ترى اغلب الحريم عيونهم على القفطان الي ما هو عاجبك ويسألون من وين اشترته لأنه فخامه ...مع هالشال وربي مثل باربي!!
توسعت ابتسامة بيلسان على كلامها وناظرت خوله الي وقفت فوق رأسها وهي تنطق: اتوقع ما تخلص الحفلة والا القفطان ممزق من عيون جميله!!
جميلة ضحكت بخفه: وش اعمل أحب الملابس الجميلة...
ام ماجد قاطعتها وهي تناظر بيلسان: اقول روحي وسلمي عليهم ما نبغى يكون فيه حزازه او شيء
بيلسان وقفت وهي تنطق بهدوء: اذا اقتربت منهم رح أسلم ..والحين بالاذن ..
ختمت كلامها وتوجهت لجهة ليان بخطوات هادئة!!
ام ماجد بعد ما ابتعدت نطقت بضيق: متأكده ما رح تسلم عليهم!!
خوله سحبت كرسي وجلست وهي تنطق: وانت ليه حارقه بصلتك!!
ام ماجد توضح وجهة نظرها: يعني منار بمقام حماتها ولزوم تحترم اهلها وتقدرهم ..مثل ما منار تحترمها وتقدرها ...يعني انا ما توقعت بيوم من الايام تكون حياتهم كذا ..بالرغم من الاذى الي تلقته منار من خزامى ومع ذلك تجاوزت هالشيء وعاملت بيلسان وكأنها بنت لها ...
خوله هزت رأسها: الكل يعرف معاملة منار لبيلسان وبنفس الوقت بيلسان ما قصرت معها أنا اشوفها مثل الفلفه حولها تساعدها وتواقفها اكثر من بناتها ... يعني أحسها تحاول بأقصى جهدها تكون قريبه من الجميع وتتعامل معهم بود واحترام... وما تغلط على أحد !!
ام ماجد هزت رأسها: صحيح كلامك ....بس أنا ما ابغى أحد يتدخل بينهم ويبث سمومه ويخرب علاقتهم!!
جميله باستبعاد: تراك مكبره الموضوع.. وأنا على بالي عندك سالفه لما أشرت لها ذبحني الفضول أعرف السالفه وبالنهاية هذي سالفتك؟!
ظنيت تبغين تقولين لها ليه متحجبه؟!
خوله وهي رافعه حاجب: وهي ليه لابسه كذا؟!
حتى روج ما حطت؟!
ام ماجد مطت شفتها بعدم رضا: يغار عليها وخايف احد يصيبها بالعين!!!
جميله باستغراب: يعني الي يشوف تشدده عليها وغيرته ما يصدق إنهم خربطوا بالاسم يوم الخطوبه؟!
هذي حاله وهو مخربط هذا لو متعني لها وش رح يعمل؟!
خوله زمت شفتها : تراه يبالغ .. تدرين أنا استغربت لما شفتها بالحفلة ظنيت أنه ما رح يخليها تحضر ..تراها اول مره تحضر مناسبه بالعائلة...يعني الي يسمع كلامه يقول عيوننا حاره وخايف عليها!!
جميلة مطت شفتها بسخرية: والمشكلة ما تقول له لا ..ما تقول الا السمع والطاعة
قاطعتها خوله: وانت وش عرفك انها ما تقول لا ...يمكن قدامنا كذا ...البيوت أسرار ما في حرمه ما تتشاجر مع زوجها بس هي من النوع الكتوم وما تطلع اسرار بيتها حتى لو بلعت العلقم ما تقول شيء!!
أنا معجبه بشخصيتها وثقلها ...عكس حفيدتك الخفيفه!!
يعني رح يكون عندهم فرق بالكناين وحده عاقله وثقيله والثانيه رخمه وخفيفه!!
ام ماجد كشت عليها: وش هالكلام؟!
وش ينقصها سلام حتى تقولين عنها كذا ؟!
حفيداتي ما شاء الله عليهم ما ينقصهم شيء!!
جميله بتساؤل: ما راجعوا للحمل كنت تقولين رح تفتحين الموضوع؟!
ام ماجد هزت كتوفها بقلة حيله: اخوك ماجد عصب من هالسالفه ..يقول هالكلام مبكر وما هو وقته... للحين ما كملوا السنتين !
خوله باستغراب: وليه يعصب ..وش فيها لو عملوا فحص اذا في مشاكل او لا ؟!
ام ماجد مطت شفتها بعدم  رضا: أحسه يبالغ بتقديس بيلسان يخاف على مشاعرها من النسمه...ما يبغى تتضايق من هذا الموضوع او تفكر فيه ..والعمر قدامهم ليه العجله!!
خوله ما عجبها الكلام: تقولون احتمال كبير يسافر للخارج على الاقل يكون عنده طفل قبل ما يسافر
ام ماجد بقله حيله؛ يعني وش يطلع بيدي؟!
جميلة هزت رأسها: ربنا ييسر لهم الخير ..الاطفال أرزاق من عند الله !!